Banag a Nasaysayaat Ngem ti Di Nagbannogan

DANDANI amin a sugador agtungpalda a napangpanglaw ngem idi nangrugida a nagsugal. Masansan, uray pay dagiti sumagmamano a mangabak iti dadakkel a gatad masarakanda a dagiti inabakda ket saan a pasaporte nga agturong iti kinaragsak.

Maysa a 36-años a baro idiay Japan ti nangabak iti $45,000 iti maysa a loteria. Panggepna nga igatang ti maysa a balay ti inabakna, ngem isut’ puntiria ti kasta unay nga apal ken pammardaya ta inkeddengna nga awan mamaay dayta. Iti pakasdaawan dagiti katrabahuanna, pinuuranna ti nangabak a tiketna iti imatangda.

Dagiti polis idiay Florida tiniliwda ti maysa a babai a, nupay nangabak ti $5 milion iti loteria, implanona a papatayen ti manugangna a babai. Kinuna ti barona nga isut’ aburido gapu iti lugi a panangipuonan ken nalabes a panaggasgasto a nangibus iti kinabaknangna.

Naabak a Nangabak

Ni Domingo ket maysa a di magawidan a sugador ken ama ti lima. Ilawlawagna: “No mangabakak, dakdakes pay. Pagarupko a maysaak a tao a naisangsangayan ti pannakabalin ken abilidadna, ket diak makaurayen nga agsubli iti pagsusugalan tapno mapaneknekak a saan a naiparna laeng dayta.

“No sumro daytoy a riknak, kaslaak nagtomar iti droga. Diak agkedked a mangpanaw ken baketko ken dagiti annakko basta makapagtultuloyak nga agsugal. Uray no maulit-ulit nga inkarik iti asawak a diakto agsugal manen, iti pusok ammok a dagitoy a karkari awan ti mamaayna. Malagipko iti naminsan nga impanamnamak iti asawak a lipatekon a mamimpinsan ti sugal, idinto nga iti dayta a kanito, pangpanggepek no kasano a makagun-odak iti kuarta nga ipustak.

“Naabak amin a kuartak, ti kuarta ti asawak, ken ti negosiok, ket nakaro ti pannakailumlumko iti utang. Awan ti aldaw a limmabas nga awan ti pustak, agingga nga adda napasamak a nangpilit kaniak a mangsukimat iti bagik. Nakipagadalak iti Biblia kadagiti Saksi ni Jehova. Naawisak iti naad-adalko, ngem diak simmardeng a dagus a nagsugal. Agyamanak ta nakaan-anus ti Saksi a mangiyad-adal kaniak.

“Ngem di nagbayag nangrugin nga inapektarannak ti mensahe ti Biblia. Daytat’ nangtulong kaniak a mangpanaw iti arapaapko a lubong ken makakita iti bagik kas iti panangmatmat ti Dios kaniak. Nakigtotak. Nabainanak iti kasta unay, kas kadagidiay sinuratan ni apostol Pablo idi umuna a siglo: ‘Ania ngarud ti bunga nga adda kadakayo idi? Dagidi bambanag nga ibainyo ita. Ta ti panungpalan dagitoy a bambanag isu ni patay.’​—Roma 6:21.

“Ti panangammo iti Dios, ti naganna, ti personalidadna, ken nangnangruna ti asina ti nangtignay kaniak nga agtarigagay a mangbalbaliw kadagiti dalanko, a mangpanunot kadagiti dadduma imbes a ti bagik. Kamaudiananna inidiakon a naan-anay ti sugal, ket nabautisarankami nga agassawa.

“Kinuna ni Jesus a wayawayaannatayo ti kinapudno. (Juan 8:32) Pudno dayta kaniak. Ti kinapudno iti Sao ti Dios ti nangted kaniak iti banag a napatpateg nga alagaden, nangisubli iti panagraemko iti bagik, ken nangiyeg iti dakkel a pannakapnekko. Natulongak pay ti maysa a dati a sugador a gayyemko a mangbalbaliw iti biagna a kas iti inaramidko. Idi nabautisaranda nga agassawa, ad-adda a pinaragsaknak dayta ngem ti aniaman a panangabakko iti sugal.

“Iti napalabas a 20 a tawen, diakon nangipuspusta iti aniaman, uray bassit laeng a gatad. Diak kunaen a nalaka dayta, ngem saan met a narigat. Ket ti inted ti Dios kaniak saanna laeng a pinunno dagidiay kasapulan a tinartarigagayak a penneken babaen ti panagsugal.”a

Ti Nainkasuratan a panangmatmat isut’ kapapatgan kadagidiay agtarigagay a mangaramid iti pagayatan ti Dios. Ket dagidiay a mangsurot iti balakad ti Dios saanda laeng a maliklikan ti ladingit nga iyeg ti panagsugal no di ket mangitukon kadakuada iti napatpateg pay ngem ti aniaman nga inabak iti panagsugal.

Maysa a Kinabaknang a Dakdakkel ti Pategna

Kinuna ni Pablo, idi nagsurat ken Timoteo idi umuna a siglo: “Ibilinmo [kadakuada] a dida imaldit ti inanamada kadagiti kinabaknang a pagduaduaan kas iti kuarta, no di ket iti Dios, isu a mangted kadatayo iti nawadwad kadagiti isuamin a pagragsakantayo. Ibagam kadakuada nga agaramidda iti naimbag . . . , managparanudda, ken agurnongda ti maipaay kadakuada ti maysa a nasayaat a pamunganayan a maipaay iti masanguanan. Iti kasta magun-odanda ti pudpudno a biag.”​—1 Timoteo 6:17-19, The New English Bible.

Ti maysa a magun-odan a gameng isu ti naimbag a nagan iti Dios. Daytoy mangiturong iti “pudpudno a biag”​—biag nga agnanayon, ti kadadakkelan pay laeng a supapak a naitukon. Kinuna ni Jesus iti kararagna iti Dios: “Daytoy kaipapananna ti biag nga agnanayon, ti pananggun-odda ti pannakaammo kenka, ti maymaysa a pudno a Dios, ken daydiay imbaonmo, ni Jesu-Kristo.”​—Juan 17:3.

Saan a kas kadagiti mapagduaduaan a premio a kuarta, ti premio nga itukon ti Dios ket mabalin nga abaken ti siasinoman ken tunggal maysa a mangaramid iti pagayatan ti Dios. Kasta met, ti panagaramid iti pagayatan ti Dios mangipaay kadagiti amin a pagragsakan a tarigagayan ti asinoman, ken dayta mangipaay iti tao ti panagraem iti bagina ken ti addaan panggep a biag. Kabayatanna, gapu iti nasaem a supapak ti panagsugal, laglagipenyo ti balakad ti kadaanan a proverbio nga Ingles: “Ipallatok dagiti sugador ti dais tapno pustaanda ngem nasaysayaat no ipurruakda ti dais.”

[Footnote]

[Ladawan iti panid 10]

Ti biag nga agnanayon iti maysa a paraiso a daga dakdakkel a premio ngem ti aniaman a magun-odan babaen iti panagsugal