“Nasayaat Pannakairingpasna a Trabaho!”
KASTAT’ mabasa iti paulo ti damag iti St. Helena News. Naaramidan manen dayta dagiti Saksi ni Jehova. Nakaibangonda ti maikadua a Kingdom Hall iti bassit nga isla iti St. Helena a nasurok a 1,600 kilometro iti lauden ti Africa. Ti patakder ket naisaad iti nangato a lugar a maawagan Half Tree Hollow, nga addaan iti nagsayaat a buya ti Taaw Atlantico.
Nangiyebkas ti pammadayaw ti inspektor ti patakder ken ti hepe dagiti bombero kadagiti Saksi. “Nagsayaatan ti naaramidanyo,” kuna ti maysa a retirado a gobernador. “Daytoy ket maysa nga obra maestra!” kuna pay ti inspektor ti koriente.
Naikeddeng a ti aldaw ti dedikasion ket Sabado, Enero 9, 1993. Babaen iti anunsio iti radio, naawis ti intero nga isla nga adda 6,000 a tattaona a tumabuno. Ngem mairingpas kadi ti bassit a grupo dagiti lokal a Saksi, a 150 laeng ti bilangda, ti proyekto iti umiso a tiempo? Inlawlawag ni Sarel Hart, maysa nga agdaldaliasat a manangaywan iti Sud Africa: “Madanagankami idi iti malem ti 8, adu pay laeng a gabor ti kasapulan ti dalan a sumrek tapno mapatag dayta.” Kasano a makagun-odda kadagiti trak, alikamen, ken umdas a materiales a panggabor tapno mapatag ti daga iti dayta a naladawen nga oras? Intuloy a kinuna ni Hart: “Dinengngeg ni Jehova dagiti naulimek a karkararag. Kinuna ti nangkontrata a nangipaay iti material kadagiti kakabsat a lallaki: ‘Dumawatkayo iti lima pay a trak [a gabor]. Ammok a kasapulanyo pay. Insardengkon ti agbilang—basta kargaanyo dagiti trak agingga nga umdasen iti kasapulanyo.’ Iti alas 4:00 t.m. limmabas ti maysa nga opereytor ti front-end loader iti panagawidna. Maysa kadagiti Saksi ti nangpasardeng kenkuana ket inlawlawagna ti panggepmi. ‘Basta bayadanyo laeng ti overtimeko, maragsakanak a mangaramid iti dayta,’ kinunana, ket inserrekna ti makinana iti dalan ket pinatagna ti daga a nakaparpartak kas iti panangitambak dagiti trak iti dayta. Iti las-ud ti tallo nga oras ti lasonglasong a sanguanan ti Kingdom Hall nagbalinen a napalanas a pagnaan.”
Iti sumaganad nga aldaw adda 328—nasurok a 5 porsiento kadagiti umili ti isla—ti timmmabuno iti palawag ti dedikasion. Nairaman iti nagdengngeg ti sekretario ti gobierno ken maysa a mamalbalakad ti gobierno, ket ti obispo ti Anglicano nangipatulod met iti nasayaat a panangkablaaw.
[Mapa iti panid 31]
(Para iti aktual a pannakaurnosna, kitaem ti publikasion)
Africa
St. Helena
[Ladawan iti panid 31]
Baro a Kingdom Hall