Panangusar iti Angin

TEMPORARIO a naitantan ti pannakaibangon ti umuna a komersial a wind farm idiay Britania idi, sigun iti The Independent iti London, naperdi ti maysa kadagiti kreyn a maus-usar a mangibangon iti turbine bayat ti napigsa nga angin. Nupay kasta, ti pannakausar ti angin ti makuna a maysa kadagiti kapartakan, kalakaan a pamay-an a pangpaadda iti koriente. Ti nasaysayaat pay ket, awan ti polusion ti kemikal a tumaud babaen iti pannakauram dagiti sungrod a nagtaud iti daga, a kas iti karbon.

Nupay sumagmamano nga Estado ti Europa​—kas ti Alemania, Denmark, ken ti Netherlands​—agraman ti California, paboranda dagiti wind farm kas gubuayan ti kanayon a magun-odan a bileg, saan a maay-ayo dagiti amin a maseknan iti aglawlaw. Agkedked dagiti dadduma gapu iti ungor dagiti agan-andar a turbine blades; dadduma dida magustuan ti naalas a langada, nangnangruna no maikabil dagiti makina kadagiti lugar a kadawyan a napintas ti buyada.

Nupay kasta, idiay Britania, maysa kadagiti pagilian ti Europa a kapigsaan ti anginna, idayaw dagiti manangbalakad ti gobierno ti agturong iti daga nga angin a kas “ti kasayaatan a gubuayan ti bileg iti apagbiit laeng a tiempo,” kuna ti magasin a New Scientist. Iti kasumbangirna, nupay nangina ti magasto, dagiti kritiko a mangbabalaw iti pannakaibangon dagiti turbine iti daga irekomendarda ti panangibangon kadagitoy iti taaw, a mangusarda kadagiti naisangsangayan a makina a pagitag-ay imbes a kreyn a mangiyakar kadagiti nadagsen nga alikamen​—a gundawayanda ti napigsa nga angin iti baybay.