Manipud Managbasatayo
Ubbing a Maup-upay Pagyamanan unay kadagiti serye ti artikulo nga “Ubbing a Maup-upay—Kasanoda a Matulongan?” (Hulio 22, 1993) Idi binasak ida, nakasangitak gapu iti ragsak ken liday. Idi aguppat ti tawenko, ginundawayannak ni tatangko. Dimmakkelak a naynay nga agledleddaang ken maam-amak. Ag-20 a tawenakon a Kristiano, ket babaen iti tulong ni Jehova—ken dagiti artikulo a kas kadagitoy—nakasarakak met laeng iti bang-ar. Ti artikulo kinabalannak met a mangsalaknib iti balasitangko.
S. S., Italia
Agtawenak iti 17 ken kasta unay ti pannakaupayko. Kanayon a makapasakit dagiti sasao a mangmangngegak idiay balaymi. Nupay saan a nabasa ni tatangko dagitoy nga artikulo, basaen koma ida ti tunggal abusado a nagannak. Manginanamaak a dagitoy nga artikulo lukatanna ti matmata dagita a nagannak.
T. B., Estados Unidos
Nagundawayan ti tallot’ tawenna a balasitangko. Mariribukan unay iti daytoy a napagtengna; uray dagiti naganus pay ti tawenda ket masaktan met ti riknada. Makaungetak unay ken naladingit ket kalikagumak a mangputarkay koma iti maysa nga artikulo a makatulong kadagiti nagannak a mangbigbig iti epekto ti kinadangkes kadagiti naganus tawenda nga ubbingtayo. Kurang dagiti sasao a mangiyebkas iti rag-ok a nangbasa kadagitoy nga artikulo. Ita pay laeng a nakabasaak iti kastoy kapintasna. Ipakitana iti sabsabali nga agserserbitayo iti maysa a Dios a mangisakit iti kasta unay a saem a sagsagabaentayo.
M. G., Estados Unidos
Pagyamanan unay iti artikulo nga “Abusado a Nagannak—Ti Kangrunaan a Mangupay.” Kastat’ pannakapadakkelko, buyogen ti emosional ken seksual a panangabuso. Impaawat ti artikulo ti rigat nga ibunga daytoy iti intero a panagbiag ti maysa. Makaliwliwa a maammuan nga adda maysa a mangisakit.
B. S., Estados Unidos
Kas maysa a biktima ti seksual ken emosional a pannakaabuso idi ubingak pay, ammok unay ti pannakadangran nga ibunga ti nairurumen a panagubing. Malaksid no napadasam, saanmo a maawatan ti panangdadael nga ipagtengna iti biag ti maysa. No dadduma, nagrigat nga ibturan ti igugura-iti-bagi, riknat’ pannakabasol, panagamak, ken dagiti manglapunos a rikrikna ti kinaawanen-mamaay ti maysa. Ikarkararagko a dagiti nagannak a mangbasanto iti daytoy nga impormasion usigendanto koma dagiti bagbagida ken tratuenda dagiti annakda buyogen panangaasi ken pannakipagrikna.
D. I., Estados Unidos
Apaman a nakitak ti akkubna, nagarubosen dagiti luak. Narigatmi idi a pakilangenan ti pitot’ tawenna a balasitangmi, ket dimi ammot’ aramidenmi. Kamaudiananna, impanmi iti maysa nga ospital a paglaingannat’ mangagas kadagiti adda sakit ti isip ken rikriknada. Iti kabigatanna kalpasan ti pannakaiyawidna idiay balay, naawatmi ti ruar maipapan ti pannakaupay dagiti ubbing. Adu pay laeng dagiti saludsodmi a di pay nasungbatan, ngem babaen kadagiti artikulo a kas iti daytoy, ti panagkararag, ken ti panangsaranay dagiti gagayyem, kaaduan a saludsodmi ti nasungbatanen.
D. G., Estados Unidos
Agtawenak iti 13, ket nagsakitak iti grabe dua tawen ti napalabasen. Adda tiempo a malidlidayak. Adda la koman dagitoy nga artikulo idi. Impannak ni nanangko iti maysa nga espesial nga ospital para kadagiti ubbing gapu ta dagiti lokal a doktor dida ammo no aniat’ sakitko. Naduktalan dagiti doktor iti espesial nga ospital nga addaanak iti inawagan ti artikuloyo a “sikosomatiko a panagtignay.” Dagiti panglakayen iti kongregasionko, agraman dagiti dadakkelko, tinulongandak a mangparukma iti pannakaupayko. Manginanamaak a dagiti artikuloyo ti makatulongto iti dadduma nga agtutubo a mangparukma iti pannakaupayda.
J. B., Estados Unidos
Maysaak nga ubing ken maup-upay met. Agtawenak iti pito, ket nagsina da nanang ken tatangko. Makapaupay dayta. Addaanak iti saksakit a kas iti nadakamatyo. Pagyamanan iti panangisakityo.
J. H., Estados Unidos