Agimtuod Dagiti Agtutubo . . .

Kasano a Maisardengko ti Aginum?

“Kanayon a saan a nasayaat ti riknak iti sumaganad nga aldaw, agpadpada iti panunot ken naespirituan!”​—Bob.

“Kanayon a mairamramanak iti riribuk idiay balay, eskuelaan, kadagiti gagayyem ken polis!”​—Jerome.

INAPIT nga agpadpada ni Bob ken Jerome ti nagbanagan ti nakaro ken masansan a panaginumda iti alkohol. Agpadpadada a nagbalin nga adikto iti alkohol. Ket bayat a nabaelan ni Bob nga isardeng a naminpinsan ti panaginumna, ikagkagumaan pay laeng ni Jerome a parmeken ti alkoholismo.

Ti pannakaadikto iti alkohol ket lumanlanlan a parikut dagiti agtutubo iti adu a paset ti lubong. Pattapattaen ti dadduma nga idiay Estados Unidos laeng, agarup a lima a milion nga agtutubo ti addaan iti nakaro a parikut iti panaginum. No maysakayo a Kristiano nga agtutubo, ngarud, awan duadua a pulos a diyo pinadas a rinamanan ti alkohol, nangnangruna no ti panaginum ti agtutubo ket maiparit iti komunidadyo. Nupay kasta, ti sumaganad nga impormasion pabilgenna ti pangngeddengyo a pulos a di padasen ti panaginum​—agingga a nataengankayton ken kabaelanyon a tamingen dayta. Ngem no dakayo ket adikton iti alkohol, namnamaenmi a daytoy nga impormasion ti tumulong kadakayo a mangparmek iti daytoy a parikut. Buyogen iti panagregget iti biangyo ken ti tulong ni Jehova a Dios, mabalin a maparmekyo dayta.

Panangparmek iti Panangilibak

Ti kangrunaan ken karikutan nga addang a masapul nga alaenyo isut’ panangparmek iti panangilibak. Gagangay a di patien dagiti alkoholiko nga addaanda iti parikut iti panaginum. ‘Kabaelak a tamingen dayta,’ nakapimpiman nga ipagpannakkel ti alkoholiko. Usigenyo, kas pangarigan, ti maysa a 15 años a nagkuna: “Awan ti parikutko iti panaginum. Innem laeng a kahon ti beer ti kabaelak iti tunggal rabii.” Mapalagipantayo iti panangiladawan ti Biblia iti maysa a tao nga “al-aliogenna ti bagina kadagiti matana met laeng tapno ti kinadakesna dinto masukalan ken magura.”​—Salmo 36:2.

Wen, ti panangilibak ket makapapatay. Isu a no addaankay iti parikut iti panaginum, masapul nga aminenyo ti nasaem a kinapudno.a Diyo kagura dagiti gagayyem, kakabsat, wenno nagannakyo a mangibaga a nalabes unay ti panaginumyo. Saanyo ida a kabusor gapu ta ibagada kadakayo ti kinapudno. (Idiligyo ti Galacia 4:16.) Nalabes unay ti panaginum ni Bob (ti nadakamat iti pangrugian) iti tunggal ngudot’ lawas. Idi isut’ kinasao ti gayyemna maipapan iti dayta, di patien ni Bob nga adda parikutna iti panaginum, ket ginupedna ti saritaan. Ngem kasanot’ panangapektar ti alkohol iti biag ni Bob? Aminen ni Bob, “Maamak ken madanaganak unay no diak makainum ket diak matengngel ti bagik no nakainumak. Naapektaran ti biag ti pamiliak​—agraman ti relasionko iti Dios.”

Iti sabali a gundaway, saanen a nailibak ni Bob ti kasasaadna ket inaminna iti gayyemna a pudno a napalalot’ panagtarigagayna iti alkohol. Idi insardengnan ti panangilibakna, nabaelan ni Bob a pinarmek dayta.

