Panagadal iti Pagtaengan—Agpaay Aya Kadakayo?
“MAYSA a kaugalian a naiduma a nagbalinen nga ugali ti nasion.” Kastat’ nabiit pay a panangdeskribir ti magasin a Time iti panagadal iti pagtaengan idiay Estados Unidos—ti kumarkaro a pagannayasan nga itantandudo dagiti nagannak a mamati a ti kasayaatan nga edukasion a maawat ti ubing magun-odanna iti mismo a kuartona, saan nga iti gagangay a kuarto a pagadalan.
Kaskasdi a matmatan pay laeng dagiti dadduma kas naiduma wenno kabarbaro ken naiduma unay, ti panagadal iti pagtaengan, nupay kasta, umad-adu dagiti manangitandudona iti tinawen. Kunaen dagiti managsirarak nga immadu ti bilang dagiti agad-adal iti pagtaengan manipud 15,000 idi 1970 agingga iti 500,000 idi 1990. Dadduma a mangitantandudo ti panagadal iti pagtaengan kunaenda a nasurok a maysa a milion a pamilia idiay Estados Unidos ti mangpapaadalen kadagiti annakda idiay pagtaengan.
Rimsua met dagiti grupo a mangsarsaranay kadagiti agad-adal iti pagtaengan idiay Australia, Canada, Inglatera, Alemania, Japan, ken New Zealand, a mangipamatmat a ti panaginteres iti panagadal iti pagtaengan ket agsaksaknap iti aglawlaw ti lubong.
Apay nga adu a nagannak ti mangikedkeddeng a mangisuro kadagiti annakda idiay pagtaengan? Kasano kaepektibo ti panagadal iti pagtaengan? Dayta kadit’ pili a napateg nga usigen ti pamiliayo?
Iti kangrunaan a panagpampanunot, ti panagadal iti pagtaengan saan a narikut a kas iti maipagarup. “Ti pagtaengan, saan a ti eskuelaan, ti immuna a sistema ti panagadal,” kuna da Raymond ken Dorothy Moore iti libroda a Home-Spun Schools. “Agingga iti maudi a siglo, kaaduan nga ubbing a nageskuela ti nangrugi idi agtawenda iti 12 wenno natataengan pay.”
Dagiti mabigbigbig a tao a kas kada George Washington, Abraham Lincoln, Thomas Jefferson, Thomas Edison, ken Albert Einstein ket nagadalda iti pagtaengan. Kinapudnona, dagiti kapilitan a linteg ti panagatender iti eskuelaan saan a naiyam-ammo idiay Estados Unidos agingga iti naladawen a maika-19 a siglo. Gapuna, sigun iti autor ken naganak a nagadal iti pagtaengan a ni Kerri Bennet Williamson, ti panagadal iti pagtaengan saan laeng a nabiit pay nga uso, no di ket ‘‘kadawyan a pamay-an ti edukasion.’’ Wen, ti panagadal iti pagtaengan maysa a nabayagen nga ugali ti kaaduan a tao idi panawen ti Biblia.
Apay Aramidenda Dayta
Makapainteres, pattapattaen ti National Catholic Reporter a manipud 50 agingga iti 90 porsiento kadagiti nagannak iti E.U. a mangpaadal [kadagiti annakda] iti pagtaengan ti mangaramid iti dayta gapu iti narelihiusuan a panggep. Maseknan a nangnangruna dagitoy a nagannak iti panangsalaknibda kadagiti annakda kadagiti mabigbigda nga ateistiko nga impluensia kadagiti eskuelaan. “Ti mangpabpabileg iti kapanunotan a panagadal iti pagtaengan isu ti komunidad a Christian Fundamentalist, isu a mamati a ti relihion ket maabuso wenno di maikankano iti kuarto a pagadalan,” kinuna ti magasin a Time.
Inikkat dagiti dadduma a nagannak dagiti annakda manipud kadagiti eskuelaan publiko tapno salakniban ida manipud iti pannakaisarang kadagiti makadangran iti kababalin nga impluensia no ubbingda pay. “Gapu iti imoralidad idiay eskuelaan saanen a magawidan ti kasasaad,” kinuna ti maysa a Kristiano a lalaki a nangikeddeng sumagmamano a tawenen a napalabas nga isuda nga agassawa pagadalenda dagiti annakda idiay pagtaengan. “Maseknankami kadagiti annakmi ken kadagiti dakes a kasasaad idiay eskuelaan.”
