Ania a Kita ti Lubong ti Kayatyo?

NO ADDA pannakabalinyo, mangparsuakayo kadi ti maysa a baro a lubong, maysa a lubong nga awanan kadagiti parikut a mangsapsaplit kadagiti tao itatta? No aramidenyo ti kasta, saan kadi a nainkalintegan a namnamaen a ti naayat a Namarsuatayo, ni Jehova a Dios, a pudno nga addaan pannakabalin, parsuaennanto ti maysa a baro a lubong ti kinalinteg?

Kunaen ti Biblia: “Ni Jehova naimbag kadagiti isuamin, ket dagiti nadungngo a kaasina adda kadagiti amin nga ar-aramidna. Ukradem ta imam ket penkem ti tarigagay ti isuamin a nabiag.” (Salmo 145:9, 16) Ania dagiti dadduma a tarigagayyo? Ania a kita ti lubong ti tartarigagayanyo?

Iti libroda nga A Sane and Happy Life: A Family Guide, nagsurat da Abraham ken Rose Franzblau: “No agsaludsodkami tapno maikeddengmi ti opinyon ti populasion ti lubong ken damagenmi ti sangatauan maipapan iti kita ti lubong a kayatda a pagnaedan, mabalin nga agtutunoskami amin kadagiti bassit laeng a kasapulan.”

Usigentayo dagiti kasapulan nga inlista dagitoy a doktor ket kitaentayo no dagitoy isu met laeng dagiti bambanag a tarigagayanyo. Bayat nga aramidentayo daytoy, kitaentayo met no ti naayat a Namarsuatayo inkarina nga ipaay dagitoy a banag.

Ti Umuna a Kasapulan

Umuna nga inlista dagiti doktor ti “maysa a lubong nga awanan gubat.” Kalpasan ti panagsagaba iti adu a nakaam-amak a gubgubat, adut’ agtarigagay iti maysa a lubong a sadiay dagiti tao saandanton nga agdadangadang ken agpipinnatay. Naiyebkas ti namnamada iti maysa a surat iti pader ti Plaza ti Naciones Unidas idiay Siudad ti Nueva York, a mabasa: PANDAYENDANTO DAGITI KAMPILANDA A PAGBALINEN A DINGDING TI ARADO. KET DAGITI PIKADA PANDAYENDANTO A KOMKOMPAY: TI NASION SAANNANTON NGA ITAG-AY TI KAMPILAN A MAIBUSOR ITI NASION. KET DIDANTO MET ADALENEN TI PANNAKIGUBAT URAY KAANO.

Ammoyo kadin a dagidiay a sasao ket paset ti kari ni Jehova a Dios? Nailanad dagiti sasao iti Nasantuan a Biblia idiay Isaias kapitulo 2, bersikulo 4, idiay King James Version. Babaen ti panangbasa met iti Salmo 46:8, 9, makitayonto a panggep ti Dios a dadaelen dagiti amin nga armas ket “ipatinggana dagiti gubgubat agingga iti ungto ti daga.” Iti natalna, awanan gubat a lubong nga aramiden ti Dios, matungpalto daytoy nakaay-ayat a padto ti Biblia: “Agtugawdanto, tunggal maysa iti sirok ti kayona nga ubas ken iti sirok ti kayona nga higos, ket awanto ti mangpabuteng kadakuada.”​—Mikias 4:4.

Saanyo kadi nga ilista ti “maysa a lubong nga awanan gubat” kas kangrunaan a kasapulan iti kita ti lubong a tarigagayanyo? Ket panunotenyo, ti Naindaklan a Namarsuatayo inkarina dayta!

Lubong iti Kinawadwad

Ania koma ti maikadua a kasapulanyo? Kapada met laeng kadi ti sumaganad a naited, “maysa a lubong nga awanan bisin, a sadiay mapukawton iti agnanayon ti bisin ken kinakirang”? Saan kadi a nagsayaat no awanton a pulos ti mabisbisin nga ubing? Sigurado a kayatyonto ti agbiag iti maysa a lubong iti kinawadwad. Ngem asino ti makaipanamnama iti daytoy?

