Maysa a Museo ti Holocaust ken Dagiti Saksi ni Jehova
PINAPATAY ti naulpit a turay dagiti Nazi ti minilion a tattao, kangrunaanna dagiti Judio ken Slavs. Nupay kasta, maysa a relihiuso a grupo—dagiti Saksi ni Jehova—ti nagkaykaysa a nagkedked nga agpasakop iti turay dagiti Nazi, saan a gapu iti rasa wenno nasionalidad, no di ket iti natudio a panangitandudoda kadagiti prinsipio ti Biblia.—Juan 17:14, 16.
Impamaysa ti Estado ti Nazi ti nakaro a panangidadanes kadagiti Saksi ni Jehova—kinaranggas a di maitutop iti bilangda. Apay? Gapu kadagiti narelihiusuan a rason, nagkedked dagiti Saksi a makipaset ken agserbi iti German Labor Front ken linaksidda ti aniaman a panagsapata maipaay ken Hitler kas Führer (Pangulo). Gapuna, imparit dagiti Nazi ti pannakabigbigda kas maysa nga organisasion idi Abril 1933. Maysada kadagiti kaunaan a grupo a naipisok kadagiti kampo a pagbaludan gaput’ pannakaakusarda a nasukir iti gobierno ken relihion. “Kas banagna, nasurok a 30,000 a Saksi ti indadanes dagiti Nazi,” kuna ti maysa a padamag idiay museo.
Ti United States Holocaust Memorial Museum a masarakan idiay Washington, D.C., panggepna nga iparang ti pakasaritaan dagiti amin a grupo nga indadanes dagiti Nazi, agraman dagiti Saksi ni Jehova. Kuna ti maysa a gubuayan a ti museo “masapul a paginteresan dagiti Americano ken gangannaet a bisita dagiti relihion a Judio ken Saksi ni Jehova a ginandat a talipuposen ti turay ni Hitler.” Babaen kadagiti nakabakab, dokumento, napatalgedan a videotape, historiko a ladawan, ken naipabuya a pannakaidadanes (film footage), dagiti kapadasan ti nadumaduma a grupo dagiti biktima idi tiempo ti gubat ti nairaman iti eksibision ti museo, libraria, ken dagiti archive. Adda videotape ti museo maipapan ti pannakainterbiu dagiti 74 a Saksi ni Jehova a biktima ti turay dagiti Nazi. Naluktan ti museo agpaay iti publiko idi Abril 1993.
[Picture Credit Line iti panid 31]
Impaay ti United States Holocaust Memorial Museum