Ti Pakasaritaan ti Sorbetes
DAKKELEN ti simmayaatan ti sorbetes ngem idi ugma. Dagiti kadaanan a Romano ti nangimbento iti sorbet. No dadduma, dagiti [la] nabaknang ti mangmangan iti daytoy nga umasping iti yelo a dulse, a naaramid manipud iti yelo, prutas, ken diro. Simmayaat ti pannakaaramid ti sorbet iti unos ti naunday a tiempo, ket nabatad a pinasayaat dayta dagiti kusinero nga Arabo kabayatan ti Edad Media. Nalabit a dagiti sasao a “sorbet” ken “sherbet” iti Ingles ket naadaw manipud iti pagsasao nga Arabe.
Mabalintay a kunaen a ti agdama a sorbetes ti simmukat iti classic a sorbet, a naaramid a kangrunaanna manipud iti danum. Daytat’ nabalbaliwan idi nausaren ti gatas, itlog, asukar, ken pangpananam, a ti resultana ket maysa a nakrema, nananam a timpla. No sibibiagkay idi maika-16 a siglo idiay palasio ni ari Louis XIV ti Francia, naimatanganyo koma ti pannakaiyam-ammo ti sorbetes iti nabaknang a kagimongan. Iti daydi a tiempo, medio adda panagsususik dagiti doktor ken dadduma nga iskolar no ti sorbetes ket nasayaat met la a kanen wenno saan.
Kasanoda a nakaaramid iti sorbetes no awan pay met laeng ti refrigerator wenno freezer idi? Umuna, nausar ti dua a pagkargaan [iti sorbetes] a naaramid iti kayo wenno pewter, a ti basbassit a pagkargaan ket maikabilto iti dakdakkel. Matimpla ti sorbetes iti basbassit a pagkargaan, ket ti espasio iti nagbaetanda ti maselselan iti [naburakburak a] yelo ken asin. No napaglalaoken amin a ramen, mabaybay-anen ti natimpla a ramen iti paggiananna, ket nakasaganan ti sorbetes. Sadinot’ naggapuan ti yelo? Iti napalabasen nga adu a siglo, natakuatan dagiti tattao a makaaramidda iti yelo ken maipreserbada dayta babaen iti panangurnong iti yelo no kalam-ekna sa maipisok kadagiti abut a maabbongan iti garami ken sangsanga ti oak. Idi maika-19 a siglo, naimbento dagiti makina a mangaramid iti yelo ken nausar agpaay iti adu a tattao. Maipreserba ti yelo kadagiti balay babaen kadagiti kahon ti yelo a naaramid iti kayo ken bunot ti niog.
Naimatangan daytoy a siglo ti dakkel a nagrang-ayan iti wagas ti panangaramid-iti-sorbetes. Dagiti refrigerator, pagaramid iti sorbetes a makina, ken dadduma a kagawaan ti mangpappapartaken iti pangnegosio ken para balay a panagaramid iti sorbetes, buyogen iti simmayaat nga estandarte iti kinadalus.
Ti Wagas ti Panagaramid iti Sorbetes
Masapul nga ammo ti nalaing a managaramid iti sorbetes ti trabahona, a kaipapananna nga isut’ masapul nga agbalin a maysa a confectioner ken kusinero, no dadduma maysa nga artist, ken medio maysa a chemist ken bacteriologist pay. Aniat’ mangpapalet, mangpananam, ken mangpaimas iti sorbetes? Bueno, usigenyo ti mailaklako a sorbetes kas pangarigan. Kabayatan ti pannakaaramidna, malaokan iti taba ken manteka tapno pumalet ti timpla. Mailaok met ti umdas a kaadu ti itlog, asukar, ket, no kasapulan, dagiti natural a pangkolor ken pangpananam, kas iti cocoa, kape, ken prutas. Adda met sorbetes a naaramid manipud iti nagiling a mani.
Kalpasan a napaglalaok ti timpla iti sidong ti 70 degrees Celsius, maikabil dayta iti temperatura a 90 degrees Celsius tapno matay ti aniaman a mikrobio. Kalpasan ti sumagmamano nga oras a pannakaipalamiisna iti 4 degrees Celsius, daytat’ agbalayen. Ti maikadua nga addang ti proseso isut’ panangpatangken. Ti temperatura ket dagus a mapagbalin a -6 degrees Celsius agingga iti -10 degrees Celsius, bayat nga in-inut a makiwkiwar ti timpla. Daytoy ti mangpastrek iti angin iti timpla, maysa kadagiti makagapu iti naisalsalumina, nakrema a kinalukneng ti sorbetes.
Adun a siglo ti napalabas manipud idi tinagiragsak dagiti Romano ti sorbet-da ken idi naiyam-ammo ti napasayaat a sorbetes idiay palasio ni Louis XIV. Ngem inton mangankayo iti paboritoyo a nalamiis a dulse, sorbet man dayta wenno sorbetes, pagyamananyo dagidi immuna a Romano a nakapanunot ken nakaimbento iti kasta a makarepresko a kapanunotan!