Pudpudno a Masakbayan Dagiti Ubbing

“Awanton . . . ti maladaga nga agbiag iti sumagmamano laeng nga aldaw . . . Didanto agtrabaho a maipaay iti ubbaw wenno agpasngay a maipaay iti napeggad a kasasaad; ta isudanto ti ili a binendisionan ti APO.”​—Isaias 65:20, 23, New International Version.

NUPAY mapadayawan ti panangikagumaan ti tao a mangpasayaat kadagiti bambanag, minilion a kappasngay nga ubbing ti kaskasdi a “maipaay iti napeggad a kasasaad.” Saanto a kanayon a kasta. Ti padto idiay Isaias dina laeng ipanamnama kadatayo a dumtengto ti aldaw a tunggal ubing saan laeng nga addaanto iti natalged a masakbayan no di ket ilawlawagna pay no kasano a matungpal dayta a kalat.

Idiay Isaias 65:17, kuna ti Dios: “Mamarsuaak ti baro a langlangit ken ti maysa a daga a baro; ket dagiti immuna a bambanag didanto malagipen, didanto mapanunoten.” Tapno maaywanan a siuumiso dagiti ubbing iti lubong, kasapulan nga agpadpada dagiti “baro a langlangit” ken ti “maysa a daga a baro.”

Daytoy a “daga a baro” ket maysa a baro a kagimongan dagiti tattao a mangipangag kadagiti prinsipio nga insuro ni Jesu-Kristo. Maysa kadagidiay a prinsipio, inlawlawag ni Jesus, ket ‘siasinoman nga umawat iti maysa kadagitoy nga ubbing maigapu iti naganko, awatennak.’ (Marcos 9:37) Maysa a kagimongan a mangtrato iti tunggal ubing a kas ken Kristo a mismo ti pudno nga agbalin a “maysa a daga a baro”! Minilionen kadagiti tattao ti mangar-aramid iti dayta, ket nagballigida a nangipaay iti masakbayan iti dadduma kadagiti ubbing iti lubong.

Dagiti Ubbing Itatta nga Addaan iti Masakbayan

Ni Tshepo, agraman dagiti uppat a manong ken manangna, agnanaedda iti iskuater idiay Sud Africa. Idi isut’ agtawen iti maysa, madlaw a bumbumsog ti tianna gapu iti malnutrision. Dagiti nagannakna busbosenda ti dakkel a paset ti sapulda iti beer iti panangikagumaan a manglemmes kadagiti ladingitda. Manmano a mangan ti napudot ni Tshepo, ket mabaybay-an nga agay-ayam kadagiti basura ken dagiti naibelleng nga awan nagyanna a lata ti beer iti aglawlaw ti pagtaengan.

Nakalkaldaang ti masakbayan ni Tshepo agingga nga adda napasamak a nangbalbaliw iti panagpampanunot dagiti dadakkelna. Maysa a kaarruba a managan George ti nangted kadakuada iti libre a kurso iti edukasion ti Biblia. Nakaskasdaaw dagiti resulta​—naikkaten ti parikut a panaginum, nadalusen ti pagtaengan, inaldawen nga adda napudot a taraon ti pamilia, ket ni Tshepo ken dagiti manong ken manangna nadalusen ti langada, nasayaat ti pannakakawesda, ken naragsakdan.

Tinulongan ni George ti pamilia ni Tshepo agsipud ta, kas maysa kadagiti Saksi ni Jehova, mariknana nga adda rebbengenna kadagiti amin, agraman dagiti napanglaw ken di nakaadal. Siempre, sinapulna ti adu a tiempo ken anus ti panangtulong iti pamilia a mangbalbaliw iti estilo ti panagbiagda, ti mangisuro kadakuada kadagiti baro a napateg a pagalagadan a naibatay iti Sao ti Dios. Ngem marikna ni George a ti panangikagumaanna ket nakapatpateg, nangnangruna no makitana ti naiduma nga epekto dayta kadagiti ubbing.

Agnanaed idiay ili ti Mexico a San Salvador Atenco ti maysa a mannalon a managan José, ama ti siam nga ubbing. Isut’ managinum iti adu nga arak, ket dagiti annakna mabutengda kenkuana agsipud ta naranggas no nakainum. Kanayon a narugit ti pagtaenganda, ket ti paraanganda ti pagipupukan kadagiti kabalio ken baboy, a sumrek lattan iti balay. Kas banagna, nagsagaba dagiti ubbing iti saksakit ti bituka, ken no dadduma nalapunos ti gaddil ti bagida.

