Manipud Managbasatayo

Pangagas iti Kanser Patiek a ti paset a “Napagdilig a Panangagas” a nagparang iti benneg a “Panangmatmat iti Lubong” (Setiembre 22, 1991) ket makaallilaw unay. Ipamatmatna a dagiti tao nga agsagsagaba iti kanser magunggonaanda iti di gagangay a panangagas a kas met laeng iti pannakaagas iti naipasdeken a sentro a pagpaagasan. Ti kababagas ti artikulo iti The New England Journal of Medicine a nakaibatayan ti artikuloyo ket naiduma iti impadamagyo.

A. R., M.D., Estados Unidos

Ti ababa a padamagmi ket umiso, ngem dikam laeng naipadamag ti maysa a kangrunaan a naammuan ti panagadal, nga isu daytoy, dagiti dandanin matay nga agsakit a pasiente nga umaw-awat iti gagangay a pamay-an ti pannakaagas impadamagda ti “nasayaat unay a kasasaad ti panagbiag” ngem dagidiay umaw-awat iti di gagangay a panangagas. Nupay kasta, kas impakita ti padamagmi, awan kadagitoy a kita ti panangagas ti napaneknekan nga epektibo a nangpawatiwat iti biag dagiti pasiente. Insingasing ngarud ti panagadal a ti “pili a di panangpaagas” kadagiti dandanin matay a pasiente ket tingitingen. Masapul met a paliiwen dagiti managbasa a, sigun kadagiti managsirarak a mismo, dagitoy a nasarakan “di maiyaplikar iti kaaduan a pasiente a saan unay a nakaro ti sakitda a [kanser].” Dagiti autor iti panagadal kunada a dadduma a di gagangay a panangagas “mabalin a sapulenna ti panangsukimat” dagiti managsirarak iti medisina.—ED.

Dagiti Kumbension iti Makindaya nga Europa Nasarakak a makatignay ti serie dagiti “Agrag-o dagiti Managayat iti Nadiosan a Wayawaya idiay Makindaya nga Europa.” (Disiembre 22, 1991) Arigna a mangmangegko dagiti ikkis ti rag-o ken palakpak bayat nga aw-awaten dagiti Kristiano a kakabsattayo dagiti baro a publikasion ti Biblia iti pagsasaoda. Yantangay diak nabaelan ti timmabuno kadagidiay a kumbension, agyamanak ta impablaakyo dagitoy nga artikulo, isu a nabaelanmi ti nakiraman iti rag-oda ken ad-adda nga apresiarenmi ti tagtagiragsakenmi a wayawaya.

M. M., Italia

Panagalembong Binasak ti artikulo nga “Agimtuod dagiti Agtutubo . . . Kasano a Maliklikak ti Pannakadangran iti Panagalembong?” (Disiembre 8, 1991) Tinignayna ti pusok, ta addaanak ti kapadasan a kas daydiay naisalaysay iti artikulo. Maysa a subtitulo ti mabasa “Dikay Padangran iti Managalembong!” Narigat dayta agsipud ta inton maamisirmon a biktimanaka ti maysa nga alembong, mabalin a nasaktankan. Ngem kas kunaen ti artikulo, mabalin a sagabaentayo ti sumagmamano a sugsugat ken garadgad iti dalan nga agturong iti pudno nga ayat. Agyamanak kadagita a nagpateg nga artikulo.

S. C. S. M., Brazil

Supiat iti Dara Kalkalpasko pay laeng a binasa ti artikulo a “Dikay Ibagbaga ti Pulos!” (Setiembre 22, 1991), ket nakaluaak bayat ti panagsuratko itoy a surat. Makipagnanaedak iti nabingaybingay ti relihionna a sangakabbalayan ket adda agtutubo a balasangko. Uray no saan a busoren ti asawak ti pammatik ita, no rumsuanto ti kasasaad nga agbalinto a maysa nga isyu ti panangyalison iti dara, mabalin a busorennanto. Impaganetget ti artikulo iti panunotko ti pannakasapul ti panangsanay kadagiti annaktayo tapno matakderanda a mismo dagiti prinsipio ti Biblia iti nasapa pay laeng nga edad.

L. W., Estados Unidos

De lana ken dagiti Sanga Iti artikuloyo a “Ti Pagsidsiddaawan iti de Lana” (Setiembre 22, 1991), kunayo: “Nalabit saanen a masapul a palagipandakayo a pagay-ayat dagiti sanga ti de lana. Agitlogda tapno dagiti kapespessa nga igges adut’ taraonda.” Nupay kasta, kaaduan a sanga dida dadaelen ti de lana wenno ti dadduma a lupot! Dayta a sasao kumbinsirenna dagiti tao nga amin a sanga ket makadangran ket masapul a mapapatay.

T. K., Inglatera

Saan nga interamente nga imbaga ti artikulo a papatayen amin a sanga no di ket nangipaay laeng kadagiti praktikal a singasing a manglapeed iti ikakapet ti sanga. Makapainteres, sigun iti “Grzimek’s Animal Life Encyclopedia,” ti kita ti sanga nga agtaraon iti de lana “ket dida kayat ti tumayab. Kaaduan a sanga a tumayab iti balay ket sabali a kita, saanda a makadangran a familia.”—ED.