Surotenyo Kadi ti Balakad ti Doktor?
NO MAIPAPAN iti panagsigarilio, aniat’ rebbengen ti doktor? Basta agasan laeng kadi dagidiay agsagaba iti saksakit a mainaig iti panagsigarilio? Marikna ni Dr. Louis Sullivan, sekretario ti U.S. Department of Health and Human Services, a rebbeng a saan laeng a dayta ti aramiden dagiti doktor. Isut’ nabiit pay a nagsurat idiay The Journal of the American Medical Association: “Rebbengen dagiti mangngagas nga ipakaammo kadagiti pasiente ti pagbanagan ti panagsigarilio iti salun-at, lapdan dagidiay di agtabtabako a mangirugi, ken tumulong kadagiti managsigarilio a mangisardeng iti ugali.”
Apay a rebbeng a mairaman dagiti doktor iti panagbiag ken panagpili dagiti pasienteda? Binigbig ni Dr. Sullivan: “Ti panagsigarilio maysa a pili, ngem dakes dayta a pili.” Isut’ mangipaay iti natibker a pammaneknek: “Tunggal tawen, papatayen ti panagsigarilio ti dandani 400 000 nga Americano; daytat’ nasurok a 1000 a tao iti inaldaw, nga ad-adu ngem maysa nga ipapatay iti tunggal innem a matmatay iti pagiliantayo. Ti bilang dagiti Americano a matay iti tinawen iti sakit a patauden ti panagsigarilio lab-awanna ti bilang dagiti Americano a natay idi Gubat Sangalubongan II.”
No ipamaysa kadagiti babbai, dakamaten pay ni Sullivan dagiti makariribuk a nasarakan: “Linab-awanen ti kanser ti bara ti kanser ti suso a kas ti kasaknapan a gapu iti ipapatay manipud iti kanser kadagiti babbai. Dagiti babbai nga agsigarilio mamitlo nga ad-adda a maatakeda iti puso ngem dagiti saan nga agsigarilio a babbai, ken dagiti agsigarilio a babbai agpeggadda iti nakapuy a salun-at ken ipapatay manipud iti emphysema ken dadduma pay a saksakit a mainaig iti panagsigarilio. Dagiti babbai nga agsigarilio no masikogda ad-adda a maalisanda, nababa ti timbang ti ipasngayda nga ubing, ken ubbing a matay bayat ti kinaubingda.”
Iti sidong dagitoy a makapakellaat a kinapudno, kuna ni Dr. Sullivan nga adda pay laeng kasta unay a panangpilit kadagiti tattao nga agsigarilio. Kondenarenna a kas “makarimon” ti panangparegta kadagiti minoridad a grupo nga agsigarilio. Namakdaar met maipapan iti nasikap a panangusar kadagiti agtutubo, makaallukoy a modelo iti naraniag, napudot a luglugar a mangipakita kadagiti agtutubo a ti panagsigarilio ket nasalun-at ken makaawis. Iti kinapudnona, no di agbaliw ti kaadu dagiti agsigsigarilio, lima a milion nga ubbing a sibibiag itatta ti matayton gapu iti saksakit a mainaig iti panagsigarilio. Paregtaen ni Dr. Sullivan dagiti padana a dodoktor, “a daytat’ maysa a didigra a masapul a lapdantayo.”
Pagduaduaan pay laeng no lapdanto dagiti doktor daytoy a didigra. Kuna ni Dr. Sullivan: “Daksanggasat, dadduma a mangngagas itultuloyda ti agsigarilio, a mangituytuyangda iti nakapuy nga ulidan kadagiti pasienteda ken iti kamengda ken mangipapaayda iti maibusor iti salun-at a mensahe kadagiti amin a makaammo kadakuada.”