Naraniag a Masakbayan dagiti Ubbing

IDIAY World Summit for Children, adu a pangulo ti lubong ti nagsao a buyogen ti panagtalek iti masanguanan. Impadtoda ti “maysa a baro a panawen” agpaay kadagiti ubbing, “maysa a baro a panangtaming kadagiti kasapulan iti ubing.” Sinaritada iti “‘maysa a baro a panagkaykaysa’ a ‘mangtignay iti nagkaykaysa ken naikeddeng a panagtutunos ti lubong’” a tumulong kadagiti ubbing.

Dagidiay ket natan-ok a sasao. Ngem makitanto pay laeng no anianto ti maaramidan dagiti nasion iti panangibanagda kadagiti kalatda. Napateg a maammuan nga iti las-ud ti lima a bulan kalpasan ti summit, nagdadangadang dagiti nasion iti Persian Gulf, maysa a gubat a napaneknekan a maysa kadagiti kanginaan—$61 bilion—ken ad-adda a makadadael iti aglawlaw. Kalpasan dayta ginasut a ribo kadagiti tao idiay Iraq ken Kuwait ti napapanaw. Rinibo ti natay—iti maysa a tiempo ginasut a tattao iti inaldaw—manipud iti panagbisin, pannakaisarang kadagiti elemento, malnutrision, ken sakit. Agarup 8 iti 10 ti babbai ken ubbing.

Naipadto dagiti Ay-ay

Pagaammo dagiti estudiante iti Sao ti Dios a dagiti parikut a mangsapsaplit kadagiti ubbing iti lubong ket naipadto dandani dua a ribo a tawen ti napalabasen. Nagipadto ti Biblia maipapan dagitoy a “maudi nga al-aldaw”:

◻ “Addanto . . . baybayangubong.”—Lucas 21:11.

◻ “Addanto kinakurang ti taraon.”—Mateo 24:7.

◻ “[Dagiti tattao] dadaelenda ti daga.”—Apocalipsis 11:18.

◻ “Ti maysa a nasion tumakderto a bumusor iti sabali a nasion ken pagarian a bumusor iti sabali a pagarian.”—Marcos 13:8.

◻ “Addanto dagiti napeggad a tiempo a narigat a pakilangenan. Ta dagiti tao agayatdanto iti bagbagida, . . . awananda iti ayat a nakayanakan.”—2 Timoteo 3: 1-3.

Impadto met ti Biblia nga asidegen a dumteng ti tiempo a pagarupento dagiti nasion nga umdasen ti ar-aramidenda a mangrisot kadagiti parikut ti sangatauan ta iwaragawagdanton: “Talna ken talged!”—1 Tesalonica 5:3.

Maysa a Naraniag a Masanguanan

Dayta a waragawag, nupay kasta, ket pudno a pagilasinan ti tiempo a makibiang ti Dios kadagiti aramid ti sangatauan. Babaen iti nailangitan a Pagarianna, ikkatento ti Dios daytoy agdama a sistema ti bambanag ket iserrekna ti maysa a baro a lubong iti pudno a talna ken manayon a kinatalged, agpaay kadagiti ubbing agraman dagiti nataengan.—Proverbio 2:21, 22; Daniel 2:44; Mateo 6:10.

Iti sidong ti nagsayaatan nga urnos ti Pagarian ti Dios, “awanto ti agnaed nga agkuna: ‘Masakitak.’” (Isaias 33:24) Mapalabaston ti malnutrision: “Addanto kinaruay ti bukel iti daga; iti tapaw dagiti bambantay iti bungada margaayandanto.’’ (Salmo 72:16) Awanto payen ti gubat, ta ikari ti Biblia: ‘Pasardengen [ni Jehova] dagiti gubat inggana iti ungto ti daga.”—Salmo 46:9.

Ngem dagiti ngay amin nga annak—ken dadduma—a natayen manipud iti malnutrision, sakit, wenno dadduma a makagapu? Kunaen ti napaltiingan a Sao ti Dios: “Addanto panagungar dagiti nalinteg ken dagiti nakillo.”—Aramid 24:15.

Idi adda ditoy daga, impakita ni Jesu-Kristo a ti panagungar iti biag ditoy daga iti baro a lubong ti Dios ket iramanna dagiti agtutubo. Kas pangarigan, idi natay ti maysa a balasitang nga agarup 12 ti tawenna, “agsangsangit amin dagiti tao ken dungdung-awanda.” Ngem, idi iniggamanna ti ima ti agtutubo, kinuna ni Jesus kenkuana: “Balasang, tumakderka!” Kuna ti historikal a salaysay: “Dagus a timmakder, ket imbilinna kadakuada nga ikkanda ti kanenna.” Aniat’ tignay dagiti dadakkelna? Ipadamag ti Biblia: “Ket nagsiddaawda ket dakkel unay ti ragsakda.”—Lucas 8:40-42, 49-56; Marcos 5:42.

Iti sabali nga okasion, nasabet ni Jesus ti maysa a prosesion ti pompon a nakairamanan ti maysa a balo a natay ti bugbugtong a barona. “Immasideg [ni Jesus] ket sinagidna ti idda ti natay, ket dagiti nagawit nagsardengda, ket kinunana: ‘Baro, kunak kenka, Bumangonka!’ Ket bimmangon daydi natay ket nangrugi a nagsao, ket inyawatna [ni Jesus] ken inana.” Dagidiay adda iti asideg “dinaydayawda ti Dios.”—Lucas 7:11-16.

Gapuna, iti sidong ti nalinteg a panagturay iti gobierno ti Pagarian ti Dios, dagiti ubbing, agraman dagidiay a mapagungar, maaddaandanto iti karaniagan pay laeng a masakbayan. Dumakkeldanto iti maysa a lubong ti kinalinteg ken talna a nakapimpintas, nakataltalged, nakarangrang-ay, ta maitutop ti panangawag ni Jesus iti dayta a “Paraiso.”—Lucas 23:43.

[Ladawan iti panid 9]

Iti baro a lubong ti Dios, dumakkelto dagiti ubbing a natalged, nasalun-at, ken naragsak