Kasanonto a Dumteng ti Pudno a Baro a Panawen?
TI AUTOR ti movimiento ti Baro a Panawen a ni Shirley MacLaine inyebkasna ti gagangay a kapanunotan idi nagsurat: “Masarakak ti bagik a mangpampanunot iti kasta unay maipapan iti dakes a mapaspasamak iti lubong. Dika malapdan dayta no aktual a makitam ti napanglaw a kasasaad, ti panagbisin, ti pananggura. Rinugiak ti nagbiahe iti sabali a pagilian idi agtawenak iti desi-nuebe, ket ita, agarup 45 ti tawenkon, pudno a makunakon a dimmakesen ti kasasaad dagiti bambanag.”
Kasta met, dagiti tattao iti sadinoman naumadan iti kinamanaginsisingpet ken kinaulbod ti relihion. Naupayda iti panangbaybay-a ken di pannakabael dagiti gobierno. Maamakda kadagiti makitada a di mangikankano a kababalin ken biddut dagiti pagpaagasan. Ket adu ti biktima dagiti mangidumduma ti pulí wenno ti mangidumduma iti sekso ken kapanunotan.
Maysa a Pudno a Solusion?
Awan duadua iti dayta, talaga a kasapulantayo ti maysa a baro a lubong. Ngem pudno kadi dagiti namnama ti movimiento ti Baro a Panawen? Wenno ti kadi panangiparangna iti masanguanan ket ad-adda a kapada dagiti science-fiction a sine ti Hollywood? Agparang kadi a nainsiriban ti mamati kadagiti padto a naibatay iti nalipatanen a tradision, dagiti kadaanan a sarsarita, ken ti pananginanama?
Ipapantayo, adu a kapanunotan a patpatien ti movimiento ti Baro a Panawen ti mabalin a mangitandudo iti mental ken pisikal a pagimbagan iti limitado a pamay-an. Ti nasustansia a taraon, arsisio, panaglinglingay, ken pannakaseknan iti aglawlaw ket nainkalintegan amin a paset iti panagbiag. Dagiti mangngagas nalabit ad-adda koma a naballigida no mangipaayda iti ad-adu a panangasikaso iti emosional a kasapulan dagiti masakit bayat nga agasanda dagiti pisikal a sakitda. Ngem adda tiempo nga agsakit ti tunggal maysa, ket matay uray pay ti nakasalsalun-at. Di naan-anay a matagiragsaktayo ti biag no agpeggadtayo iti panagsakit ken ipapatay. Makaipaay kadi dagiti guru ti Baro a Panawen iti nainkalintegan a solusion dagitoy a parikut?
Umad-adu dagiti malmaldaang ken malidliday a tattao, ket bassit laeng ti maaramidan ti movimiento ti Baro a Panawen iti dayta. Kinuna ti International Herald Tribune iti Londres: “No ti maika-20 a siglo iyegna ti Panawen ti Panagdanag, ti panagpatinggana makitana ti pangrugian ti Panawen ti Panagliday.” Innayon pay ti periodiko a ti “umuna nga internasional a panagadal iti kangrunaan a panagliday ipalgakna ti kankanayon nga iyaadu dayta a sakit iti sangalubongan.”
Ti movimiento ti Baro a Panawen, a kasla relihiuso ti kasasaadna, saan a pudno a mapnekna ti naespirituan a kinakawaw ti moderno a kagimongan. Uray pay iti kasayaatanen a kasasaad ti mapampanunot a naespirituan a pannakabang-ar nga itukonna ket apagkanito laeng. Aminentay ngarud a ti gagangay a relihion, nangnangruna ti Kakristianuan, dina nabang-aran ti kaaduan a naespirituan a pannakabisin. Maysa a periodiko sipapanayag a binabalawna ti “di panagballigi ti Iglesia a mangtulong kadagidiay a makarikna iti pannakaiputong, di pannakaikankano, di pannakaayat.” Deskribiren ti periodiko ti moderno a relihion a kas natamnay, “a manglapped iti indibidual iti aniaman a pannakarikna iti direkta a pannakiuman iti Dios.”
Ti Biblia—Libro Dagiti Sungbat
Ti Kakristianuan linaokan ken pinakapuyna dagiti kinapudno ti Biblia. Kasta met, adu a doktrina ti Baro a Panawen ti maikontra met kadagiti sursuro ti Biblia. Alaenyon, kas pangarigan, ti kapanunotan ti Baro a Panawen a dagiti tattao makaiyegda iti solusion kadagiti parikut ti daga. Nalawag ti kunaen ti Biblia idiay Jeremias 10:23: “Iti tao ti dalanna saanna a kukua. Saan a kukua ti tao a magna uray mangiturong iti addangna.” Kuna pay ti sabali a kasuratan: “Biang ni Jehova ti pannakaisalakan.”—Salmo 3:8.
