Agsasallopang a Pagtayaban
Agaw-awiden dagiti 266 a pasahero iti Conair nga agturong idiay Denmark kalpasan ti maysa a bakasion iti Kastila nga isla iti Ibiza. Ti duat’-makinana nga Airbus kapampanawna pay laeng iti runway idi adda panagbettak iti makin-kannigid a makina. Ti nadadael nga eroplano, a maymaysan ti agan-andar a makinana, inkagumaanna ti agpangato. Naimbag laengen ta nalaing ti piloto, kalpasan ti 24 minutos a makapakintayeg-nerbio a panagtayab, ti eroplano sibaballigi a nagdisso ta kasapulan unay.
Nalapdan ti trahedia. Nupay kasta, dagiti opisiales iti kinatalged iti tangatang magagaranda a makaammo no aniat’ nangpataud ti panagbettak ti makina iti kasta a nakarikrikut a kanito iti panagtayab. Aniat’ nalabit makagapu iti panagbettak? Maysa a sea gull.
Adu a tawtawen ti napalabasen bukbukodan dagiti tumatayab ti tangatang. Nupay kasta, iti maudi a paset daytoy a siglo, umil-ileten ti tangatang a pagtayabanda gapu iti kaadu ti eroplano. Di ngarud pakasdaawan, daytoy nangiturong iti kasta unay nga yaadu ti bilang dagiti panagdungpar dagiti tumatayab ken dagiti eroplano. Nakarkaro pay ti peggad kadagiti pasahero no masusop ti engine intake dagiti tumatayab, kas ti nalawag a napasamak idiay Ibiza.
Agsipud ta kaaduan kadagiti pannakadungpar iti tumatayab mapasamak iti asideg ti eropuerto, dagiti autoridad iti eropuerto nangbusbosdan ti dadakkel a gatad ti kuarta kadagiti nadumaduma a pamay-an a mangpaadayo kadagiti tumatayab iti eropuerto. Iti maysa nga eropuerto idiay Vigo, iti makin-amianan a laud a kosta iti España, maysa a naisangsangayan a pamay-an ti mapadpadasen. Daytoy ramanenna ti panangusar kadagiti tumatayab nga agkaan ti padada, nangnangruna dagiti goshawk, a mangpatrolia kadagiti runway. Tapno ad-adda pay nga epektibo daytoy a pamay-an, dagiti recording ti ikkis dagiti sea gull ket maibrodkas bayat ti panagtayab dagiti goshawk iti tangatang. Ti nakabutbuteng a pannakakita iti kali a tumaytayab agraman ti makasisileng nga ikkisna pilitenna dagiti gull nga agsapul iti nataltalged a pagkamanganda.
Agingga ita, adda panagballigi dagiti goshawk a mangpapaadayo kadagiti gull. Mainanama a babaen itoy a baro a pamay-an, saanton a lapdan dagiti sea gull ti panagtayab dagiti eroplano, ket itultuloy met dagiti gull ti agtayab. Dagiti tumatayab met ketdi ti immuna iti tangatang.