Aglagto a Musiko Dagiti Insekto
AKLONENMI a narawetkami a parsua. Ket wen, ti kinarawetmi ti mamagpungtot kadagiti mannalon a mangibilang kadakami a peste a mangdadael kadagiti mulada. Nupay kasta, dakami a dudon ket addaan kadagiti makaallukoy a saguday—no kasano ti panaglagto, panagtayab, panagkalay-at, ken panangpatokarmi iti “musika.”
Kas pangarigan, ammoyo kadin a lima ti matami? Imbes a dua a kas kadagiti tao, adda tallo a bassiusit a matami iti makinsango a paset ti ulomi agpaay iti napatak a panagkita. Dadakkel ti dua pay ket naisaadda iti likudan ti ulomi, a makatulong kadakami a mangkita iti mapaspasamak iti aglawlawmi. Daytat’ nangatiwanmi kadakayo. Saan kadi a kayatyo ti maaddaan iti mata a kastat’ maaramidanna?
Kasanot’ kalaingmi nga aglagto? Malagtomi ti maminsangapulo ngem iti katayagmi ken agdisso iti [lugar a] 0. 9 metro [ti kaadayona]. Tapno matulad dayta ti tao, masapul a lagtuenna ti maysa a patakder nga innem a kadsaaran ti kangatona. Ti sekretomi isu dagiti natibker a piskel iti kammaudi a sakami. Ikkandakam ti bileg nga aglagto iti kasta a kangato.
Uray pay kalpasan ti damo a panaglagtomi iti imatangyo, narigatdakam latta a matiliw gapu iti dua a paris a payakmi. Kas ti payak ti eroplano ti maaramidan ti natibker a makinngato a payakmi, kabayatan a ti naing-ingpis a makimbaba a payakmi ti mausar a mangpapartak iti panagtayabmi. Gapuna, no pagtiponen dagiti laingmi a lumagto ken agtayab, makatayabkam iti adayo unay a mangupay iti isusurotyo kadakami.
Marigatankay kadi nga agkalay-at iti nagalis a poste? Dakami ket saan. Kinapudnona, makalay-atmi ti nagalis a bulong ti ruot a dikam man la agalus-os gapu iti panangdisenio ti Namarsua iti innem a sakami. Addaan dagiti nakuttong a sakami iti napino a muldot a mangiruar iti napigket a pluido a tumulong iti natibker a panagkapetmi iti [aniaman] a banag. Kanayonanna pay, adda dua a natibker a kawwet ti tunggal sakami a manglapped iti panagalus-os no nagalis ti kalay-atenmi. Wen, sakbay pay a napanunot dagiti tao nga ulien ti bantay, nagsayaaten ti pannakakabalmi nga agkalay-at.
Dagiti kalakian iti pamiliami isuda ti musiko. Maay-ayo la unay dagiti kabáyan ket ibilangda ida a naparaburan. Wen, makangngeg ken maallingagmi ti nagduduma nga uni. Dagiti lapayagmi ket adda iti tunggal sikigan ti barukongmi. Gapuna, no agduyos ti riknana, siaannad nga itayag ti kalakian ti nalap-it a sakana a mangkalbit iti bimsog nga urat ti payak[na] a kas iti panangkalbit ti managtokar iti biolin kadagiti kuerdas ti instrumentona. Anian a makapabang-ar ti agaliwaksay kabayatan ti nadagaang a kalgaw babaen ti panagidda iti naruot a hardin ken denggen ti agdadanggay a panagtokar ti rinibo a dudon ken kuriat. Anian nga uni no panawen ti kalgaw!