Nagbaliw dagiti bambanag idi rinugian ni José ti nakipagadal iti Biblia kadagiti Saksi ni Jehova. Simmardengen nga aginum iti kasta unay ken nagbalinen a pudpudno nga ama kadagiti annakna. “Itan mabalinmi payen ti makiay-ayam ken tatang!” sipapannakkel a kuna ti maysa nga ub-ubing nga anakna. Ti pagtaenganda ti kadalusanen​—imbes a maysa kadagiti karugitan​—iti ili. Dagiti baboy ken kabalio maaywanandan iti talon ket kanayon nga ipaburek ti pamilia ti inumenda a danum. Ti simmayaat a panagdaldalus kaipapananna a nasalsalun-aten ken naragragsaken dagiti ubbing.

Kas ipakita dagitoy dua a pangarigan, masansan a ti sekreto iti panangtulong kadagiti ubbing isut’ panangtulong kadagiti nagannak. Bigbigen ti deklarasion iti World Summit for Children a “ti pamilia ti addaan iti kangrunaan a rebbengen a mangaywan ken mangsalaknib kadagiti ubbing.” Ket aywanan ken salakniban man dagiti pamilia wenno saan dagiti annakda mabalin nga agpannuray dayta iti edukasion kas iti panagpannurayna met iti masapulan.

Panangbalbaliw iti Ubing ti Lansangan

Idiay Brazil, ni Domingos ket siam laeng ti tawenna idi natay ni tatangna. Idi nakiasawa manen ni nanangna, dagus a naibaon nga agnaed iti pagtaraknan dagiti ulila. Ti naranggas a pannakatrato a nagun-odanna idiay pagtaraknan dagiti ulila ti nangpilit kenkuana a mangikeddeng a makikadua iti maysa a grupo nga agpalplano nga aglibas. Nupay no inyawid ni nanangna idi nangngegna ti planona, ti sumagmamano a panangmalo ti agsioman kenkuana ti nangkumbinsir kenkuana a masapul a pumanawen iti pagtaengan. Isut’ nagbalin a maysa kadagiti rinibribu nga ubbing idiay lansangan ti São Paulo nga agbitbiton ti sapatos, aglaklako ti kendi, wenno agitulod ti droga tapno agbiag.

Idi damo ni Domingos ti tumabuno idiay Kingdom Hall dagiti Saksi ni Jehova, di agtaltalek kadagiti Saksi ken saan a nadayaw ti tigtignayna​—di pagsiddaawan gapu iti nalikudanna. Nupay kasta, dagiti nataengan a Saksi ti nangisubli iti talekna, ken babaen iti personal a panagadal iti Biblia, isut’ tinulonganda a maaddaan kadagiti baro a pagalagadan. Kamaudiananna naammuanna a mabalinna ti agtalek iti Dios ken kadagiti sabsabali. Tinulongan dagiti Saksi a manggun-od iti trabaho, umuna kas katulongan nga agisaad ti ladrilio ken kalpasanna kas katulongan idiay opisina. Ita, sumagmamano a tawen kalpasanna, agserserbin kas amin-tiempo a ministro a Kristiano.

Dagitoy a pangarigan ipakitana a ti maysa a manangipateg a kagimongan dagiti tattao mabalin a palag-anenda ti dadduma a panagsagaba dagiti ubbing iti lubong. Siempre, mabigbig dagiti Saksi ni Jehova a dagiti nakalkaldaang a kasasaad saanto nga interamente a maikkat babaen ti panangikagumaan ti tao. Ti naan-anay a solusion kadagiti parikut dagiti ubbing iti lubong sapulenna ti abilidad a nabilbileg ngem tao, ti awan patinggana a kinabaknang, ken ti sangalubongan nga autoridad.

“Baro a Langlangit” Maipaay iti Nasaysayaat a Lubong

Ti laeng Dios ti makaipaay iti naan-anay a solusion. Gapu itoy, ilawlawag ti padto ni Isaias a ti “baro a daga” mapakuyoganto iti “baro a langlangit.” Sumagmamano a daras nga ikari ti Biblia a “maysa a baro a langit” wenno “baro a langlangit” ti maipasdekto. (Isaias 65:17; 2 Pedro 3:13; Apocalipsis 21:1) Iti tunggal okasion ti pannakaipasdek dagitoy a “baro a langlangit” ket nailadawan kas napateg nga addang iti panangpukaw iti panagsagaba ken panangiyeg iti kinalinteg ditoy daga. Ania a talaga dagitoy a “baro a langlangit”?

