Tulongan ti Agriingkayo! Dagiti Mannigarilio nga Isardeng ti Bisioda!
LIMAPULO A MILION. Kastat’ kaadu dagiti mannigarilio idiay Estados Unidos. Dua a kakatlo kadakuada ti agtarigagay a sumardeng nga agsigarilio. Saan a nakaskasdaaw dayta, ngamin idiay Estados Unidos, ngangngani 400,000 a tattao ti matmatay iti tinawen gapu iti panagtabako. Idiay Francia, 65,000 a tattao ti matmatay iti tinawen kas banag ti panagsigarilio. Idiay Alemania 70,000.
Addaan panggep a mangispal kadagiti biag, nangipablaak ti Agriingkayo! ti maysa a serie dagiti artikulo maipanggep iti panagsigarilio iti Hulio 8, 1989 a bilangna a napauluan “Mailaklako ni Patay.” Ti ladawan iti akkubna—maysa a bangabanga a nakaabbal ti sigarilio—ket nakadidillaw ken makariribuk. Nangipaay dayta ti naisangsangayan a komplemento iti pangserra nga artikulo a, “Sangapulo a Pamay-an ti Saanen a Panagsigarilio.” Ti saludsod ket, Pudno kadi a nakatulong dayta a bilang kadagiti nakaro a mannigarilio?
Ni Rolf, maysa a Saksi ni Jehova a taga Alemania, inkeddengna a takuaten dayta. Adda katrabahuanna a naigamer iti panagsigarilio iti adun a tawen ken namin-adun a pinadasna nga isardeng ti bisiona ngem napaay. Gapuna isut’ inikkan ni Rolf ti maysa a kopia ti “Mailaklako ni Patay” a bilang ti Agriingkayo! Ti resultana?
“Babaen ti tulong ti balakad nga impaay ti Agriingkayo!” kinuna ni Rolf, “18 a bulanen a saan a nagsigsigarilio. No kasta a makasigsigarilio, iruarna ti magasin iti lamisaanna, ket umdasen ti ladawan ti bangabanga a nakaabbal ti sigarilio a mangigawid kenkuana nga agsigarilio manen.” Nadlaw dagiti dadduma daytoy a kellaat a panagbalbaliw dagiti pasamak. Dinamag ti maysa pay a katrabahuan iti immuna no kasano a nabaelanna nga insardeng ti agsigarilio. Isut’ inikkanna ti Agriingkayo! ket imbagana, “Babaen daytoy.” Ti resultana? Insardengna metten ti agsigarilio ket saanen nga agsigsigarilio iti nasuroken a makatawen!