No dadduma, pilien dagiti nagannak ti panagadal idiay pagtaengan gapu iti edukasion saan a gapu kadagiti prinsipio. Naumadan kadagiti napusek a klase, nababa a kasasaad ti panangisuro, ken dagiti parikut iti kinatalged a nasaknap kadagiti eskuelaan publiko. Gaput’ maupayda iti masansan a di makaawis a resulta ti panangisuro idiay eskuelaan, patienda nga ad-adda a matulonganda dagiti annakda no direkta nga iyadalanda dagiti annakda iti pagtaengan.
Iti panangilawlawag no apay a dadduma kaykayatda ti panagadal iti pagtaengan, kuna ti libro nga Home Schools: An Alternative: “Dagiti nagannak [a mangiyadal kadagiti annakda idiay pagtaengan] 100% a makiramanda kadagiti annakda . . . Maipamaysada ti panangaywanda iti panagadal dagiti annakda.”
Epektibo Aya Dayta?
Kunaen dagidiay mangitandudo iti panagadal iti pagtaengan nga ad-adda a makasursuro dagiti ubbing idiay pagtaengan agsipud ta mainaig ti leksion iti tunggal aspeto ti inaldaw nga aramid ti pamilia. “Adu a pamilia ti mangrugi iti libro ti matematika, ngem kalpasanna maammuanda a maadal dagiti leksion kadagiti inaldaw a kapadasan,” kuna ni Jane A. Avner iti School Library Journal. “Ti panaggatang ken panagkuenta ti kuarta idiay banko, kas pangarigan, tulonganna dagiti estudianteda a makaawat iti panangtengngel iti kuarta, ket ti panagtarimaan idiay pagtaengan maysa a nagsayaatan a libro iti matematika.”
Kasanot’ kaepektibo ti panagadal iti pagtaengan? Dadduma a panagadal impakitadan a dagiti nagadal iti pagtaengan kaaduanna makagun-odda iti marka a kapada wenno nangatngato ngem ti promedio ti nasion kadagiti pangkaaduan a panangsubok ti kinasigo wenno pannakaammo. Ngem dagita a resulta dina paneknekan a nalalaing dagidiay nagadal iti pagtaengan ngem dagiti ubbing a nagadal kadagiti gagangay nga eskuelaan.
“Awan pay ti napaneknekan ti agdama nga ebidensia,” kuna ti libro a The Home School Manual. “Ti kangrunaan a parikut kadagitoy amin a panagadal ket dagiti iskor ti kaaduan nga agad-adal iti pagtaengan saan a magun-odan dagiti managsirarak.”
“Awan a talaga ti pangibatayan a pammaneknek a magun-odan” a nasaysayaat ti panagadal iti pagtaengan, kuna ti The Home School Manual. “Nupay gagangay a nasayaat ti maaramidan dagiti agad-adal iti pagtaengan, ti umiso a programa ti panagsirarak masapul nga ipakitana a ti aniaman a nagdumaan ket saan a gapu kadagiti dadduma a banag.”
Adu Pay Laeng ti Agduadua
Adda met dagiti kritiko ti panagadal iti pagtaengan. Inyebkasen ti adu nga opisial ti eskuelaan ti pannakaseknanda iti di agtutunos a kualidad iti edukasion nga ipapaay ti panangikagumaan a mangiyadal iti pagtaengan. Kastoy ti kunaen ti magasin a Time: “Dagiti nasayaat a panggep saan nga automatiko nga agbanag iti makagunggona nga edukasion.”
