Simotsimot Wenno Kulibangbang—Kasano a Mailasinyo?
MAILASINYO kadi ti naggidiatanda iti damo a panangkitayo? Nalabit a mangtiliwkayo iti maysa a kulibangbang gapu kadagiti napintas a marisna ken ti kasla awan patinggana a panagtayabna—agakar-akar iti nagduduma a sabong, agdisso iti apagbiit, agpayapayakpak, sa umakar manen iti sumaganad a pangsusopanna iti taraonna. Anian a pannubok iti kinaanus ti maysa a napursige a retratista! Ti sabali pay a pakaigiddiatanna isut’ kas sinulid a rongona a nagtimbukel ti murdongda.
Ngem ti met ngay simotsimot? Bueno, saanyo a makita ti kaaduan kadakuada no aldaw. Rabii laeng ti panagparang dagitoy a parsua. Gagangay a saan unay a natayengteng ti marisda. Nalukmeg ti pammagida, ken nabudo ti rongoda a makatulong iti panangsapulda iti yan ti kabayán nupay adayo dayta. Ti nailadawan ditoy isut’ simotsimot a Polyphemus, a masarakan iti intero nga Estados Unidos. Gapu kadagiti kasla-mata a burik iti makinbaba a payakna, napanaganan dayta manipud ti Griego a karakter ti mitolohia, ti maysat’-matana a Cyclops a naawagan Polyphemus. Ag-9 inggat’ 15 a centimetro ti kadakkel ti payakna, kaskasdi a bassit no idilig iti dadduma a simotsimot.
Addada naammuan a nasurok a 112,000 a kita ti kulibangbang ken simotsimot, sigun iti Grzimek’s Animal Life Encyclopedia. Dagiti payakda ket “nakaluban iti babassit a siksik . . . a mangpataud iti makakayaw a maris ken disenio a masansan a makitkita[tayo].” Kas ti kunaen ti asinoman a lepidopterista (mangad-adal kadagiti kulibangbang ken simotsimot), makaay-ayoda a parsua. Ti disenio, kinanadumaduma, ken ti nakaam-amak a panagbalbaliwda (metamorphosis) ti mamagbalin kadakuada a napateg nga adalen, saan laeng nga iti agdama, no di ket iti agnanayon!
[Dagiti ladawan iti panid 25]
Ti simotsimot a Polyphemus a naretrato idiay Luverne, Alabama, E.U.A., a naipakita ditoy ti kadakkelna
Makatulong ti nabudo a rongo ti kalakian iti panangsapulna iti yan ti kabáyan