Usigenyo ti ikari ti Dios: “Ti daga paaduennanto ti apitna.” “Addanto kinaruay ti bukel iti daga.” (Salmo 67:6; 72:16) Wen, iti baro a lubong ti Dios, nawadwadto dagiti naimas a taraon. Ipanamnama ti Biblia kadatayo a ni Jehova “agaramidto kadagiti amin nga inilin-ili iti maysa a rambak dagiti nalukmeg a banag, maysa a rambak dagiti arak iti rabaw dagiti aributed, dagiti nalukmeg a banag a napno iti pata.”​—Isaias 25:6.

Nupay saan a kabaelan ti tao nga ipaay ti lubong nga awanan bisin, kabaelan ti Dios nga iyeg dayta. Ti Anakna, ni Jesu-Kristo, indemostrana a ti panangipaay iti taraon kadagiti isuamin saanton a parikut iti sidong ti Pagarian ti Dios. Idi adda ditoy daga, pinakan ni Jesus dagiti rinibo babaen ti simimilagro a panangpaaduna iti sumagmamano a tinapay ken ikan.​—Mateo 14:14-21; 15:32-38.

Lubong nga Awanan Sakit

Dikay makasarak iti agsakit a tao iti sadinoman iti kita ti lubong a tarigagayantay amin. Gapuna ti maikatlo a kasapulan saan a pakasdaawan. “Daytanto ti maysa a lubong nga awanan sakit,” insurat dagiti doktor, “maysa a lubong a sadiay amin addanto gundawayda a dumakkel a nasalun-at ken agbiagda iti intero a panagbiagda nga awanan kadagiti sakit a mabalin a lapdan ken agasan.”

Panunotenyo laengen ti bang-ar no awan a pulos ti agpanateng wenno aniaman a sabali pay a sakit! Di kabaelan a pukawen dagiti tao ti sakit, ngem kabaelan ni Jehova a Dios a pukawen. Ket ikarina nga iti baro a lubongna “awanto ti agnaed nga agkuna: ‘Masakitak.’” Imbes ketdi, “iti dayta a tiempo maluktanton dagiti mata ti bulsek, ken dagiti lapayag ti tuleng maluktandanto. Iti dayta a tiempo aglagtonto ti pilay a kas maysa nga ugsa, ken ti dila ti umel agkantanto.” (Isaias 33:24; 35:5, 6) Wen, “punasento [ti Dios] dagiti isuamin a lua kadagiti matada, ket awanton ni patay, ket awanto metten ti sasaibbek, wenno sangsangit wenno rigrigat.”​—Apocalipsis 21:4.

Idi adda ni Jesu-Kristo ditoy daga, impakitana ti nasaksaknap pay a mainanamatayo iti baro a lubong ti Dios. Insublina ti panagkita dagiti bulsek, linuktanna ti lapayag dagiti tuleng, pinagsaona dagiti umel, pinapagnana dagiti pilay, ken pinagungarna pay dagiti natay.​—Mateo 15:30, 31; Lucas 7:21, 22.

Makapnek a Trabaho ken Kinahustisia Agpaay iti Isuamin

Awan duadua, addanto makapnek a trabaho ken kinahustisia agpaay iti isuamin iti lubong a tarigagayanyo ken tarigagayan ti tunggal maysa. Gapuna insurat dagiti doktor: “Maikapat, daytanto ti maysa a lubong nga adda trabaho agpaay kadagidiay nga agtarigagay iti panggedan tapno masuportaranda ti bagida ken dagiti pamiliada.” Ket innayonda pay: “Maikalima, daytanto ti maysa a lubong a tunggal tao tagiragsakennanto ti wayawaya iti sidong ti linteg, nga adda kinahustisia para kadagiti amin.”

