Makapapatay a Danum
SINUKIMAT dagiti managsirarak manipud Mayor de San Marcos National University idiay Peru ti 30 a sample ti danum manipud kadagiti pasilidad publiko ken pagtaengan idiay siudad ti Lima. Sigun iti Visión, maysa a magasin ti Latin-America, 29 a sample ti namulitan iti kasta unay iti bakteria ken ibleng. Maysa laeng a sample ti danum ti mabalin nga inumen.
Kinuna ti Ministry of Health ti Peru a 50 porsiento iti danum nga in-inumen dagiti umili ti Lima ti makaited iti “sika, tipos, hepatitis, kolera, ken dadduma pay a saksakit iti tian ken bagis.” Nangnangruna nga agdindinamag ti panagsaknap ti kolera idiay Peru, a kinaptanna ti agarup 150,000 nga umili ken nakatayan ti 1,100 iti nagbaetan laeng ti Enero ken Abril idi 1991.
Tapno marisut ti parikut indagadagda ti panangipaburek iti danum agingga a matay dagiti makaited-sakit a mikrobio. Nupay kasta, saan a kanayon a nalaka nga aramiden dayta. Kuna ti Visión nga “adu a pamilia ti manginaan a mangpaburek iti danum iti uneg ti sangapulo a minutos ngamin nasurok a maysa a doliar ti presio ti petrolio kada galon,” dakkel daytan a maikissay iti linawas a promedio a matgedanda.
Saan laeng a kadagiti napanglaw a pagilian a parikut ti namulitan a danum. Kas pangarigan, sigun iti The New York Times, idiay Estados Unidos, “mapattapatta a nasurok a 250,000 nga ubbing kada tawen ti masabsabidongan iti danum a nalaokan iti adu a buli nga umanay a mangdadael iti mental ken pisikal a panagdakkelda.” Uray idiay Europa parikutda dagiti narugit a tubo ti danum. Ti magasin a New Scientist ipadamagna a “kaaduan a suplay ti danum idiay Europa ket aggapu kadagiti ubbog a nakarot’ pannakamulitna kadagiti kemikal ken metal a substansia.”
Tinukoy ti Biblia idiay Apocalipsis 14:7 ni Jehova kas “Daydiay nangaramid iti langit ken iti daga ken baybay ken kadagiti ubbog dagiti danum.” Isut’ addaan met iti pannakabalin a mangpasam-it ken mangdalus kadagiti napait ken namulitan a danum. (Exodo 15:22-25; 2 Ar-ari 2:19-22) Aramidennanto daytoy iti intero a lubong kalpasan panangdadaelna kadagidiay mangdaddadael iti daga.—Apocalipsis 11:18.