Namulitan a Dara ti Naited Kadagiti Addaan iti Hemophilia
TI DARA ket nagbalinen a dua-bilion-a-doliar a negosio iti kada tawen. Ti panaginteres iti ganansia manipud iti dayta ti nangibunga iti nakaro a trahedia idiay Francia. Ti namulitan-HIV a dara ti nakatayan ti 250 nga addaan iti hemophilia kadagiti mainaig-AIDS a sakit, ket ginasut pay ti naakaran.—The Boston Globe, Oktubre 28, 1992, panid 4.
Ti “di nainkalintegan a panagtipon” ti kinaliway dagiti doktor ken kinaagum dagiti komersiante ti nakatayan ti ag-400 nga Aleman nga addaan hemophilia, ket ag-2,000 pay ti naakaran iti namulitan-HIV a dara.—Guardian Weekly, Agosto 22, 1993, panid 7.
Adda met bukod nga eskandalo ti Canada iti dara. Napattapatta a nasurok a 700 a taga Canada nga addaan hemophilia ti nayalisonan iti namulitan-HIV a dara. Naballaagan ti gobierno idi Hulio 1984 a ti Red Cross ket mangiwarwaras iti namulitan-AIDS a dara kadagiti taga Canada nga addaan hemophilia, ngem makatawen pay ti napalabas, idi Agosto 1985, sakbay a naikkat dagiti namulitan a produkto ti dara kadagiti paglakuan.—The Globe and Mail, Hulio 22, 1993, panid A21, ken ti The Medical Post, Marso 30, 1993, panid 26.
Manipud Madrid, España, idi Abril 21, 1993, kinuna ti padamag ti Reuters nga agmulta ti España kadagiti 1,147 nga addaan hemophilia a naakaran iti virus ti AIDS babaen iti pannakayalison ti dara ken plasma idi dekada ’80, sigun iti Health Ministry [ti España]. Nasurok nga 400 ti naakaran iti AIDS ken pimmusayen.—The New York Times, Abril 22, 1993, panid A13.
Agingga iti arinunos ti 1982, rinugian ti Centers for Disease Control ti nangballaag iti NHF (National Hemophilia Foundation) kadagiti peggad ti mangpabalay ti dara a factor VIII—maysa a pannakayalison iti dayta ket mabalin a naggapu iti 20,000 a nagidonar iti dara, maysa laeng ti kasapulan tapno ti indieksion ket mamulitan iti AIDS. Nairuar idi Marso 1983 ti naing-inget a pakdaar, ngem idi Mayo iti dayta a tawen, nangipaulog ti NHF ti maysa a damag a napauluan “Idagadag ti NHF a Maitultuloy ti Pannakausar ti Factor VIII.” Iti daydi a tiempo, umad-adun dagiti matmatay, ket rinibo payen ti agpegpeggad. Daytoy a factor VIII ket saan a kasapulan tapno maispal dagiti addaan iti hemophilia; adda pay dadduma a pagpilian iti panangagas. Naispal koma ti rinibo a biag. Idi 1985, natakuatan dagiti kompania ti agas a babaen iti panangipapudot iti factor, nagbalin dayta a natalged. [Ngem], mailaklako pay met laeng idi dagiti naimbentario nga abasto ti di naipapudot a factor.—Dateline NBC, Disiembre 14, 1993.
[Picture Credit Line iti panid 31]
CDC, Atlanta, Ga.