Pabilgenyo ti Determinasionyo a Sumardeng

Kuna ni propesor George Vaillant a ti “alkoholismo ket . . . nalaka a maparmek, ngem . . . sapulenna ti dakkel a panagregget iti biang ti pasiente.” Masapul a determinadokayo a mangisardeng iti panaginumyo iti alkohol. No awan dayta a pangngeddeng mabalin nga agbiag​—ken matay[kayo]​—​kas maysa nga alkoholiko. Aniat’ makatulong? Ti panangipamaysa iti panangdangran ti alkoholismo tulongannakay a ‘manggura ti dakes’ ken pabilgenna ti pangngeddengyo nga isardeng ti panaginum iti maminpinsan.​—Salmo 97:10.

Kas pangarigan, nasayaat no kanayon a panunotenyo ti adu a pagdaksan nga ibunga ti alkoholismo iti bagi, panunot, ken kababalin. Ipapantayon, ti maminsan a panaginum tulongannakay a manglipat iti apagkanito ti saem wenno rikrikna iti kinaawan pateg. Ngem inton agbaybayag, ti panagpannuray iti alkohol ad-adda a parnuayenna ti ad-adu a parikut; maputed ti panaggagayyem, ken dagiti relasion iti pamilia ket madangran. Kasta met, gapu ta kissayan ti alkohol ti panangtengngelyo iti bagiyo, ikkaten a dagus dayta ti “nasayaat a pannakaawat” ket iturongnakayo iti dakes a kababalin.​—Oseas 4:11.

Usigenyo met, ti maaramidan ti nalabes nga alkohol iti bagiyo, in-inut a sabidonganna dagiti kangrunaan a paset ti bagiyo. Gapu iti dayta, kunaen ti Biblia a ti nalabes a panaginum saan laeng nga agbanag iti ‘ladingit, panagbabawi, ringringgor, danag, ken sugsugat.’ (Proverbio 23:29-30, The New English Bible) Adda kadi maganabyo iti apagkanito a ragsak a magun-odanyo?

Makatulong met no palagipanyo ti bagiyo a saanyo a kasapulan ti alkohol tapno agbalinkayo a naragsak. Wenno masapul a mariknayo ti artipisial a kinaragsak tapno maaddaan ti panagraem iti bagi, naimbag a salun-at, matalek a gagayyem, ken nadungngo a pamilia. Ti panagballigi kadagitoy a benneg ti biag ket agtaud iti panangiyaplikar iti Sao ti Dios. (Salmo 1:1-3) Dayta a Sao ikkannakay met ti namnama iti maysa a narimat a masanguanan​—agnanayon a biag nga awanan sakit ti nakem ken bagi! (Apocalipsis 21:3, 4) Ti kaadda dayta nga inanama itdenna kadakayo ti sabali pay a rason nga umadayo iti alkohol.​—Idiligyo ti 1 Corinto 6:9, 10.

Agpatulongkayo

Nupay kasta, saan nga umdas ti kaadda ti tarigagay a mangparmek iti dayta. Kasapulanyo met ti pannaranay ken tulong dagiti sabsabali. “Naim-imbag ti dua ngem iti maysa,” kinuna ni Ari Solomon. “Ta no matuang ti maysa kadakuada, mabangon ti maysa ti kaduana.” (Eclesiastes 4:9, 10) Saan a nalaka ti agtalek iti maysa a tumulong iti parikutyo. Ngem ibalakad ti maysa a mangparparmek iti panaginumna a ni Katy: “Adalenyo ti agtalek iti tattao, nangnangruna iti pamiliayo.” Wen, iti kaaduan a kasasaad, ti pamiliayo ti kasayaatan a mangipaay iti ayat ken badang a kasapulanyo.

Pudno, mabalin a ti kasasaad ti pamiliayo ti nangiduron kadakayo nga uminom idi damo. Ngem no napakaammuan dagiti nagannakyo iti adda a kasasaadyo, saan ngata a siguruenda a mapasayaat dagiti bambanag iti pagtaenganyo? Apay a diyo padasen a kasarita dagiti nagannakyo, nga ipakaammo kadakuada ti nakaro unay a parikutyo? Imbes a pabasolen lattan ida, kiddawenyo ti tulong ken pannaranayda. Ti panagbalin a napudno kadagiti nagannakyo ti tumulong iti pamiliayo nga agbalin a “natunos” a kas iti sangakabbalayan ti Dios. (Efeso 4:16) Iti daytoy a pamay-an, mairugiyo ti sangsangkamaysa a panagregget a mangparmek a sibaballigi.

