Manipud Managbasatayo

Panagalembong Pagyamanan iti artikulo nga “Agimtuod dagiti Agtutubo . . . Kasano a Maliklikak ti Pannakadangran iti Panagalembong?” (Disiembre 8, 1991) Nabiit pay a napadasak ti sakit ti nakem ken pannakaliput gapu iti panagalembong idi ti maysa nga agtutubo a lalaki a nakitulagak impatinggana a kellaat ti relasionmi nga awan ti nakaigapuanna. Kamaudiananna naammuak nga isut’ alembong ket sinaktannan dagiti dadduma nga immun-una ngem siak. Itan mabigbigko nga adda met basolko itoy a nasaem a kasasaad agsipud ta nakitulagak a dagdagus. Tarigagayak a nagun-odak koma daytoy nga impormasion adu a bulan ti napalabasen.

G. T., Estados Unidos

Maysa nga agtutubo a lalaki ti nangibaga kaniak a basta kayatnak laeng a gayyem, ket immanamongak. Ngem intultuloyna ti immawag kaniak ken dinawatna a rummuarak a kaduana. Idi dinamagna kamaudiananna no pampanunotek ti makiasawa kenkuana, naragsakanak! Ngem kalpasan ti makatawen imbagana kamaudiananna kaniak a dina pulos tarigagayan ti makiasawa. Kunana a saanak koma a nanginanama kadagiti bambanag yantangay imbagana iti pangrugian pay laeng a saan a sisasagana a mangasawa. Kalpasanna tapno “salingdanna” ti bagina, kunana nga ikasarnakto—inton baro a lubong. Masaksaktanak pay laeng, ngem daytoy nga artikulo tultulongannak a mangtaming iti kasasaad.

S. Y., Estados Unidos

Pampamilia Agbalin a Nasinged Maysaak kadagiti amma a di pulos naginteres kadagiti annakna. Diak nabigbig idi ti napaut a pagbanagan daytoy. Ti panangbasak kadagiti artikuloyo a “Pampamilia—Agbalin a Nasinged Sakbay a Naladawen” (Setiembre 22, 1991) pinaladingitnak! Ikarik nga agbaliwak ket aramidek ti inggat’ kabaelak a mangipakita iti ad-adda pay a panagayat kadagiti annakko.

J. B. M., Gabon

Dagiti artikulo saritaenda ti panangikaso iti sangit ti maladaga. Kayat kadi a sawen daytoy a masapul nga asikasuen ti tunggal panagsangitna? No kasta, saan kadi a daytoy pagbalinenna ti ubing a mangiturong kadagiti nagannakna—isu a pakadangranna kamaudiananna?

S. H., Estados Unidos

Saankami a nangikeddeng iti di mabalinwan a paglintegan no di ket nangipaaykami iti kaaduan a pammaregta kadagiti inna nga asikasuenda dagiti annakda. Ket nupay no maseknantayo maipapan iti panangpalamlam kadagiti natataengan nga annak ken agtutubo, kaaduan a doktor patienda a narigat a palamlaman dagiti babassit nga ubbing babaen ti panangasikaso kadakuada no agsangitda.—Kitaenyo ti artikulo a “Johnny, Pangngaasim ta Agsardengkan!” iti Pebrero 8, 1983, a bilang ti “Agriingkayo!”—E.D.

Panangallilaw iti Siensia Interesadoak a nangnangruna iti artikulo a “Dagiti Panangallilaw iti Pasilio ti Siensia.” (Nobiembre 22, 1991) Naikamengak iti maysa nga institusion a nadakamat iti artikulo, ket makapakigtot a maammuan a rummuar ti kasta a kasasaad kadagiti mapagtaltalkan a sientipiko a komunidad. No ti panagsasalisal ken pannakapilit nga agbalin a numero uno ringbawanna ti kinapudno, maaramid dagita a banag. Dayawek ti kinatured ken kinapudno ni Dr. O’Toole—isu a nakapukawanna iti trabahona! Ti kababalin agparang nga, ‘Asino ni Dr. O”Toole a mangkorehir ken ni Dr. Imanishi-Kari?’ Rumbeng a ti koma kinamannakaawat ti pakailasinan dagiti sientista, ngem no dadduma pudno ti kasunganina.

O. O., Estados Unidos

De Lana Tarigagayak ti agyaman kadakayo maipaay iti artikulo a “Pagsidsiddaawan iti de Lana.” (Setiembre 22, 1991) Agad-adalakon nga agbalin a modista, ket naadalmi ti maipapan iti de lana. Imbatayko itoy nga artikulo ti proyektok iti eskuelaan. Adda bassit danagko iti panangaramidko iti kasta ta ang-angawendak dagiti kaeskuelaak gapu ta maysaak a Saksi ni Jehova! Ngem interesado ti mannursurok a nangbasa iti artikulo ket dimmawat iti personal a kopiana iti Agriingkayo!

P. A., Czechoslovakia