Agas ti Isip ken Bagi

IPAKITA dagiti panagsirarak a makapainana ti napaut a panagkatawa ken makapasalun-at iti isip ken bagi. Dayta “saanna laeng a bang-aran ti rigat, no di ket paaduenna met ti gundaway a makalasat iti nakaro a sakit,” kuna ti magasin a Your Better Health. Daytat’ kas iti “makapasalun-at nga arsisio dagiti lalaem.” Ipalgak dagiti panangsubok a ti napaut a panagkatawa pabassitenna ti sakit ken nagsayaatan a pisikal nga arsisio ti puso. Sumayaat ti sirkulasion, maarsisio ti diaprama, ket umadu ti oksihena iti dara. Ti barukong, tengnged, rupa, ken dagiti piskel ti kudil ti ulo maarsisioda met agraman dagiti piskel ti mata a mangiruar iti lua.

Impadamag ti Journal of the American Medical Association ti maysa a panagadal a “nangisingasing a ti programa ti panangagas a panagangaw parang-ayenna ti kasasaad ti biag dagiti pasiente nga addaan kadagiti nakaro a sakit ket ti panagkatawa addaan ti dagus a makabang-ar nga epekto kadagitoy a pasiente.” Dagiti nagbanagan daytoy a sikolohikal a panangagas ti nangtignay iti British Columbia Cancer Agency a manginayon iti “kuarto a pagkatawaan” iti librariada.

Ti panagkatawa bayat ti panagbiagtayo, nupay kasta, dina ipasiguro ti nasayaat a salun-at. Ngem masapul ti kinatimbeng. Kuna ti Biblia nga adda tiempo ti panagkatawa ken tiempo ti panagulimek. Ti di mangikankano a panagkatawa mabalin a titilengenna ti lapayag ti dadduma ket maipadis iti panagragutok dagiti siit iti sirok ti banga agsipud ta awan kaes-eskanna ken di makapabileg.​—Eclesiastes 3:4, 7; 7:6.