Kinagaget—No Kaano a Daytat’ Nasayaat a Kababalin
ITI intero nga Abagatan a daya nga Asia, adu nga agtutubo nga adipen a babbai ti agsardeng nga agtrabaho iti kusinada ket ipamaysada ti agbuya iti Oshin, inaramid dagiti Hapones a serial ti TV no maipabuyan dayta iti telebisionda. Daytat’ estoria ti maysa a napanglaw a babai a nagballigi a bimmaknang kalpasan ti panangibturna iti adu a tawen a panagtrabaho ken panagrigrigat. Makaluluada, makipagriknada ken ni Oshin, ti bida. Ti estoria ti kasla apag-isu a kasapulanda a tumulong kadakuada a mangsaranget iti sabali manen nga aldaw a nadagsen a panagtrabaho.
Kinapudnona, no agtrabaho iti kasta unay dagiti tao iti inaldaw agingga a madadael ti salun-at ken biagda, adda rason no apay nga aramidenda ti kasta. Apay a kastat’ aramidenda? Kas kadagiti adipen a babbai iti Asia, ti panagtarigagay a mangpasayaat iti kasasaad ti panagbiag ket gagangayen ken nabileg a pakatignayan nga agtrabaho a sigagaget. Nalawag, nupay kasta, a saan laeng a ti namaterialan a gunggona ti nairaman.
“Dandani di nairanta, ngem matarigagayan a pakatignayan ti pinansial a gunggona,” kuna ni Stephen D. Cohen, maipapan ti kababalin dagiti Hapones iti trabaho. Ania ngarud ti mangtignay kadagiti Hapones nga agtrabaho a sigagaget? “Ti balligi iti malakuan ti kompania no idilig kadagiti kasalisalna ket gubuayan iti kinatan-ok ken pannakapnek. Daytoy a resulta a maigapu iti kinagaget isut’ gunggonana,” ilawlawag ni Cohen. Agtrabaho a sigagaget dagiti empleado gapu iti kinasungdoda iti kompaniada, ket ti trabaho ti kakaisuna a pangiyebkasda iti kinapategda. Di met liplipatan, ti tarigagay nga umasenso iti korporasion. Ti gundaway a makagun-od iti kangatuan a saad inton tiempona agtalinaed a nabileg a pakatignayan iti kinagaget.
Dagiti Rason a Mangirisgo iti Salun-at?
Umiso kadi dagitoy a rason a mangirisgo iti salun-at ken biag ti maysa? Iti maysa nga agtrabaho a sigagaget maipaay iti namaterialan a kinabaknang, itudo ti Biblia, “uray dagiti matana dida mapnek kadagiti kinabaknang.” Kamaudiananna mabalin nga agpanunotto ti kasta a tao: “Asino ti pagpaayanna ngarud ti pagbannogak ken ti panangilaksidko itoy kararuak iti naimbag?” (Eclesiastes 4:8) Dagidiay agtrabaho a sigagaget tapno bumaknangda dida ammo no kaano ken sadino ti pagpatinggaanda. Naisagmakda iti kankanayon a panagtrabaho, ken ad-adu a panagtrabaho. Basta mamakdaar laeng ti Biblia: “Dika agbannog a maipaay iti kinabaknang.”—Proverbio 23:4.
Ti ngay kinasungdo iti kompania? Nupay nasayaat dayta a kababalin, masapul nga usigen ti mabalin nga epekto ti nalabes a panagtrabaho. “No napaksuyan ti maysa a tao,” kinuna ti maysa a kangrunaan nga opisial ti maysa a kompania nga Americano, “diak kayat nga empleadok.” Nagsurat iti maysa a diario ti asawa a babai ti maysa a “napinget a trabahador ti korporasion” kalpasan a natay ni lakayna gapu iti nalabes a panagtrabaho sakbay a makagteng iti edad a 40: “Ania ti maganabmi no kunaen ti kompania, ‘Ladingitenmi ta napukawmi ti kasta a nagpateg a tao’? Dagidiay martir ti korporasion, no nataydan, maibilangdan a kas ‘bambanag a basura.’”
Uray pay no saan a mapaksuyan wenno matay ti maysa gapu iti nalabes a panagtrabaho, aniat’ mapasamak no agretiron? “Nupay sigagaget a nagtrabaho iti kompaniada,” kuna ni Motoyo Yamane, maysa a managibrodkas a Hapones, “maipabigbig kadakuada ti kinapudno a saanen a kasapulan ida ti kompania ket awanen ti serbida.” Iti di mangipateg a kompania, dagiti nagaget nga empleado ket maysa laeng a saan a napateg a paset ti dakkel a kompaniada, a masapul a masukatan no narunoten. Di ngarud pakasdaawan nga adu a Hapones ti saanen a mamatpati kadagiti kompaniada! Mabigbigbigdan a ti kinapasnekda iti kompaniada ket maysa nga ayat nga awan subadna.
