Pammati ni Wyndham—Kasano nga Inapektaranna ti Sabsabali

TI Agosto 22, 1991 a magasin nga Agriingkayo! nangipablaak ti maysa nga artikulo maipapan iti kinamatalek ni Wyndham Cook iti linteg ti Dios a mangibilin kadagiti Kristiano nga adaywanda ti dara. (Aramid 15:20; 21:25) Naaddaan ni Wyndham iti varicose veins iti karabukobna, ket adda bassit sakitna a hemophilia (narigat nga agbalay ti darana). Impadamag ti artikulo a nalasatanna ti sumagmamano a panagpadara, nga iti naminsan ti hemoglobin ti darana bimmaba agingga iti 2. Makapaladingit, kinuna ti maysa a footnote iti artikulo: “Idi dandani maiyimprentan daytoy a magasin, pimmusay ni Wyndham kalpasan ti maysa manen a panagpadara.”

Epekto kadagiti Padana nga Agtutubo

Adu nga agtutubo idiay Estados Unidos ti nagsurat iti Agriingkayo! a nangiyebkas iti panangapresiarda iti artikulo ken ti epekto dayta kadakuada. Kinuna ti maysa a balasang a taga Clinton, Iowa: “Idi nabasak no kasano nga indepensa daytoy a 15-años nga agtutubo [iti bagina] kadagiti doktor ken siaanus nga inlawlawagna no apay a nagkedkedanna ti dara, ginutugotnak a mangusig iti pammatik ket sinaludsodak ti bagik no ania koma ti inaramidko. Ti pammati ken panagibtur ni Wyndham pinagbalinnak nga ad-adda pay a determinado a no maipasangoak iti biag-wenno-patay a kasasaad, ikeddengkonto nga aramiden ti inaramidna.”

Kinuna ti surat ti maysa a 15-años a balasang a taga Maiden, North Carolina: “Kalpasan ti pannakabasak ti maipapan iti panagsagaba ni Wyndham ken ti panagtalekna ken Jehova agingga ken patay, nagsangitak. Inusigko ti kaunggan a rikriknak, ‘No addaak iti sidong dagita a kasasaad, itaklinkonto aya ti biagko ken Jehova ken agtalekakto aya a naan-anay kenkuana a lagipennakto?’

“Namin-adu nga inulit-ulitko a binasa ti artikulo, ket inkeddengko a basaen dayta iti aniaman a tiempo a mariknak a naladingitak gapu iti daytoy mangirurumen a lubong. Makaparegta ti pammati ni Wyndham. Segseggaak ti pannakaam-ammokto kenkuana idiay inkari ni Jehova a baro a lubong.”

Insurat ti maysa pay a balasitang a taga Siudad ti Nueva York: “Kanayon a pampanunotek ti bagik nga adda iti kasasaad nga umasping ken Wyndham Cook ket ut-utobek no anianto met ti ibagak no kunaento ti doktorko a matayak no diak agpaiyalison iti dara. Kankanayon a mapatured ken mapabilegak kadagiti makaguyugoy nga ulidan, kas ken Wyndham, tapno aramidek ti amin a kabaelak iti panagserbi ken Jehova.”

Inlawlawag ti maysa nga agtutubo a taga Kent, Washington: “Innalak ti magasin idiay post office idi kalman ket inringpasko a binasa dayta sakbay a nagawidak. Inawagak ti adu a gagayyem iti kongregasion tapno basaenda ti artikulo. Ket iti dayta a rabii, inadalmi dayta iti panagadalmi iti pamilia.” Kas panangdakamatna iti epekto dayta kenkuana, kinunana: “Saan laeng a makaparegta ken makapabileg ti pammati dayta no di ket, iti edadko a 17, inawisnak a mangutob iti bagik no maitakderak met laeng ti kasta a pakasuotan.”

Insurat ti maysa a balasitang a taga North Berwick, Maine: “Maawatak ni Wyndham ta maysaak met a 15-años. Diak maiyebkas no kasano a ti panagibtur ken turedna tinignaynak a mangaramid iti amin a kabaelak iti panagserbi ken Jehova. No maaramidanna pay ti ad-adu tapno maay-ayona ni Jehova uray iti nakapsuten a kasasaadna, aniat’ gapu a diak met aramiden ti isuamin a kabaelak?

