Dagiti Saludsod Manipud Kadagiti Managbasa

◼ Dagiti anghel ket espiritu, awanan material a bagi, gapuna apay nga ipakitayo ida kadagiti ladladawan nga addaan payak? Maysa kadi daytoy a basta narelihiusuan a tradision?

Masansan nga iladawanmi dagiti anghel nga addaan payak gapu kadagiti simboliko a panangiladawan a masarakan idiay Biblia.

Umiso ti panangikunayo a dagiti naespirituan a parparsua awanandat’ material a bagi nga addaan literal a payak​—awananda uray rupa, dagiti ima, saka, ken dadduma a paset ti bagi. Kaskasdi, masansan, idi a nagparang dagiti anghel kadagiti ad-adipen ti Dios, mabalin a ti langada kas da la gagangay a tattao, ta isuda idi ti naipagarup a kasta.​—Genesis 18:2, 22; 19:1; Oc-ocom 6:11-22.

No dadduma, nupay kasta, dagiti tattao immawatda kadagiti sirmata dagiti anghel ken inladawanda ida. Ti propeta nga Ezequiel nakitana dagiti “uppat a parparsua a sibibiag,” ket iti naud-udi a sirmata, nabigbigna dagitoy kas dagiti anghel iti ranggo a maawagan kerubin. (Ezequiel 1:5; 9:3; 10:3) Tunggal maysa kadagitoy nga anghel addaan uppat a payak, a nangipakitat’ abilidadda nga agtungpal a sipapardas iti aniaman a direksion kadagiti bilbilin ti Dios. “Saanda nga aggaraw no magnada; agturong tunggal maysa iti turong ti rupana . . . Iti sadinoman a papanan koma ti espiritu, napanda. Ket awan ti panagbaw-ing ti pannagnada.”​—Ezequiel 1:6, 9, 12.

Ngem dagiti anghel a nakita kadagiti sirmata di kankanayon a kastat’ langada. Dagiti angheliko a parparsua a maawagan serapin a nakita ni Isaias addaandat’ innem a payak. (Isaias 6:1, 2) Ket addada pay panagduduma kadagiti sirmata ni Ezequiel. Idiay immuna, dagiti anghel addaandat’ saka, ima iti baba ti tunggal maysa kadagiti payak, ken uppat a rupa (kaasping ti rupa ti tao, leon, baka, ken agila). Iti maikadua a sirmatana, maysa kadagiti rupa ket kaasping ti rupa ti kerubin imbes a maysa a baka, mabalin a tapno ipakita ti naindaklan a pannakabalin dagiti kerubin. Iti mas naud-udi pay a sirmata iti ar-arkos ti simboliko a templo, nakakita ni Ezequiel kadagiti kerubin nga addaan laeng dua a rupa, maysa iti tao ket ti sabali iti leon. (Ezequiel 1:5-11; 10:7-17; 41:18, 19) Idiay Kasasantuan iti tabernakulo, kasta met ti templo a binangon ni Salomon idiay Jerusalem, addada dagiti kerubin nga addaan dua a payak. Dagitoy naikabilda iti rabaw ti balitok nga abbong ti lakasa a maawagan lakasa ti tulag. Dagiti dua a balitok a kerubin nagsinnangoda, ket agpadpada nga addaandat’ dua a payak a naiyukrad a nanglinong iti lakasa. (Exodo 25:10-22; 37:6-9) Iti ngato ti Lakasa (ken ti abbongna) idiay templo ni Salomon nagtakder ti dua a dakdakkel pay a kerubin a nakalupkopan ti balitok, a tunggal maysa addaan dua a naiyukrad a payak.​—1 Ar-ari 8:6-8; 1 Cronicas 28:18; 2 Cronicas 5:7, 8.

Insurat ni Josephus: “No kadagidiay a kerubin met laeng, awan makaibaga wenno makailadawan no ania ti langada.” Gapuna, dadduma nga iskolar ken managipinta imbatayda ti panangiladawanda kadagiti anghel (kangrunaanna dagiti kerubin) kadagiti maaw-awagan kadaanan a Near Eastern nga orihinal a padron a modelo dagiti didiosen iti langa dagiti nagpayak nga an-animal. Ngem ti mas mapagtalkan a giya isut’ komento ni Ezequiel a dagidiay a nakitana ket “kaasping ti tao.” (Ezequiel 1:5) Gapuna no maiyilustrar dagiti nailangitan nga anghel kadagiti publikasiontayo, iti pangkaaduan iladawanmi ida a talaga a natauan ti langada. Ipakitami ida nga addaan kadagiti payak agsipud kadagiti nakaad-adu a panangiladawan ti Biblia kadagiti nagduduma nga anghel kas addaan kadagiti payak ken agsipud kadagiti komento maipapan kadagiti anghel a “tumaytayab.”​—Apocalipsis 14:6; Salmo 18:10.

Kamaudiananna, ti panid 288 iti Apocalipsis​—Ti Grande a Tampokna Asidegen! iladawanna ti maysa a nailangitan a parsua nga addaan payak, nga addaan korona iti ulona ken tulbek iti imana. Daytoy maysa a grapiko a representasion ti Apocalipsis 20:1: “Ket nakitak ti maysa nga anghel a bumaba nanipud langit nga adda kenkuana daydi tulbek ti mangliwengliweng nga abut ken ti maysa a dakkel a kawar iti imana.” Maawatantayo a daytoy anghel nga addaan tulbek ket isu ti naipadayagen a Jesu-Kristo. Isut’ ipakpakita ti ilustrasion nga addaan kadagiti payak tapno maitunos iti kinapudno a dagiti anghel a nakita kadagiti sirmata ket gagangay nga addaandat’ payak.