No saan a magun-odan ti tulong ti pamiliayo, mabalin a makatulong ti dadduma.b (Proverbio 17:17) Ni Bob ket ginayyem ti maysa a panglakayen a Kristiano a nakisinsinnarak kenkuana iti tunggal lawas iti las-ud ti sumagmamano a bulan tapno aywanan ti irarang-ayna. Kunaen ni Bob: “Ti pannakaseknan ken panangaywanna ti nangipaay kaniak iti panangipateg iti bagi a kasapulak tapno maisardengko ti bisiok a panagabuso.”​—Santiago 5:13, 14.

Kangrunaan iti amin, bigbigenyo a kasapulanyo ti tulong ni Jehova a Dios. Kiddawenyo ti badangna a pabilgennakayo. Wen, babaen iti tulong ti Dios, marikna dagiti “nadanar ti pusoda” ti ‘panangpaimbag ken panangbedbed [ni Jehova] kadagiti naut-ot a sugatda.’​—Salmo 147:3; kitaenyo met ti Salmo 145:14.

Sapulenyo Dagiti Kabbaro a Gagayyem

Ipadamag ti maysa a surbey idiay New Zealand a dagiti gagayyem ti kangrunaan a nangimpluensia kadagiti agtutubo nga uminom. Masarakanyo ngarud a narigat nga isardeng ti panaginumyo no makikuyogkayo kadagiti managinum. Gapu iti daytoy, ibalakad ti Biblia: “Dika makitipon kadagiti managinum.” (Proverbio 23:20) Birukenyo dagiti kabbaro, makapabileg a gagayyem. No kasano a pudno a “dagiti dakes a pannakikuyog dadaelenda dagiti nasayaat a kababalin,” dagiti nasayaat a kakadua ket naimbagda nga impluensia.​—1 Corinto 15:33.

Natakuatan ni Kim a pudno daytoy. “Nakababain,” aminenna, “ngem masapul a sukatak dagiti gagayyemko . . . Diak kayat ti makilanglang iti alkohol wenno droga.” Pudno unay, narigat a masarakan dagiti gagayyem a saan a managinum. Nupay kasta, masarakanyo a dagiti mapaguadan nga agtutubo kadagiti Saksi ni Jehova ket saanda a nalabes a managinum. Saanda met nga agpannuray iti alkohol kas gubuayan ti panagragragsak wenno pananglipat iti parikut. Makatulongda ngarud​—saan a manglapped​—iti panagreggetyo nga “uksoben ti daan a kinatao ken dagiti aramidna.”​—Colosas 3:9.

Mabalinyo ti Umimbag!

Makidangadangkayto iti biag nga awan ti alkohol. Masansan a marigatankayto a mangliklik iti dayta. “Adda pay laeng tarigagayko nga uminom iti adu,” inamin ni Ana, “nangnangruna no makaunget, napaay, naliday wenno nasaktanak.” Kadawyan ngarud kadagiti agpapaimbag nga alkoholiko ti uminom manen, a mangiparikna iti pannakabasol. No mapasamak man dayta, laglagipenyo a “maitibkoltay amin iti adu a bambanag.” (Santiago 3:2) Kanayon met a panunotenyo a ni Jehova ket naasi a Dios a makaawat kadagiti pagkapuyanyo.​—Salmo 103:14.

Ngem, agannadkayo a diyo abusuen ti kinamanangaasi ti Dios. Makaadalkayo manipud iti kamaliyo, ket agbalinkayo nga ad-adda a determinado a saanen nga agkamali. Gapu iti kasta unay a determinasion, nabaelan ni Bob nga insardeng ti panaginumna. Sipud idin, tinagiragsakna ti natalna a pannakirelasion iti pamiliana ken iti Dios. Ti naragsak a biagna ita iramanna ti panagserbi kas maysa nga amin-tiempo a ministro. Maaddaankay met iti kinaragsak ken natalinaay a panunot no agballigikayo a makidangadang maibusor iti alkohol.

[Dagiti Footnote]

[Ladawan iti panid 16]

Masansan nga ilibak dagiti agtutubo nga alkoholiko nga addaanda iti parikut