Sungbat Dagiti Uppat a Saludsod Maipapan iti Panungpalan

IMPADTO ni Jesu-Kristo nga ‘umayto ti panungpalan.’ Kas panangdeskribirna iti dayta, kinunana: “Iti kasta addanto dakkel a rigat a dayta ket saan pay a napasamak nanipud idi pangrugian ti lubong agingga ita, saan, saanto met a mapasamak manen.”​—Mateo 24:14, 21.

Mangpataud iti adu a napateg a saludsod dagita a sasao ni Jesus ken ti dadduma a dinakamat ti Biblia mainaig iti panungpalan. Pangngaasim ta ukagem ti Bibliam ket basaem ti sungbat dagitoy a saludsod.

1 Ania ti Manungpal?

Saan nga isursuro ti Biblia a madadael ti literal a daga. Ti Dios “imbangonna ti daga kadagiti naipasdek a dissona,” insurat ti salmista. “Saanto a mapagdiwengdiweng dayta agingga iti tiempo a di nakedngan, wenno iti agnanayon.” (Salmo 104:5) Saan met nga isursuro ti Biblia a matalipupos ti amin a biag babaen ti pannakauram ti globo. (Isaias 45:18) Imbaga a mismo ni Jesus nga addanto makalasat iti panungpalan. (Mateo 24:21, 22) Ania ngarud ti kunaen ti Biblia a manungpal wenno mapukaw?

Manungpal dagiti di naballigi a gobierno ti tao. Pinaltiingan ti Dios ni propeta Daniel a mangisurat: “Mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”​—Daniel 2:44.

Awanton ti gubat ken polusion. Kas panangdeskribir iti aramiden ti Dios, kuna ti Salmo 46:9: “Pagsardengenna dagiti gubat agingga iti ungto ti daga. Rungrungduenna ti bai ket putedputedenna ti pika; dagiti kareson ipuorna iti apuy.” Isursuro pay ti Biblia a ‘dadaelen ti Dios dagidiay mangdaddadael iti daga.’​—Apocalipsis 11:18.

Awanton ti krimen ken kinaawan hustisia. Ikarkari ti Sao ti Dios: “Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.”a​—Proverbio 2:21, 22.

2 Kaano a Dumteng ti Panungpalan?

Ni Jehova a Dios ket ‘nangituding iti tiempo’ no kaano a pagpatinggaenna ti kinadakes ken no kaano nga iturayan ti Pagarianna ti intero a daga. (Marcos 13:33) Ngem ibatad ti Biblia a saantayo a makalkular no kaano ti espesipiko a petsa ti panungpalan. Kinuna ni Jesus: “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama.” (Mateo 24:36) Nupay kasta, impakpakauna ni Jesus ken dagiti adalanna no ania ti kasasaad ditoy daga sakbay unay nga iyeg ti Dios ti panungpalan. Asidegen ti panungpalan no amin dagiti sumaganad ket mapasamakda iti intero a lubong iti las-ud ti maymaysa a panawen.

Kakaruan pay laeng a panagbalbaliw iti politika, iti aglawlaw, ken iti kagimongan. Kas sungbat kadagiti saludsod dagiti adalanna maipapan iti panungpalan, kinuna ni Jesus: “Ti nasion tumakderto a bumusor iti nasion ken ti pagarian a bumusor iti pagarian, addanto dagiti ginggined iti nadumaduma a disso, addanto dagiti kinakirang ti taraon. Dagitoy ket pangrugian dagiti ut-ot ti panagrigat.” (Marcos 13:8) Insurat ni apostol Pablo: “Kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, managayat iti kuarta, napalangguad, natangsit, managtabbaaw, nasukir kadagiti nagannak, saan a managyaman, saan a nasungdo, awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, natangken ti uloda, natangsit gapu iti panagpannakkel, managayat iti ragragsak imbes a managayat iti Dios.”​—2 Timoteo 3:1-5.

Maipatpatungpalen ti trabaho a panangasaba iti adu a lenguahe. Kinuna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mateo 24:14.

3 Ania ti Sumaganad iti Panungpalan?

Saan nga isursuro ti Biblia nga amin a naimbag a tattao ditoy daga ket agbiagdanto nga agnanayon idiay langit. Imbes ketdi, insuro ni Jesus a matungpalto ti orihinal a panggep ti Dios para iti sangatauan. “Naragsak dagiti naalumamay ti kababalinda, yantangay tawidendanto ti daga,” kinuna ni Jesus. (Mateo 5:5; 6:9, 10) Para kadagidiay natay sakbay ti panungpalan, ikarkari ti Biblia a mapagungardanto. (Job 14:14, 15; Juan 5:28, 29) Ania ti sumaganad iti panungpalan?

