Manipud Managbasatayo
Baro a Panawen Pagyamanan unay kadagiti serye maipapan iti movimiento ti Baro a Panawen. (Marso 8, 1994) Sigud a nagsirarakak iti impormasion maipapan kadagiti UFO, extraterrestial a biag, ken reinkarnasion. Sinurotko dagiti kurso iti Yoga ken panagmennamenna ket nagpaagasak a nainaig iti hipnotismo. Nagbanaganna, naipasangoak kadagiti nakaro a problema iti espiritual, panunot, emosion, ken bagi ket naipasidongak pay iti panangkontrol dagiti demonio. Kasla imposiblen ti kalkalikagumak unay nga Utopia. Lima ket gudua a tawen kalpasanna, agserserbiakon ken Jehova ken nawayawayaanen manipud iti kinasipnget ti movimiento ti Baro a Panawen.
E. D., Netherlands
Sakbay a nagbalinak a Kristiano, nainaigak iti kapanunotan ken wagas ti panagbiag ti Baro a Panawen. Nabiit pay nga inyebkas ti adiek a babai ti tarigagayna a makinaig iti grupo dagiti mangitantandudo iti Baro a Panawen. Inrepasok ngarud kenkuana daytoy nga artikulo. Napakdaaran iti nabatad a koneksion ti Baro a Panawen iti mistisismo ken iti okulto. Ita, isut’ determinadon nga umikay iti kapanunotan ti Baro a Panawen.
L. S., Inglaterra
Nagsayaat ti pangrugian ti artikuloyo. Ngem idi agangay, kinunayo a “saan nga agtaud iti naindagaan a tao ti panangiturong kadagiti addangna.” Kalpasanna, kinunayo nga ad-adda a makayeg iti kinasipnget ti patpatien ti Baro a Panawen. Kayatyo kadi a sawen a masapul nga idiantayon amin a nasayaat a kapanunotan ken mangnamnama a sisasayaat a marisutto amin dagiti bambanag? Kasano a maikonklusionyo a saan a biang ti tao ti panangikagumaanna a mangpasayaat iti lubong nga agpaay iti bagina?
A. L., Estados Unidos
Ti Biblia—saan a ti “Agriingkayo!”—ti agkuna a “saan nga agtaud iti naindagaan a tao ti panangiturong kadagiti addangna.” (Jeremias 10:23) Isu a barengbareng dagiti panangikagumaan ti tao a mangyeg iti Baro a Panawen. Nupay kasta, bigbigen dagiti pudno a Kristiano ti agdama a parparikut. Babaen ti panangisuroda iti prinsipio ti Sao ti Dios kadagiti sabsabali, natulonganen dagiti Saksi ni Jehova ti riniwriw a ‘nanggunggona iti bagbagida’—iti ekonomia, pisikal, ken naespirituan. (Isaias 48:17; Mateo 28:19, 20) Kabayatanna, isuromi kadagiti sabsabali ti pudno a namnama ti sumungsungad a “baro a langlangit ken maysa a baro a daga”—banag a ti Dios, saan a tao, ti mangyegto. (2 Pedro 3:13)—ED.
Doble a Panagbiag Dagiti artikuloyo maipapan iti doble a panagbiag (Disiembre 22, 1993, ken Enero 8 ken 22, 1994) ti nanggutugot iti 17-ti-tawenna a baromi a mangipalgak iti basol a nakairamananna iti napalabas nga uppat a tawen. No iti makinruar a kasasaad, kasla rumangrang-ay iti naespirituan. Naklaat ken naupaykam unay iti daytoy a basol, ngem nakapagtignaykami iti naayat ken manangpakawan a pamay-an gapu kadagiti artikuloyo.
J. P., Estados Unidos
Nasurok a makatawenen sipud idi insardengko ti makitimpuyog iti kongregasion Kristiano. Ngem pudno a makaparegta dagidiay nga artikulo ken napnuan ayat. Kas kinunayo, ti umuna nga addang isut’ yaadani ken Jehova babaen iti kararag. Nagrigat unay, ngem daytat’ nangyeg kaniak iti adu a bendision.
M. G., Francia
Pagkedkedan Dagiti Agtutubo ti Pannakayalison ti Dara Agtawenak iti 12, ket kabasbasak dagiti serye ti “Dagiti Agtutubo a Nangipangpangruna iti Dios.” (Mayo 22, 1994) Dayawek unay ti tured nga impakita dagitoy nga agtutubo a Kristiano a kakabsat a lallaki ken babbai, a sinarangetda ni patay buyogen iti panagtalek ken Jehova ken iti panagungar. Ti tured ken pammatida ken Jehova ti namagsangit kaniak gapu iti rag-o.
B. C. R., España
Nakaawatkamin iti adu nga umasping nga ebkas ti panangapresiar. Nupay kasta, maysa a banag ti rumbeng a maatur. Impadamagmi a ni Ernestine Gregory ket di nayalisonan. Sumagmamano a minuto gayam kalpasan a nairuar ti pammilin ti korte, talaga a naipilit kenkuana ti pannakayalison. Nalasatanna ti nakasuotanna.—ED.