Dagiti Droga, Espiritismo, ken ti Biblia

Pinakdaaran ni Pablo dagiti umuna-siglo a Kristiano a maibusor iti “panangannurot iti espiritismo.” (Galacia 5:20) Ti inusar ni Pablo ditoy a Griego a sao, phar·ma·kiʹa, literal a kaipapananna “ti panangusar iti droga.” “Yantangay dagiti mangkukulam ken managsalamangka agusarda kadagiti droga,” ilawlawag ti The Interpreter’s Bible, “ti sao naipapan a panangkulam, panaganito, panagsalamangka, ken magic.”

Saan ngarud a nakaskasdaaw a dakkel ti paset ti droga iti moderno-aldaw nga espiritismo. Kas pangarigan, nausar idi ti alkohol ken dagiti droga a mangiserrek kadagiti baro a miembro iti sataniko a kulto. Makuna met a dagiti droga mabalin a mausar tapno ad-adda a mangpatulok iti biktima a mangaramid kadagiti rebbengenna bayat dagiti sataniko a seremonia. Aniaman ti kasasaad, nagsurat ni Pedro a ti Diablo “agsursursor a kasla leon a ngumerngernger, nga agsapsapul iti asinoman nga alun-onenna.” (1 Pedro 5:8) Ti Griego a sao a ka·ta·piʹno, a naipatarus nga “alun-onen,” piguratibo a kaipapananna ti “ibusen,” wenno “rimbawan.” Kasta ti aramiden dagiti droga ken ti espiritismo. Daytoy ti mangipaay iti nabileg a panangikagumaan kadagiti Kristiano a liklikanda ti aniaman a kita ti panangabuso iti droga.​—Idiligyo ti 2 Corinto 4:4.