Inton Umay ti Baro a Lubong

TI BARO a lubong ti Dios umayto inton lumabasen daytoy agdama a lubong. Ngem mabalin nga iyimtuodyo, ‘Pudno kadi a patientayo nga agpatingganto daytoy a lubong?’ Bueno, usigenyo, adda kadi nagpatinggan sakbayna?

Wen, sigun kadagiti mapagtalkan a pammaneknek, maysa a lubong ti nagpatingga idi. “Napukaw daydi kadaanan a lubong idi [tiempo ni Noe] natinep ti danum,” kuna ti Biblia. “Saan a pinakawan ti Dios daydi kadaanan a lubong, ngem inggagana ni Noe, a nangikaskasaba iti kinalinteg, agraman kadagiti pito a sabsabali idi pinaglayusna ti lubong dagiti managdakdakes.”​—2 Pedro 2:5; 3:6.

Paliiwenyo a ti “lubong dagiti managdakdakes,” wenno dakes a sistema dagiti bambanag, ti napukaw. Saan a nagpatingga ti planeta a Daga, ti nabituen a langlangit, wenno ti natauan a pamilia. Bayat nga immadu dagiti nakalasat idi Layus, timmaud ti sabali pay a lubong (ti agdama a lubongtayo). Anianto ti mapasamak iti dayta?

Kalpasan ti panagkunana a napukaw ti lubong idi kaaldawan ni Noe, intuloy ti Biblia: “Gapu iti daydi met la a sao dagiti langlangit ken ti daga ita naidulinda a maipaay iti apuy.” (2 Pedro 3:7) Ti apuy kaipapananna ti pannakadadael ti lubong. Kinapudnona, “ti lubong [ti adda itatta] lumabas.” (1 Juan 2:17) Ngem kaano?

Kayat a maammuan dagiti apostol ni Jesus, gapuna nagimtuodda: “Ibagam kadakami, kaanonto ti pannakaaramid dagitoy? ket anianto ti pagilasinan ti iyaaymo, ken ti panungpalan ti lubong?” (Mateo 24:3, King James Version) Kas sungbat nangted ni Jesus ti pagilasinan tapno maammuan dagiti tattao nga agbibiag iti tiempo ti kaitungpalanna a maysa a lubong ti mabiiten nga agpatingga; sukatanto ti maysa a baro a lubong. Ania dayta a pagilasinan?

Ti Pagilasinan

Ti pagilasinan iramanna dagiti adu a paspaset, wen, adu a paspasamak ti naipadto. Tapno matungpal ti pagilasinan, amin dagitoy masapul a mapasamak iti naisangsangayan a pamay-an nga aggigiddan, bayat ti maymaysa a kaputotan. (Mateo 24:34) Ania dagitoy a paspasamak?

Dadduma a ninaganan ni Jesus ket: “Tumakderto ti nasion a makibakal iti sabali a nasion, ti pagarian ken pagarian; ket addanto dadakkel a ginggined, ket iti nadumaduma a disso baybayangobong ken kinakurang ti taraon.” “Iti dayta iyawatdakayto iti rigat ket papatayendakayto, ket guraendakayto dagiti amin a nasion gapu iti naganko. . . . Ket agsipud ta agadunto ti kinadakes, ti ayat dagiti adu lumamiisto.”​—Lucas 21:10, 11; Mateo 24:7-9, 12.

Nangted pay ni apostol Pablo kadagiti dadduma a kasasaad a mangtanda “ti maudi nga al-aldaw” daytoy a lubong. Nagsurat: “Iti maudi nga al-aldaw umaydanto dagiti napeggad a panawen a narigat a pakilangenan. Ta dagiti tattao agayatdanto iti bagbagida, managayat iti pirak, . . . nasukir kadagiti dadakkelda, awan panagyamanda, saanda a nasungdo, awananda ti dungngo a nakayanakan, . . . nasubeg, natangsit, managayat iti ragragsak imbes nga agayatda iti Dios, nga adda langa ti nadiosan a debosion kadakuada ngem libakenda ti pannakabalin dayta.”​—2 Timoteo 3:1-5.

Sigurado, nakita ken nangngegyon amin dagitoy​—internasional a panagdadangadang a mangringbaw kadagiti immuna a gubgubat, dadakkel a ginggined, nasaknap a baybayangobong ken kinakurang ti taraon, guranggura ken pannakaidadanes dagiti pasurot ni Kristo, umad-adu a kinadakes, ken napeggad a panawen nga awan kapadana. Malaksid kadagitoy a bambanag, impadto ti Biblia a “dadaelento [ti Dios] dagidiay mangdaddadael ti daga.” (Apocalipsis 11:18) Ket itatta daddadaelenen dagiti tao ti daga!

Idi napan a Nobiembre, adda paulo dagiti diario a kastoy: “Mamakdaar Dagiti Kangrunaan a Sientista iti Pannakadadael ti Daga.” Kinuna ni Dr. Henry Kendall, nga immawat iti pammadayaw a Nobel ken pangulo ti Union of Concerned Scientists: “Saan a panaglablabes daytoy a pakdaar, ken saan a mamakpakdaar laeng.” Impadamag ti maysa nga artikulo ti diario: “Makita iti listaan dagiti 1,575 a sientista, a nangisurat iti pammakdaar, dagiti mabigbigbig a sientista iti internasional a komunidad dagiti sientista.” Masapul a bigbigentayo ti pakdaarda maipapan iti naan-anay a pannakadadael ti dagatayo!

Di pagduaduaan dayta. Matungtungpalen ti amin a paspaset ti pagilasinan, agraman ti kangrunaan a padto ni Jesus: “Daytoy naimbag a damag ti pagarian maikaskasabanto iti amin a mapagnaedan a daga kas pammaneknek iti isuamin a nasion; ket iti kasta umayton ti panungpalan,” wen, ti panungpalan daytoy a lubong. (Mateo 24:14) Umayto, kinuna ni Jesus, inton ti naimbag a damag ti Pagarian ti Dios naikaskasaban iti sangalubongan. Ket dayta a panangasaba ar-aramidenen dagiti Saksi ni Jehova sigun iti naipadto a kasaknap!

Ti Masapul nga Aramidenyo

Ngarud, dagiti amin a pammaneknek itudona ti kinapudno a ti baro a lubong ti Dios asideg unayen. Kaskasdi, tapno malasatanyo ti panungpalan daytoy a lubong ket tagiragsakenyo ti biag iti baro a lubong, masapul nga adda aramidenyo. Kalpasan ti panangibagana a “ti lubong aglabas,” ilawlawag ti Biblia no ania ti masapul nga aramidenyo: “Ti agaramid ti pagayatan ti Dios mataginayon.”​—1 Juan 2:17.

Gapuna masapul nga ammuenyo ti pagayatan ti Dios ket aramidenyo dayta. Maragsakanto dagiti Saksi ni Jehova a tumulong kadakayo a mangaramid iti daytoy. Iti kasta, mabalin a malasatanyo ti panungpalan daytoy a lubong ket tagiragsakenyo iti agnanayon dagiti bendision ti baro a lubong ti Dios.

[Picture Credit Line iti panid 10]

Ladawan ti NASA

[Ladawan iti panid 10]

Addanto dakkel a rigat sakbay la unay ti baro a lubong