Napukaw ti Silud ni Patay
KADAWYANEN ti makabasa a gagangay wenno normal ti ipapatay. Kinaagpaysuanna, saan a gagangay, sigun iti salaysay ti Biblia. Kabusor ti ipapatay a nagtaud iti basol. “Gapu iti maymaysa a tao simrek ti basol ditoy lubong ken ti ipapatay gapu iti basol, ket iti kasta nagsaknap ti ipapatay kadagiti amin a tao agsipud ta nagbasolda amin,” kuna ti Biblia idiay Roma 5:12. Yantangay saan a pinanggep ti Dios ti ipapatay ti sangatauan, siaayat a nangaramid ti dalan a rumkuasan. Pinalubosanna ti Anakna a matay gapu kadatayo, nangipaay ti katupag a subbot tapno mapunas ti dusa ni patay. (Mateo 20:28; 1 Juan 2:2) Nangikari met ti naindagaan a paraiso nga addaan ti naan-anay a baro a gobierno a mangituray ti amin a sangatauan. Naan-anayto a punasen dayta a gobierno dagiti epekto ti basol ken ipapatay. (Lucas 18:30) Kuna ti Biblia iti Apocalipsis 21:3, 4: “Ti Dios addanto kadakuada. Ket punasennanto ti lua kadagiti matada, ket awanton ni patay, wenno sangsangit wenno sasaibbek wenno rigrigat. Dagiti immuna a bambanag napalabasdan.” Ngem dagidiay ngay a natayen?
Addaanda ti namnama nga agungar—ti namnama nga agbiag manen kas tattao iti dayta a Paraiso a daga, nga addaan kadagiti nakasalsalun-at a bagi ken pampanunot. Wen, “ti oras umay a dagiti amin nga adda kadagiti pakalaglagipan a tanem mangngegdanto ti timekna ket rummuardanto.” (Juan 5:28, 29) Daydiay imbaon ti Dios a mangsubbot ti sangatauan, ni Jesu-Kristo, nangted ti kanayonan a pammatalged: “Isu daytoy ti pagayatan ni Amak, a siasinoman a makakita iti Anak ken mangitultuloy a mamati kenkuana maaddaanto ti biag nga agnanayon, ket pagungarekto iti kamaudianan nga aldaw.”—Juan 6:40.
Daytoy namnama ti panagungar ti nangtulong ti adu a napukawan ti inay-ayatda ken patay. Mabigbigda a dagiti inay-ayatda ti basta “matmaturog ken patay,” ket ngarud “dida agladingit kas kadagiti dadduma a tattao, nga awanan ti namnama.” (1 Tesalonica 4:13, The New English Bible) Inanamaenda a tagiragsakendanto ti pannakilangenlangen manen kadakuada iti dayta baro a sistema dagiti bambanag ti Dios. Addaanda ti pammati iti Dios a mangted ti liwliwa ken namnama.—Roma 15:4, 13; 2 Corinto 1:3; 2 Tesalonica 2:16.
Dayta ti gapuna no apay a naisalsalumina ti serbisio ti pumpon dagiti Saksi ni Jehova kadagiti sabsabali. Tapno magun-odan ti anamong ti Dios, liklikan dagiti Saksi ti aniaman nga ugali a maikontra ti Saona, ti Biblia. Liklikanda met dagiti ug-ugali ken panagpanes a naibatay kadagiti pammati a di insuro ti Biblia. Bayat a daydayawenda laeng ti pudno a Dios, ni Jehova, agkitakitda a mangipaay ti panagrukbab iti minatayda. Ken saanda nga iparammag ti kinabaknang wenno saadda, ta pagaammoda a makapaluksaw daytoy iti Dios. (1 Juan 2:16) Simple ken nadayaw dagiti pumponda ken tumulong a mangpakalma kadagiti puso dagidiay nagminatay. Maysa a palawag ti maipaay a panglaglagip iti natay, a mangisalaysay ti namnama a masarakan iti Biblia. Agladingitda, ngem saan a napalalo.
Ammo dagiti Saksi ni Jehova a mapukawton ti “maudi a kabusor, ni patay.” Ket pumudnonton dagiti naipadto a sasao: “Maalun-onton nga agnanayon ni patay. Adino ti yanna, O patay ti panagballigim? Adino ti yanna, O patay ti panniludmo?”—1 Corinto 15:26, 54, 55.