Pudno Kadi nga Adda Nalinteg a Gubat?
KADAGITI siniglon, nakaaramiden ti Kakristianuan iti adu a panagsasarita maipapan iti kapanunotan iti “nalinteg a gubat.” Idi napan a tawen ti magasin a Time impablaakna ti maysa a listaan dagiti innem a kangrunaan a kalikagum a patien dagiti teologo a rebbeng a maragpat ti maysa a gubat tapno maibilang dayta a “nalinteg.” Patalgedan ti historia nga awan kadagiti gubat a sinuportaran ti Kakristianuan ti talaga a nakaragpat kadagitoy a kalikagum.
Ngem ti Har–Magedon, ti gubat nga inkari ti Dios nga ipagtengna maibusor iti daytoy narugit a sistema ti bambanag, magaw-atna amin dagiti innem iti pangrukodan dagiti teologo.
“Suroten dayta ti maysa a ‘nalinteg a panggep,’ kas iti panangidepensa iti bagi wenno ti panangparmek iti dakes.” Ti Har–Magedon burakenna nga ikisap amin dagiti paset ti dakes a lubong a ni Satanas a Diablo ti diosna. Ngarud, maikuna maipapan iti “Matalek ken Pudno” a Mannakigubat ti Dios idiay Har–Magedon, ni Kristo Jesus, nga “isut’ mangukom ken makigubat iti kinalinteg.”—Apocalipsis 19:11; 2 Corinto 4:4.
“Daytat’ inwaragawag ken iwanwan ti maysa a ‘nabileg nga autoridad.’” Ti Har–Magedon di mapagduduaan a mailasin kas “ti gubat ti dakkel nga aldaw ti Dios a Mannakabalin-amin”—ti gubatna. Siasino pay koma ti nabilbileg nga autoridad ngem ti Namarsua ti uniberso met laeng?—Apocalipsis 16:14; kitaenyo met ti 11:17, 18; idiligyo ti Isaias 36:10.
“Dayta ti ‘maudi a remedio’ kalpasan pannakapaay dagiti natalna a pamusposan.” Iti rinibon a tawen ita, pinaregta ti Namarsua—uray la nagpakpakaasi—iti sangatauan tapno “makikappiada koma iti Dios” ken tapno “agserbida ken Jehova buyogen ti panagbuteng.” Ngem babaen panagintutulengda kadagiti panagregget iti talna ken pakdaar manipud iti Dios iti 6,000 a tawen itan, awan pagpilian ti Namarsua no di ti gubat.—2 Corinto 5:20; Salmo 2:2, 10-12.
“Di kumurang nga iyeg dayta ti ‘pangripiripan’ ti balligi.” Utobenyo dagiti agbibinnusor a dasig. Iti maysa a dasig isu ti nagkaykaysa a pannakabalin dagiti nasion daytoy a lubong, buyogen amin dagiti pempen dagiti nakaam-amak nga igam. Iti sabali a dasig isu ti Namarsua ti uniberso. Maysa kadagiti babbabassit a parsuana, ti init, ket maysa a mangnibinibi nga urno dagiti thermonuclear a panagbettak a nakapigpigsa unay nga uray dagiti nasion pabettakenda amin dagiti nuklear nga igamda iti mammaminsan a naindaklan a panagbettak, dayta a panagbettak kaslanto la siggiab ti maysa a posporo no iyar-arig. Ik-ikutan ni Jehova amin dagiti nabileg a puersa ti sangaparsuaan tapno maipasigurado a ti gubatna maragpatnanto ti masinunuo a balligi.—Isaias 40:15; 54:17.
“Daytat’ maitunos iti ‘panagbinnagay’—ti naimbag a magun-odan dakdakkel ngem ti maaramid a pannakadadael.” Usigenyo ti maysa a masanguanan nga awanan gubat ti Dios nga Har–Magedon. Mapaksuyan unay ti sangatauan iti bukodna a pannakadadael. Nabaybay-an kadagiti bukodna a pamay-an, aginggat’ kaano a dadaelen ti tao daytoy a planeta ken awanan dayaw a makibur nga agturong iti dalan ti pannakapukaw, a ti maudi isut’ nakaam-ames a parada dagiti kita ti biag a pinukawen ti tao? Daytanto kadit’ maysa laeng a malem ti nuklear a didigra? wenno sumagmamano a dekada ti sangalubongan a polusion? Aniaman kadagita, nailunod ti sangatauan no saan a makiballaet ti Dios kadagiti aramid ti tao. Iti sabali a bangir, usigenyo dagiti pagimbagan nga ikari ti Har–Magedon—ti natalna a masanguanan dagiti nadiosan a tattao ditoy daga, awanen polusion, awanen gubat, awanen kinapanglaw, awanen sakit wenno uray ipapatay. Ikari ti Dios: “Adtoy! aramidek a baro amin a bambanag.”—Apocalipsis 21:3-5.
“Dayta ket ‘mangidaduma,’ aginggat’ mabalin iliklikna ti pannakadangran dagiti di makiraman iti gubat.” Ti Har–Magedon napilinto. “Dagiti nadangkes met laeng magudasdanto, ngem dagidiay agkamkammatalek ken Jehova isudanto dagiti agtagikua iti daga.”—Salmo 37:9.
Amin dagidiay interesado a makalasat iti daytoy pudno a nalinteg a gubat masapul nga ammuenda ti pakaibatayan iti “pananginanama ken Jehova” babaen ti personal a panagadal iti Saona.