Gapu iti dayta saan a makitinnulong dagiti dadduma a distrito ti eskuelaan, wenno marurodda pay no ipakaammo dagiti nagannak ti planoda a mangisuro a mismo kadagiti annakda. Nupay no inkagumaan ti dadduma a distrito ti eskuelaan kadagiti kallabes a tawen ti nakitinnulong a naimbag kadagidiay a nangikagumaan a mangiyadal [kadagiti annakda] iti pagtaengan, agduadua ti dadduma nga autoridad ti edukasion. Agpadpada ti National
Association of Elementary School Principals ken ti National Education Association (NEA) a natibker ti panangbusorda iti panagadal iti pagtaengan, ta maamakda a dadduma a nagannak mabalin a dida kabaelan ti mangipaay iti maitutop nga edukasion iti pagtaengan. Sigun iti kunaen ti opisial a sasaaden ti NEA’s, “dagiti programa ti panagadal iti pagtaengan dida maipaay dagiti isuamin a kasapulan nga adalen.”
Kunaen dagiti mangitantandudo iti panagadal iti pagtaengan a di kasapulan dagiti nagannak ti adal iti kolehio tapno agbalinda a naimbag a mannursuro. “Saan a masapul nga ammuen dagiti nagannak dagiti amin a sungbat tapno maparegtada dagiti annakda a mangbiruk ti sungbat dagiti saludsodda met laeng,” kuna ti libro a Home Schooling—Answering Questions. Maiturong dagiti ubbing kadagiti umiso a gubuayan ti sungbat. Agkadua dagiti nagannak ken annak nga agsuro. Ket no kasapulan ti nasaksakbay a panagsanay wenno kinasigo, mabalin ti mangtangdan kadagiti pribado a mangisuro iti paset tiempo.
Kunaen met dagiti kritiko a maiputputong ken awan ti pannakilangen dagiti ubbing nga agadal iti pagtaengan kadagiti kapatadada. Daytoy manen ti maysa a pangngeddeng a di awaten dagiti manangitandudo. “Dagitoy nga ubbing saanda a maiputputong,” kinuna ni Brian Ray, direktor ti National Home Education Research Institute. “Gagangay nga adda panagpasiar dagiti agad-adal iti pagtaengan kadagiti zoo wenno museo ti arte. Agay-ayamda iti sangakaarrubaan a kas met kadagiti dadduma nga ubbing. Saan nga agpayso ti pagarup a maiputputongda iti kagimongan manipud alas otso iti bigat agingga iti alas dies iti rabii.”
Agpaay Aya Kadakayo?
Sapulen ti panagadal iti pagtaengan, “saan laeng a ti tured, no di ket ti kired, panagimbento, ken ti kanayon a panagregget,” kuna ti Christianity Today. Gapuna no pampanunotenyo ti agadal iti pagtaengan, panunotenyo a naimbag ti nairaman a rebbengenyo. Masapul ti kinapasnek ken nasayaat nga organisasion tapno matamingyo dagiti trabahoyo iti balay ken dagiti dadduma a rebbengen ti pamilia malaksid ti panangipaay iti inaldaw a panangisuro kadagiti ubbing. “Mabalin a nabannogkayon ta kayatyon ti sumardeng,” kinuna ni Ray. “Adut’ busbosenna a tiempo.”
Sumaganad, ammuenyo dagiti linteg ti panagadal iti pagtaengan iti lugaryo. Kas pangarigan, idiay Estados Unidos, legal ti panagadal iti pagtaengan kadagiti amin a 50 nga estado, ngem nagduduma dagiti paglintegan. Kadagiti dadduma a lugar, ti panangisuro iti anakyo iti pagtaengan kaipapananna ti basta panangipakaammo iti superintendente ti eskuelaan iti lugaryo ken ti panangsurat ti maysa-panid a porma. Iti dadduma nga estado, masapul a ti nagannak ket mabigbig a mannursuro a makabael a mangisuro iti pagtaengan. Ikeddengyo no ania ti paglintegan iti lugaryo tapno masurotyo amin dagiti kasapulan ti linteg.
Kalpasanna, usigenyo ti magasto. Ti panaggatang kadagiti alikamen a mangisuro mangipaay iti kadakkelan a karit iti panagadal iti pagtaengan—nangnangruna no limitado ti gastosen. “Nalakakay laeng nga agbalin a biktima dagiti mangipapaay kadagiti kasapulan iti edukasion,” ipakdaar ti A Survivor’s Guide to Home Schooling.