Manipud langit, agturay ni Jesus kas Ari iti Pagarian ti Dios. “Intultuloyko ti kimmita kadagiti sirmata iti rabii,” insurat ni propeta Daniel, “ket, kitaenyo sadiay! buyogen dagiti ulep iti langlangit um-umay ti maysa a kasla anak ti tao [ni napagungar a Jesus]; ket nakaadani iti Kadaanan iti Al-aldaw [ni Jehova a Dios], ket isu inyasidegda iti mismo a sanguanan Daydiay. Ket kenkuana [ni Jesus] adda naited a panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo. Ti panagturayna ket di nakedngan ti kapautna a panagturay a saanto nga aglabas, ket ti pagarianna maysa a saanto a madadael.”​—Daniel 7:13, 14; Lucas 1:31, 32; Juan 3:13-16.

Dagiti iturayan ti Pagarian ti Dios tagiragsakendanto ti perpekto a salun-at, manayon a kinatalged, ken agnanayon a biag. “Pudno unay a mangbangondanto iti balbalay ket agnaedda,” insurat ni propeta Isaias. “Ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan.” (Isaias 65:21-23) Kastoy ti insurat ni apostol Juan mainaig iti dayta a tiempo: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”​—Apocalipsis 21:3, 4.

4 Ania ti Masapul nga Aramidem Tapno Malasatam ti Panungpalan?

Kinuna ni apostol Pedro nga iti tiempo ti panungpalan, addanto dagidiay manglais iti kapanunotan a ti Dios bumallaetto iti ar-aramid ti tao ket pagpatinggaenna ti kinadakes. (2 Pedro 3:3, 4) Nupay kasta, indagadag ni Pedro kadagidiay agbibiag ita nga aramidenda dagiti sumaganad.

Agsursuroka iti napalabas a pakasaritaan. Insurat ni Pedro a ti Dios “saan a nagteppel a mangdusa iti kadaanan a lubong, ngem inaywananna ni Noe, maysa a manangaskasaba iti kinalinteg, a sitatalged agraman ti pito a sabsabali pay idi nangyeg iti layus iti lubong dagiti di nadiosan a tattao.” (2 Pedro 2:5) Mainaig kadagidiay mananglais, kuna ni Pedro: “Maitunos iti kayatda, malibasan ida daytoy a kinapudno, nga adda idi langlangit nanipud idi ugma ken maysa a daga nga agtaktakder a sititibker manipud iti danum ken iti tengnga ti danum babaen ti sao ti Dios; ket babaen kadagidiay a pamay-an nagpasar iti pannakadadael ti lubong iti daydi a tiempo idi nalayus iti danum. Ngem babaen iti isu met laeng a sao naidulin ti langlangit ken ti dagab nga adda ita maipaay iti apuy ket maisagsaganada iti aldaw ti panangukom ken ti pannakadadael dagiti di nadiosan a tattao.”​—2 Pedro 3:5-7.

Agbiagka maitunos iti moral a pagalagan ti Dios. Dagidiay agtarigagay a makalasat iti panungpalan masapul a ‘nasantuan ti panagbibiagda’ ken addaanda iti “ar-aramid ti nadiosan a debosion,” insurat ni Pedro. (2 Pedro 3:11) Usigem ta impaganetget ni Pedro ti “nasantuan a panagbibiag” ken “ar-aramid ti nadiosan a debosion.” No kasta, saan nga umdas ti parparawpaw a panangipakita iti pammati wenno ultimo minuto a panagbalbaliw tapno laeng maisalakan.

Ania dagiti espesipiko a panagbiag ken ar-aramid nga anamongan ti Dios? Apay a saanmo a pagdiligen ti pannakaammom ken ti isursuro ti Biblia mainaig iti daytoy a topiko? Maragsakan dagiti Saksi ni Jehova a tumulong kenka. Kiddawem kadakuada nga ipakitada iti Biblia ti nakaibatayan dagiti sungbatda. No aramidem dayta, matulonganka a mangsango iti masanguanan buyogen ti tured ken panagtalek, iti laksid ti adu ita a pagam-amkan iti lubong.

[Footnotes]

[Blurb iti panid 7]

Saan a ti daga ti madadael no di ket dagidiay mangdaddadael iti dayta