Saan nga isuro ti Biblia a dagiti tattao addaanda ti imortal a kararua nga agbiag a naisina iti bagi. Sigun iti Kasuratan, matay ti kararua, ket ti ipapatay tandaanna ti panungpalan dagiti amin a panunot ken aramid. (Numeros 23:10; 35:11; Eclesiastes 9:5, 10) Nalawag a daytoy ikkatenna ti kapanunotan ti Baro a Panawen a reinkarnasion.
Kasta met, imposible ti makisarita kadagiti natay. Sigun iti Biblia, aniaman a pannakisarita kadagiti natay ket talaga a pannakisarita kadagiti demonio—dagiti espiritu a kabusor ti Dios ken ti sangatauan. Ngarud, dusaen ti Linteg ti Dios ti pannakinamin iti espiritismo, agraman ti amin a porma ti panagsalamangka, astrolohia, ken ti panagbalin a medium.—Levitico 19:31; 20:6, 27; Deuteronomio 18:10-12.
Ti Biblia ti gubuayan ti pudno a naespirituan a pannakaagas. Addaan kadagiti nagupgop a sursuro a tumulong kadagiti Kristiano a makaawat iti bagida ken baliwan ti personalidadda. (Roma 12:2; 2 Corinto 13:5; Efeso 4:21-24) Isurona ti disiplina ti bagi, nasimbeng nga isip, panagraem iti bagi ken kadagiti dadduma.
Iyadaninatay ti Biblia iti kangatuan a pannakabalin iti uniberso, ti Namarsuatayo. (Aramid 17:24-28) Ipakitana a babaen iti panangalagadda iti pammati iti subbot a daton ti Anakna, mabalin a magun-odan ti sangatauan ti biag nga agnanayon iti paraiso a daga. (Roma 6:23) Makaipaay dayta kadagiti makapnek a sungbat dagiti saludsod nga: Apay a pinalubosan ti Dios ti kasta unay a panagsagaba? Asino dagiti nabileg a persona iti di makita a pagnaedan? Biangda kadi dagiti adu a makuna a paranormal a kasasaad?
Maipaay iti masanguanan, ikari ti Biblia ti naan-anay a salun-at ken biag nga agnanayon ken ti baro a lubong iti kappia ken panagtutunos, nga addaan ti nadalus nga aglawlaw, ditoy daga a mismo. (Isaias 33:24; 2 Pedro 3:13) Iti dayta a baro a lubong, awan duadua a paaduento dagiti tattao ti pannakaammoda ken, iti sidong ti panangiturong ti Dios, maammuandanto dagiti adu a misterio maipapan ti bagi ti tao, ti planetatayo, ken ti dadduma iti uniberso. Amin daytoy ket maibanagto babaen ti pannakabalin ni Jehova, maysa a Dios a mangay-ayat iti sangatauan.
Addakanto Kadi Sadiay?
Nupay kasta, isuro met ti Biblia a dagitoy a bendision ket agpaay laeng kadagidiay nga agbiag a maitunos kadagiti linteg ti Dios. Dagitoy a linteg saanda a makairurumen. Ngem masapul a pagtulnogan ida. (Proverbio 4:18, 19; 1 Juan 5:3) Imposible ti panamati iti di nainkasuratan a kapanunotan ti Baro a Panawen ken maigiddan iti dayta mamati iti Biblia.—1 Corinto 3:18-20; 10:18-22; Santiago 4:4.
Ngarud, liklikan dagiti pudno a Kristiano ti pannakaisinggalutda kadagiti di nainkasuratan a kapanunotan ti movimiento ti Baro a Panawen. Masapul ti nasimbeng a panagpanunot ken kinanainkalintegan. Rumbeng a bigbigen a ti pakabigbigan a “Baro a Panawen” nasaknapen a nausar kadagiti bambanag a di timmaud iti movimiento ti Baro a Panawen ken kadagiti bambanag a mabalin a di met kasapulan a maibatay iti kasuratan. Pudno daytoy nangnangruna iti tay-ak ti salun-at, nutrision, arte, ken musika. Masapul ngarud a maaddaan ti pannakaawat ken kinatimbeng dagiti Kristiano bayat a siguraduenda ti umadayo iti aniaman a kondenaren ti Biblia. Maitutop unay, nainsiriban a mamalakad ti Proverbio 14:15: “Asinoman a nanengneng patienna amin a sao, ngem ti masirib usigenna a naimbag dagiti addangna.”
Wen, ti tulbek ti pudno a pannakalawlawag isu ti Biblia. Ti kaaduan a di panangikankano dagiti [kameng] ti Baro a Panawen kadagiti Kasuratan mangiyeg laeng iti ad-adda a kinasipnget iti lubong. Ngem mangipaay ti Biblia iti naespirituan a lawag ken namnama iti maysa a baro a lubong nga inkari ti Dios: “‘Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.’ Ket Daydiay situtugaw iti trono kinunana: ‘Adtoy! Pagbalbalinek a baro ti isuamin a bambanag.’ Kasta met, kunana: ‘Isuratmo, agsipud ta dagitoy a sasao matalek ken napudnoda.’”—Apocalipsis 21:3-5.