Ania met ngay ti makuna iti yaasenso iti saad iti kompania? Dagidiay a nakagtengen iti babaen ti kangatuan a saad mabigbigdanton a saan nga amin magun-odanda ti kangatuan a saad. Ania ngaruden ti mapasamak? Gaput’ dida namnamaen a maital-o ti saadda, rugiandan ti agbaliwbaliw iti trabaho. Ti kinasungdo iti kompania di napaneknekan a makagunggona a kababalin!
Natimbeng a Panangmatmat iti Kinagaget
Nupay mangupay ken mangpaay ti kinagaget a gaput’ panagayat iti kuarta, ti kinasungdo iti korporasion, wenno ti mannakisalisal nga espiritu, ipateg ti Biblia ti kinagaget. “Tunggal tao mangan koma ken uminum ken makitana a makagunggona dagiti amin a nagbannoganna. Daytat’ sagut ti Dios.” (Eclesiastes 3:13) Irekomendar ti Biblia ti panangtagiragsak iti bunga ti nagbannogan ti maysa. Daytoy ipasimudaagna kadatayo ti umiso a panangmatmat iti kinagaget.
Ti Health and Welfare Ministry iti Japan nabiit pay a binalakadanna dagiti trabahador a “lipatenda ti trabahoda kalpasan ti panagretira (ket) mangrabiida a kadua ti pamiliada.” Nalawag nga apresiaren ti dadduma a papangulo ti negosio ti kinasirib daytoy a balakad. Kas pangarigan, kinuna ti presidente ti maysa a rumangrang-ay a kompania ti biotechnology: “Tarigagayak a dagiti amin nga empleadomi umuna nga aywananda a naimbag dagiti pamiliada sakbay ti aniaman a banag. Ti trabahoda iti kompaniami ket maysa laeng a pamay-an a mangipaay iti pangsuportar iti pamilia.”
Kinapudnona, ti nasayaat a relasion iti pamilia ket pudno a nagpateg a kalat a sigagaget a gun-odentayo. No agpeggad ti nabara a panaglalangen ti pamilia wenno madadael ti salun-atyo gapu iti trabahoyo, dikay makita a makagunggona dagiti amin a nagbannoganyo.
Nupay kasta, iti kagimongan a Hapones, a sadiay maipangpangruna ti kinabayag, daddumat’ nakapataud iti kababalin a: “Dida aglangan, wenno maladaw, wenno agtrabaho.” Agpammarangda laeng a nagaget babaen ti panagtalinaedda a naladaw iti pagtrabahuan ngem urayenda laeng a makaawid ti superbisor. Ni Kenji, maysa a managlako para iti kompania a mangur-urnos kadagiti muebles ken arkos dagiti kuarto idiay Hiroshima, kasta ti kapanunotanna. Isut’ agpalpallailang iti trabaho, busbosenna ti tiempona iti pagkapean wenno iti pinball machine.
Makaparagsak kadi ti kasta a kababalin? “Mapilpilit nga agtrabaho ti naliway ti imana,” kuna ti maysa a proverbio ti Biblia. Itatta, mabalin a saan a mapilit nga agtrabaho ti maysa gapu ta nasadut. Kaskasdi, agbalin a makauma ti trabaho, makuna a mapilpilit nga agtrabaho. Iti kasumbangirna, itudo ti isu met la a proverbio ti gunggona ti kinagaget: “Ti ima dagiti nagaget agiggemto iti panagturay.” (Proverbio 12:24) Uray pay no dikay agturay iti maysa a pagilian wenno kompania, siempre raemennaka ti pamiliam ken agbalinka nga apo ti bagim. Mainayon pay magun-odanyo ti panagtalek ti nangimpleo kadakayo, ken magun-odanyo ti nadalus a konsiensia.
Naammuan ni Kenji a pudno daytoy. Inkeddengna ti agadal iti Biblia, ket kasta unay ti panagbaliw ti biagna. “Babaen ti panangiyaplikar ti kinamapagpiaran iti pagtrabahuan,” kunana, “nagtrabahoakon a sipapasnek adda man wenno awan ti boss. Nagun-odak ti panagtalekna kaniak.”
No ti Kinagaget ket Maysa a Nasayaat a Kababalin
Kinapudnona, tapno makagunggona ti trabaho, masapul a magunggonaan dagiti dadduma. ‘Ti makapnek a trabaho,’ kuna ti mannurat ti negosio, ‘ket trabaho a mangyeg iti pagnam-ayan, liwliwa wenno pakaragsakan ti biag dagiti adu a tao.’ Ti kasta a trabaho mangipaay iti kasta unay a pannakapnek iti nagtrabaho. Kas iti kinuna ni Jesu-Kristo: “Naragragsak ti mangted ngem ti umawat.”—Aramid 20:35.
Nupay makomendaran ti panagtrabaho a maipaay iti pagimbagan dagiti dadduma, adda pay sabali a nasken tapno makapnek ti trabaho ken ti biag. Ni Ari Salomon, kalpasan a napadasanna dagiti amin a luho ken kinabaknang nga ipaay ti biag, nakagteng iti naindaklan a konklusionna: “Agbutengka iti Dios, ket salimetmetam dagiti bilbilinna. Ta daytoy isu ti dagup ti rebbeng ti tao.”—Eclesiastes 12:13.