Masansan nga usaren ti Biblia ti sao a “langlangit” kas katupag ti panangituray, ti Dios man wenno ti tao. (Idiligyo iti Daniel 4:25, 26.) Daytoy a baro a gobierno ket maysa a nailangitan a Pagarian, Pagarian ti Dios​—daydiay insuro ni Jesus nga ikararag dagiti pasurotna. (Mateo 6:10) Ti Pagarian ti Dios addaanto ti pannakabalin a mangpukaw iti aniaman a kinadaksanggasat a mabalin a mamagpeggad kadagiti ubbing iti lubong, ket determinadonto dayta a mangaramid iti kasta.

Apay a masiguradotayo dayta? Agsipud ta ti maysa a gobierno iparangarangna ti personalidad dagiti agturayna. Ti Pagarian ti Dios, ngarud, mangiturayto a maitunos iti pagalagadan ti Dios ken dagidiay [pagalagadan] ti Anakna, ni Jesu-Kristo, ti tinudingan ti Dios nga Ari. Agpadpadada a nangipakita iti nabara nga interes iti pagimbagan dagiti ubbing.​—Salmo 10:14; 68:5; Marcos 10:14.

Bayat a sigagagar nga ur-urayentayo daytoy a naikari a Pagarian, wenno “baro a langlangit,” mabalin nga agtrabahotayo a mangparang-ay iti kasasaad dagiti ubbing iti sangakaarrubaantayo. Kas iti siuumiso a panagserra ti World Summit for Children: “Awan ti natantan-ok a trabaho ngem ti panangipaay iti tunggal ubing iti nasaysayaat a masakbayan.”

[Kahon iti panid 11]

Maysa a Praktikal a Programa a Tumulong Kadagiti Ubbing

Itukon ti trabaho dagiti Saksi ni Jehova a panangiyadal ti praktikal ken manayon a tulong kadagiti ubbing. Dadduma a paset daytoy a programa ket:

Edukasion dagiti nataengan. Daytoy ramanenna ti kurso ti panagbasa ken panagsurat agpaay kadagiti nagannak a di makabasa wenno makasurat, agraman ti nasaknap a panangisuro iti Biblia a nadisenio a mangipasagepsep kadagiti nasken a pagalagadan a maipaay iti umiso a panangaywan kadagiti ubbing.

Panangiwanwan iti pamilia. Balakadan ti Biblia dagiti nagannak​—uray dagidiay a napanglaw unay​—nga aywananda dagiti amin nga annakda imbes nga ibaonda ida a makipagnaed kadagiti kabagianda. Ti libro a Panangparagsak ti Biag ti Pamiliayo napaneknekan a nagsayaatan a tumulong kadagiti pamilia nga addaan kadagiti naisangsangayan a parikut.a

Pannakipaset ti ubing ken pannakaiyam-ammo. No mairaman a mismo dagiti ubbing iti edukasion, panangaywan ti salun-at, ken panagdaldalus, nasaysayaat ti resulta. Masansan nga agadal dagiti Saksi a kadua dagiti ubbing, nga usarenda ti nairanta a publikasion a kas Ti Librok dagiti Estoria ti Biblia ken Dagiti Saludsod nga Iyimtuod ti Agtutubo​—Dagiti Sungbat nga Epektibo a tumulong kadakuada a mangtaming kadagiti parikut idiay pagtaengan ken mangpasayaat iti personal a hygiene.b

Panangisuro iti hygiene ken panangaywan iti salun-at. Ipablaak dagiti Saksi ni Jehova ti Agriingkayo! a publikasion iti 74 a pagsasao, ket daytoy a magasin kanayon a mangiparang kadagiti artikulo maipapan iti salun-at.

Trabaho a panangtulong. No tiempo ti emerhensia, mangorganisar dagiti Saksi ni Jehova ti napartak a panangtulong a mangipaay iti direkta a tulong iti lugar ti didigra.

[Dagiti Footnote]

[Dagiti ladawan iti panid 10]

Ti naan-anay a solusion kadagiti parikut dagiti ubbing iti lubong sapulenna ti abilidad a nabilbileg ngem tao. Ti kasta a solusion maipaay laeng ti Dios