Manipud Niog Agbalin a “Coir”

Babaen ti koresponsal ti Agriingkayo! idiay India

GISTAY amin ammona ti niog. Ngem ania ti coir? Daytat’ maysa a gunggona manipud tunggal niog.

Ti nanglikmut ti naraman a puraw a bagas ti niog ket maysa a natangken a sabut. Ti mangsalsalaknib iti sabut ket maysa a napuskol ammuratna a bunot, a mabalin nga ibilang ti dadduma a basura laeng. Ditoy makin-abagatan nga India, a naruay iti niog, mapagsina dagiti bunot manipud iti bunga ken maiyuper iti danum agingga iti walo a bulbulan. Mataltaldanto babaen ti ima tapno mapaluknengda ken inton agangay pirsapirsayento ida ti makina tapno agbalin a naburbor, nabalitokan nga ammurat a maawagan coir.

Matinaan ti coir iti nagduduma a maris. Daytat’ tiritirento ti ima tapno agbalin a linas ken matibbi a mapagbalin a lubid a coir. Dagiti pagabelan ti ima ken pagabelan a papaandaren ti koriente pagbalinendanto ti coir a makaawis a pagpigadan, mourzouks (napuskol a pigad), alpombra, aplag ti datar, ken sakab ti diding.

Dagiti produkto a naaramid iti coir ket makalikaguman iti sangalubongan ken adda pagimbaganna. Dagiti nalagda a coir ket saan a maapektaran iti agneb; maanduranda dagiti simot-simot, panagrupsa, ken buot; saanda a kumsen; ken saan a mauram. Nasayaat met a manglapped iti temperatura ken aweng. Agasenyo—amin dagitat’ agtaud laeng iti bunot a kadawyan a maibelbelleng kas awan kapapay-anna!

[Ladawan iti panid 16]

Dagiti bunot a naiyuper iti danum iti walo a bulbulan

[Dagiti Ladawan iti panid 16]

Naaramid dagiti pagpigadan manipud natinaan a coir