“Tapno Awan ti Masayang”

Babaen iti koresponsal ti Agriingkayo! idiay Ghana

ISUT’ naam-ammok idiay nanumo a pagar-aramidanna idiay Labadi, ruar ti Accra, nga agragragadi ken agkatkatam buyogen nakaskasdaaw a pigsa. Ti naganna ket Adams Akuetteh. Isut’ agtawen ti 70 ken maysa a karpintero iti napalabasen a 50 a tawen.

Idi nga inimtuodko no ania ti ibilbilangna a tampok ti kinakarpintero a karerana, dagdagus nga imbagana ti uppat a tawen a binusbosna iti pannakaibangon ti baro a pasilidad ti sanga ti Watch Tower Society idiay Nungua, Ghana. Daytoy ket manipud 1984 aginggat’ 1988.

“Aniat’ inaramidmo idiay lugar ti pagpatakderan?” insaludsodko.

“Nagaramidak kadagiti kongkreto a porma ken tinulongak dagiti nangikabil iti atep.” “Kasla ad-adda a malaglagipdaka,” insingasingko, “no maipapan iti abasto a lansa iti lugar ti pagpatakderan.”

“Ay, wen, lansa. Ammom, nangina ti lansa idiay Ghana. Kadagidiay nga al-aldaw ti kagudua ti kilo a lansa ket aggatad iti manipud dua aginggat’ tallo a doliar. Gapuna a kunak iti bagik, ‘Ditay kadi mapagbalin dagiti dadduma a daanen a lansa? Padasek.’

Gapuna a rinugiak dayta iti bukodko a panagregget ken bukodko a panawen. Idi ti manangaywan ti proyekto nakitanak, isu ket naragsakan. Permanente nga intudingnak iti dayta a trabaho. Gapuna nga iti uppat a tawen, binigat a pinindak ti lugar a pagpatakderan tapno agurnong kadagiti naiwara a lansa. Siaannad met nga inikkatko ti aniaman a masarakak kadagiti kayo dagiti narakraken a porma.”

“Imbellengmo kadi dagiti narukop ken nabilloken?”

“Saan. Dagiti narukopen ket naaramat manen kadagiti nalukneng a kayo, wenno nagarugadda tapno mausarda manen iti natangken a kayo. Dagidiay nabillok ket siaannad a linintegko babaen iti martilio.”

“Saanmo kadi a narikna a makauma ken makapasikor daytoy a trabaho?”

“Mabalin a kastat’ rikna ti maysa nga agtutubo, ngem saan kaniak. Kuna kaniak ti manangaywan ti proyekto a ti trabahok ket main-inotna ti kuarta ti Sosiedad, ti kuarta ni Jehova, gapuna a naragsakanak. Naisangsangayan a rag-o para kaniak ti pannakakita iti umad-adu a buntuon dagiti nagduduma a kadakkel dagiti nasalbar a lansa. Ket kunaek iti bagik, ‘Aha! Ita di makaaguantan dagiti agat-atep!’ Ngem kalpasanna agpukaw ti buntuon. Agpukkawda manipud iti atep ket dumawatda iti ad-adu pay! Gapuna a partakak ken ipaspasiak manen ti agbiruk.”

“Aniat’ ar-aramidem itan ta nalpasen ti panangibangon?”

“Addaak manen iti amin-tiempo a ministerio, nga agur-uray agingga nga umaykayo tapno mamangon iti kanayonan a patakder iti sanga ti Ghana. Addaakto sadiay, mangsalbar kadagiti lansa ken makain-inot iti kuarta—buyogen rag-o.”

Iti las-ud ti uppat a tawen inaramidna ti ibilbilang dagiti dadduma a nalag-an laeng a trabaho. Ngem saan a pulos nga imbilang ni Adams Akuetteh a kasta, “ti mananglinteg iti lansa ti sanga ti Ghana.” Buyogen rag-o pinabarona dagiti lansa tapno makasalimetmet iti kuarta maipaay ken Jehova!

Kasta met ti kapanunotan ni Jesus. Nupay isu ket naaddaan awan keddengna a namilagruan a pannakabalin a mangpaadu kadagiti tinapay, kunana kalpasan maysa a pannangan: “Urnongenyo dagiti pispisi a natda, tapno awan ti masayang.”—Juan 6:12.

[Ladawan iti panid 31]

Ni Adams Akuetteh, “ti mananglinteg iti lansa ti sanga ti Ghana”