Nupay nalaka laeng ti matrikula a singiren dagiti dadduma a suplayer, dadduma a programa ti panagadal iti pagtaengan ti aggatad iti ginasut a doliar. Dagiti pangkaaduan a panangsubok, a masapul nga alaen dagiti agad-adal iti pagtaengan iti tinawen kadagiti dadduma nga estado, aggatadda agingga iti $50 ti tunggal maysa. Tinawen a kasapulan dagiti baro a libro, work booklet, ken dagiti dadduma a material, gapuna masapul ti nasayaat ti pannakaiplanona a badyet ti panagadal iti pagtaengan.
Siempre, saan a situtulok wenno kabaelan dagiti amin a nagannak ti mangbusbos iti tiempo, bannog, ken kuarta a kunaen dagiti eksperto a kasapulan tapno agballigi ti panagadal iti pagtaengan. “Ti panagadal iti pagtaengan saan nga agpaay iti tunggal maysa,” kinuna ti maysa a 14-años a balasitang a nangrugi a nagadal iti pagtaengan idi agedad iti 7. “Masapul ti umiso a kasasaad, ti umiso a kababalin, ken dagiti nagannak nga agregget iti panagadal iti pagtaengan.” Ti panangdisiplina ti naganak ken ubing iti bagida mabalin met nga inayon iti listaan. Kinuna ti lalaki a naadaw nga immuna a tapno agballigi ti panagadal iti pagtaengan, “masapul ti kinapasnek.” Kinunana pay: “Ti pudno a karit isut’ panangipaay iti tiempo nga agadal ken mangituloy iti dayta.”
Aminen uray pay dagiti napasnek a manangsuportar iti edukasion iti pagtaengan a no dadduma saan nga epektibo wenno saan pay ketdi a nasayaat ti pannakaaramid ti panagadal idiay pagtaengan. Kinapudnona, tunggal tawen adda dagiti dadduma a mapaay a panangikagumaan iti panagadal iti pagtaengan, a mangibati kadagiti ubbing a saan a sisasagana a mangsaranget kadagiti karit nga agadal.
Kasta met, saan koma a maallilaw dagiti nagannak a mangpanunot a ti panagadal iti pagtaengan laeng ti mangsalaknib kadagiti annakda kadagiti imoral nga impluensia dagiti eskuelaan publiko. Awan asinoman a naan-anay a masalakniban iti pannakilangen iti lubong. Adu a banag a di masarakan iti gagangay a panageskuela ti mangsukog iti panagpampanunot ti ubing, agraman ti ulidan ti nagannak, pannakilangen, panaglinglingay, ken personal a panagadal ken panagadal ti pamilia iti Biblia. No awan ti napasnek a panagsanay kadagitoy amin, awan ti sistema ti edukasion a makapagballigi a mangpadakkel kadagiti Kristiano nga annak.
Pudno a marikna ti dadduma a nagannak a nakaipaayen ti panagadal iti pagtaengan ti naespirituan nga irarang-ay dagiti annakda. Ngem di rebbeng a liplipatan nga adu a Kristiano nga agtutubo nga agad-adal kadagiti eskuelaan publiko ti nagsayaatan met ti naespirituan nga irarang-ayda. Kadagiti adu a kaso, nasayaat ti resulta no makipagtrabaho a naimbag dagiti nagannak kadagiti distrito ti eskuelaan iti lugarda tapno maipasigurado a dagiti annakda makagun-odda iti nasayaat nga edukasion.
Dagiti nagannak, a makinbiang iti pannakaipaay ti umiso nga edukasion ken pannakasanay dagiti annakda, masapul nga ikeddengda a mismo ti kita ti panagadal a mariknada a makagunggona a naimbag iti pamiliada. Gapuna tingitingen a naimbag dagiti bambanag sakbay nga ikeddengyo no sisasaganakayo a mangibaklay iti karit a panangisuro kadagiti annakyo iti pagtaengan.
[Blurb iti panid 12]
“Dagiti ubbing masapul nga adda eskediolda nga oras nga agadal a kas met laeng idiay eskuelaan.”—C. F. L., naganak a nangisuro iti anakna a babai idiay pagtaengan
[Dagiti ladawan iti panid 10]
Dakayo laeng ti makaikeddeng no ania ti kasayaatan para iti anakyo—panagadal iti eskuelaan publiko wenno iti pagtaengan