Nalawag, masapul nga usigentayo ti pagayatan ti Dios aniaman ti aramidentayo. Agtartrabahotayo kadi a maitunos iti pagayatanna wenno agtartrabahotayo a maibusor iti dayta? Ikagkagumaantayo kadi ti mangay-ayo kenkuana wenno basta ay-ayuentayo ti bagbagitayo? No liwayantayo ti mangaramid iti pagayatan ti Dios, agbalintayo a materialistiko ken hedonista ket kamaudiananna agsagabatayo iti kinaliday, kinaawan mamaayna, ken maup-upay.
Gapuna laglagipenyo a ti panagserbi ken Jehova a Dios—ti panangaramid iti trabaho a makaay-ayo iti Namarsuatayo—dinatayto pulos pagbalinen nga awan pannakapnekna. Ni Jehova a mismo ket nagaget a trabahador, ket awisennatayo a makikadua kenkuana ken agbalin a “kadua [ti Dios] a trabahador.” (1 Corinto 3:9; Juan 5:17) Ngem ti kadi kasta a kinagaget mangyeg iti pudno a kinaragsak?
Maysa a direktor a mangimatmaton iti maysa a pagimprentaan bimmisita naminsan iti planta a pagimprentaan ti Watch Tower idiay Japan tapno adalenna ti pannakaiplanona. Naawis ti atensionna saan laeng a kadagiti makina. Nakitana dagiti agtutubo a lallaki a mangtagtagiragsak iti trabahoda, ket nasdaaw a makangngeg nga amin ket boluntario ket adu pay ti sigagagar a nagaplikar a makikadua kadakuada. Apay a nasdaaw? “Idiay kompaniami,” inlawlawagna, “no mangimpleokami ti sangapulo a tattao, ibilangmin a nagsayaat no uppat kadakuada ti adda pay laeng kadakami kalpasan ti makatawen. Dakayo a taga Watchtower napateg a gamengyo dagitoy nga agtutubo a trabahador!”
Aniat’ mangparagsak kadagitoy nga agtutubo a lallaki ken nakagaggaget a trabahador? Kas boluntario, nalawag a saanda nga agtartrabaho a maipaay iti kuarta. Ania, ngarud, ti mangtignay kadakuada? Ti panangipaayda ken panangapresiarda ken Jehova, ti Namarsuada, ken ti ayatda iti kaarrubada. Ti kababalinda ipakitana a saanda nga agtartrabaho a “mangay-ayo kadagiti tao, no di ket kas ad-adipen ni Kristo, aramidenda ti pagayatan ti Dios a naimpusuan.”—Efeso 6:6.
Amin daytoy ket pangripiripan laeng iti umayto. Dagidiay a sigagaget itan nga agserbi ken Jehova inanamaendanto ti tiempo inton isublina iti mabiiten ti Paraiso ket ti intero a daga mapnonto kadagiti makagunggona a trabaho. Ni Isaias, maysa a propeta ti Dios idi ugma, impadtona ti maipapan iti kasasaadto ti biag: “Ket isuda bangonendanto dagiti balbalay ken agtaengdanto kadakuada; ket agmuladanto kadagiti kaubasan ket kanendanto ti bungada. Didanto mangbangon ket sabali ti agnaed; didanto agmula ket sabali ti mangan. . . . Dagiti pinilik agragsakdanto iti mabayag iti aramid dagiti imada.”—Isaias 65:21, 22.
Anian a bendision ngarud ti trabaho! Babaen ti panangammo iti pagayatan ti Dios agpaay kadakayo ken panagtrabaho a maitunos iti dayta, sapay koma ta maysakayto kadagiti naparaburan ken Jehova ken kanayon a ‘makitayo a makagunggona dagiti amin a nagbannoganyo.’—Eclesiastes 3:13.
[Kahon iti panid 9]
Ti Natimbeng a Panangmatmat iti Trabaho Ispalenna ti Panagasawa
Para ken Yasuo, nga agnanaed idiay Hokkaido, Japan, ti trabaho isu ti kakaisuna a pagpalabasan ti tiempo agingga idi sumagmamano a tawen a napalabasen. Adda saadna a babaen a mismo ti kangatuan a saad, ket maay-ayatan iti umad-adu a paglakuan. Inaldaw-aldaw nga agtrabaho agingga iti alas 11:00 t.r. ket saan nga agbakbakasion. Kalpasanna, malagipna: “Nabigbigko a kasano man ti kinagagetko, diak maragsakan iti trabahok.” Nangrugin a kimmapuy ti salun-at ni Yasuo. Iti pannakipatpatangna ken baketna, nabigbigna nga adda banag a napatpateg pay ngem ti trabahona—ti pamiliana. Binaliwanna ti estilo ti panagbiagna ket nakikadua ken baketna iti panagadal ti Biblia. Ita maysan a maay-ayat ken mararaem nga ulo ti naragsak a pamilia.
[Ladawan iti panid 9]
Saan koma a pagpeggaden ti trabahoyo dagiti relasion ti pamiliayo
[Ladawan iti panid 10]
Iti mabiiten tagiragsakenton ti amin ti agtrabaho a mamagbalin iti daga a maysa a paraiso