Saanto a pulos a maipaay ti turay ti tao dagitoy a kasapulan iti naragsak a panagbiag. Ngem maipaayto ti baro a lubong ti Dios. Ikari ti Biblia ti makagunggona a trabaho nga aramidento dagiti tao iti dayta a tiempo: “Ket isuda bangonendanto dagiti balbalay ket agtaengdanto kadakuada; ket agmuladanto kadagiti kaubasan ket kanendanto ti bungada. . . . Ket dagiti pinilik agragsakdanto iti mabayag iti aramid dagiti im-imada. Didanto agtrabaho iti ubbaw.”​—Isaias 65:21-23.

Ti ngay wayawaya ken kinahustisia para kadagiti amin? Nupay kasano kapasnek ti panangpadas dagiti natauan nga agtuturay, napaayda a nangipaay kadagitoy iti tunggal maysa. Ti kinaulpit ken panangirurumen agtultuloy nga agari iti sangalubongan. Gapuna dinto pulos mapennek dagiti tao daytoy a kasapulan. Ngem ti Mannakabalin-amin a Dios mapennekna dayta. Ti tinudinganna nga Agturay isu ti napagungar a ni Jesu-Kristo, ket kuna ni Jehova maipapan kenkuana: “Ti pinilik, a pagay-ayatan toy kararuak! . . . Isu iyegnanto ti kinahustisia kadagiti nasnasion.”​—Isaias 42:1; Mateo 12:18.

Wen, ikari ti Biblia nga iti sidong ti Pagarian ti Dios “ti met laeng sangaparsuaan maluk-atanto iti pannakaadipen ti panagrupsa a maipaay iti nadayag a wayawaya dagiti annak ti Dios.” (Roma 8:21) Anian a nagragsakto dayta a baro a lubong no addanto wayawaya ken kinahustisia para kadagiti amin!

Dagiti Gundaway ken Panagaliwaksay

Sigurado iti kita ti lubong a tarigagayanyo, amin nga umili tagiragsakendanto dagiti agpapada a gundaway aniaman ti rasa wenno nasionalidadda. Saan ngarud a nakaskasdaaw, ti maikanem a saan unay a nasken nga inlista dagiti doktor ket: “Daytanto ti maysa a lubong a sadiay tunggal tao addanto naan-anay a gundawayna a mangparang-ay kadagiti kabaelan ken sagudayna, ket magunggonaan kadagiti panangikagumaanna, nga awan ti panangidumduma.”

Dagiti tattao dida nakaipasdek ti maysa a lubong a sadiay tagiragsaken dagiti tao ti padapada a pannakatrato. Ti panangidumduma ken uray pay ti pannakaidadanes dagiti di nalatak a minoridad agtultuloy nga awan sarday. Ngem, ti Ari iti baro a lubong ti Dios, ni Jesu-Kristo, tuladennanto ti ulidan ni Jehova, ti Amana, a “di mangidumduma iti asinoman ken di umawat iti pannuksok.” (Deuteronomio 10:17; Roma 2:11) Ti mamagbalinto iti umay a baro a lubong a nakaskasdaaw unay ket saan laeng a nasuruanto dagiti amin a tao a tuladenda ti di panangidumduma ni Jehova a Dios no di ket aramidendanto dayta.​—Isaias 54:13.

Masansan a naipamaysa ti biag dagiti tao iti makauma a panagtrabaho a di man la mabang-aran. Gapuna sigurado nga umanamongkayo iti sumaganad a di unay nasken, nga isu ti: “Maikapito, daytanto ti maysa a lubong a sadiay amin a tao addaandanto ti umdas a panagaliwaksay a mangtagiragsak kadagidiay banag nga ibilangda a naimbag a bambanag iti biag.”