“Idi nalpasko a nabasa ti nagsayaat nga artikulo, napno ti lua dagiti matak. Nariknak a kasla am-ammokon ni Wyndham iti intero a panagbiagko. Kasta koma nga agpayso. Idin kinitak ti ladawanna ken dagiti nagannakna ket pinampanunotko ti panangsegseggak a makakitanto manen ti nagpintas nga isemna kalpasan ti panagungar inton isut’ saanen nga agsagaba iti aniaman nga ut-ot.”

Kayat nga ipakaammo ti maysa a 15-años kadagiti nagannak ni Wyndham no aniat’ makunana maipapan iti artikulo. Insuratna: “Ti tured ni Wyndham tinulongannak a makakita a masapul nga agsaganaak a mangitakder kadagiti patpatiek. Mabalin a maipasangoak iti kasta a kasasaad iti aniaman a kanito. Tartarigagayak a no dumtengto ti tiempo a kasapulan nga itakderakon ti patpatiek, natured ken determinadoakto a kas ken ni Wyndham iti panangsurot iti kunaen ti Biblia.

“Diak pulos am-ammo ni Wyndham, a masiguradok a maysa a pukaw, ngem kumitkitaak iti pannakiam-ammokto kenkuana iti masanguanan inton adtoyen ti baro a lubong. Pinaregtanak ti pakasaritaanna a mangaramid iti isuamin a kabaelak iti panagserbi ken Jehova ken aramiden dayta agingga iti panungpalan.”

Makapabileg-Pammati kadagiti Isuamin

Inlawlawag ti maysa a naganak a taga Newark, New Jersey: “Maysaakon a Saksi ni Jehova iti 22 a tawtawenen ngem timmabtabunoakon kadagiti gimong sakbay pay dayta. Regular a basbasaek amin a magasinko, ngem awan pay ti nabasak nga ad-adda a makatukay ken makaparegta ngem ti kapadasan ni Wyndham Cook.

“Ita maitultuloyko laeng a tungpalen ti inted-Dios nga annongek kas maysa a naganak babaen ti panangtulongko iti sangapulo-tawenna a balasitangko a mangpabileg iti takderna ken mangidepensa iti pammatina a kas ti inaramid ni Wyndham. Uray no ti isyu ket maipapan iti dara, droga, sekso, wenno aniaman kadagiti bisio nga ipaay ni Satanas kadatay amin, nangnangruna kadagiti agtutubotayo, masapul nga itultuloytayo ti agtalinaed a natibker babaen iti panangpabileg iti pammatitayo.”

Inyebkas ti maysa a Saksi a taga Cadiz, Kentucky ti umasping a rikrikna babaen ti panagsuratna: “Maysa daytoy kadagiti makatukay unay nga artikulo a nabasakon. Ni Wyndham ket nagsayaat unay a paguadan a tuladen dagiti amin nga agtutubo. Nagsangitak bayat a binasak ti nagbanagan daytoy a naimbag nga agtutubo a Saksi. Naamirisko nga amintayo, agtutubo man ken nataengan, masapul a tuladentayo ti natured a takderna. Ti ulidan ni Wyndham tinignaynak a mangusig manen iti bagik. Nagutugotak a sigagaget a mangikagumaan nga agserbi a naimpusuan ken Jehova, a kankanayon nga agbalinak a mapagulidanan, a kas ken Wyndham, iti panangsantipikar ti nagan ni Jehova.”

Insurat ti maysa pay a Saksi a taga Palm Springs, California: “Daytoy nga artikulo ti nangnangruna a nangtukay iti pusok. Lima ti annakko, ket mangin-inanama ken ikarkararagko a no maipasangodanto iti kastoy a kita ti pakasuotan, maaddaandanto iti kinabileg ti pammati a kas ken ni Wyndham. . . . Ni Wyndham ket maysa a nagsayaat nga ulidan kadagiti agtutubotayo.”

Ti pudno a pammati isut’ natalged a panangpadpadaan iti bambanag nga in-inanamaen nupay saan a nakita wenno napadasan ti maysa dagitoy a banag. (Hebreo 11:1) Namati ni Wyndham iti baro a lubong ti Dios ken ti panagungar dagiti natay gapu iti umiso a pannakaammo iti karkari ti Biblia. (Aramid 24:15; 2 Pedro 3:13; Apocalipsis 21:3, 4) Ti kasta a pammati, a naipakita uray no naipasango ken patay, ket pudno a makapabileg iti sangalubongan a panagkakabsat.—1 Pedro 5:9.