Gaput’ pannakaammona a kasapulan ti tao ti inana ken panaglinglingay, nangipaay ni Jehova a Dios iti kadaanan a Lintegna ti linawas nga aldaw ti panaginana. (Exodo 20:8-11) Ngarud, masiguradotayo nga iti baro a lubongna, siguraduento ti Dios a mapennek ti pannakasapultayo iti panagpalpaliwa ken nasayaat a kita ti panaglinglingay.

Ti Kita Dagiti Agnaed

Ti maudi a nasken nga inted dagiti doktor deskribirenna dagiti kualidad dagidiay nga agnaed “iti kita ti lubong a kayattay amin a pagnaedan.” Kitaenyo man no dagiti nasken a kualidad nga ilistada isu met laeng ti kalkalikagumanyo. “Maikawalo, daytanto ti maysa a lubong a sadiay ti kangatuan a gunggona mairamanto kadagidiay kualidad a mangilasin iti tao kadagiti ayup, kas ti kinalaing ken kinamanagpartuat, dayaw ken kinatarnaw, ayat ken kinasungdo, panagraem iti bagi ken kinaawan-agum, ken pannakaseknan iti padana a tao.”

Dikay kadi tagiragsaken ti agbiag iti maysa a lubong a sadiay tunggal maysa mangiparangarang kadagiti kababalin a kinatarnaw, ayat, kinasungdo, kinaawan-agum, ken pannakaseknan iti padana a tao? Sigurado a daytoy ti kita ti lubong a tarigagayanyo! Awan a pulos ti natauan nga agturay a makaipaay iti daytoy. Ni laeng Jehova a Dios ti makaipaay. Ket ipaaynanto ta ti baro a lubongna ket pudno, manamnama nga arapaap.​—Salmo 85:10, 11.

Kaanonto ti Iyaayna?

Kas naibagan iti immuna nga artikulo, nagsurat ti maysa a nasinged a kadua ni Jesu-Kristo: “Adda dagiti baro a langlangit ken maysa a baro a daga nga ur-urayentayo sigun iti karina [ti Dios], ket kadagitoy agtaeng ti kinalinteg.” (2 Pedro 3:13) Ti tiempo ti kaitungpalan daytoy a kari ket, kas imbaga ni Jesus, “iti baro a pannakaparsua, inton ti Anak ti tao agtugawto iti nadayag a tronona.”​—Mateo 19:28.

Idi punganay binilin ti Dios da Adan ken Eva, ti immuna a pagassawaan, a palawaenda ti minuyongan a Paraiso a nangikabilanna kadakuada. Kayatna nga aganakda ket kaduada ida a mamagbalin iti intero a daga a napintas a minuyongan ti Eden. (Genesis 1:26-28; 2:7-9, 15) Nupay di naibanag da Adan ken Eva daytoy a panggep, addanto pannakaisubli ti naindagaan a Paraiso iti baro a pannakaparsua, babaen ti panangituray ni Kristo iti Pagarian. Kamaudiananna, maisaknapton dagiti kasasaad ti Eden iti isuamin a daga. Gapuna ti naayat a Namarsuatayo tungpalennanton ti panggepna idi punganay a maaddaan iti natalna, nalinteg a lubong. Ngem kaanonto ti iyaay dayta?

Kaslakayo kadi kadagiti adu a kunaenda, ‘Ay, umayto dayta, ngem saan nga iti panagbiagtayo.’ Ngem, kasano ti pannakaammoyo? Mabalin kadi a dagiti awan kapadana a riribuk iti lubong ket pagilasinan nga asidegen ti baro a lubong ti Dios? Kasano nga ammotayo?

[Ladawan iti panid 7]

Idiay baro a lubong, addanto talna, naan-anay a salun-at, ken kinawadwad

[Credit Line]

Dagiti urbon a leon: Pammalubos ti Hartebeespoortdam Snake and Animal Park

[Ladawan iti panid 8]

Idiay baro a lubong, tagiragsakento dagiti tao ti nabunga nga aramidda

[Ladawan iti panid 9]

Idiay baro a lubong, addanto tiempo ti panagaliwaksay