Ti Aya Reinkarnasion ti Solusion Dagiti Misterio ti Biag?
Nagbiagkay kadi idin?
Agbiagkayto kadi manen kalpasan ti ipapatayyo?
Dagitoy a saludsod mabalin nga ipalagipda kadatayo ti doktrina ti reinkarnasion.
Depinaren ti The New Encyclopædia Britannica ti “reinkarnasion” iti sumaganad a pamay-an: “Maysa a pammati iti pannakaipasngay manen ti kararua iti maminsan wenno ad-adu pay a panagbiag, a mabalin a tao, ayup, wenno, no dadduma, mula.”
Napateg ti paset ti reinkarnasion kadagiti relihion ti Dumaya, nangnangruna dagidiay timmaud idiay India, kas iti Budismo, Hinduismo, Jainismo, ken Sikhismo. Kadagiti Hindu idiay India, kas pagarigan, maibilang ti biag nga agtultuloy a siklo ti ipapatay ken pannakaipasngay manen.
Nupay kasta, kadagiti nabiit pay a tiempo, adu nga agnanaed iti Makinlaud a Hemispero ti maawis iti reinkarnasion, agraman ti adu nga agtutubo. Sigun iti maysa a mannurat iti maysa a benneg iti Sunday Star ti Canada, ti nangnangruna a makagapu iti daytoy a panaginteres “isut’ impluensia ti relihiuso a pammati iti Dumaya iti kagimongan iti Laud, a nangrugi idi dekada 60.”
Ti sabali pay a makagapu iti panaginteres iti reinkarnasion ket dadduma a natatan-ok inyebkasda ken sipipinget a kinunada a nagbiagda idin wenno namin-adun a nagbiagda. Kasta met, naginteres ti radio, TV, dagiti magasin, ken dagiti dadduma pay a pagiwarnak iti media iti reinkarnasion, a kas met kadagiti nadumaduma a propesional kas kadagiti doktor ken mannursuro.
Amin daytoy tinignayna ti adu a panagusiuso. Gapuna, sigun iti dadduma a panagsaludsod, agarup kakapat kadagiti tattao idiay Canada ken ti Estados Unidos ti agkuna a mamatida iti reinkarnasion.
Panangaklon a Nakapadasen Kadagiti Panagbiag Idi
Aklonen ni artista a Shirley MacLaine idi ininterbiu ni Phyllis Battelle iti Ladies’ Home Journal a namin-anon a “nagsubli a nagbiag” bayat ti adu a tiempo. “Malagipko ti adu a napalabas a panagbiagko—no dadduma maysaak a lalaki, no dadduma maysa a babai,” kinunana.
Iti libro a Coming Back, dineskribir ni Dr. Raymond Moody dagiti inaramidna nga eksperimento kadagiti estudiantena ken kadagiti dadduma. Kinunana a babaen iti hypnosis insublina ida idi tiempo kasakbayan ti pannakaipasngayda, ket aklonenda a malagipda ti panagbiagda idi. Maysa a tao ti nagkuna nga isut’ nagbiag idi kas maysa nga Eskimo iti maysa a komunidad dagiti Eskimo. Kuna ti sabali a nagbiag idi bayat ti ‘panawen ti bato,’ rinibo a tawen ti napalabasen.
Aklonen met a mismo ni Dr. Moody nga isut’ nagbiag idi iti siam a panagbiag. Nagduduma dagitoy manipud iti panagbiag kadagiti tuktok ti kayo a kasla kita “ti tao sakbay ti historia, idi immuna a tiempo” agingga iti panagbiag kadagidi al-aldaw ti Imperio ti Roma, idi kinunana nga, isut’ rinaut ken pinatay ti maysa a leon iti pagpabuyaan.
Ti panangusar iti hypnosis a mangisubli kadagiti managimtuod a tattao iti maipagarup a tiempo sakbay ti pannakaipasngayda ket nadeskribir met a makagunggona kadagiti dadduma. Inusar dagiti doktor dayta a pangagas kadagiti saksakit ti emosion. Aklonenda a dagiti di mailawlawag a panagamak ket nabang-aran babaen ti panangtunton iti parikut nga agsubli iti dadduma a pasamak iti panagbiagda idi. Kasano kapudno daytoy a kapanunotan?
Naisalaysay Dagiti Dandani-Natay a Kapadasan
Dagiti dandani-natay a kapadasan nga insalaysay ti dadduma a tattao ti nagserbi a mangpalatak iti pammati a reinkarnasion. Iti libro a Life After Life, impadamag ni Dr. Moody ti nasarakanna maipapan kadagiti dandani-natay a kapadasan manipud iti ag-50 a tattao.
Nupay nagduduma ti kapadasanda, pagarupen ni Moody nga adda padronda. Narikna dagitoy a tattao a nagbiaheda iti nawatiwat, nasipnget nga usok. Nariknada a kasda la naisina kadagiti bagida, nga agkalkallautangda. Nariknada a tumaytayabda iti usok nga agturong iti nakaranraniag a lawag, ket iti pungto ti usok, nakitada dagiti nabayagen a natay a miembro ti pamiliada. Kamaudiananna, nariingda iti bukodda a bagi. Nupay kasta, saanda amin a napadasan dagitoy a tukad.
Naaklon a dagita a kapadasan nasayaat ti epektona kadagidiay a nakapadas kadakuada. No kasta, natulonganna koma ida a nangikkat iti panagamakda iti ipapatay ken nakaipaay koma kadakuada iti panagtalek nga adda panggep ti biag. Ngem saan a kanayon a kasta. Adut’ agtultuloy nga agamak iti ipapatay ken agkurang iti panagtalek iti kaadda iti pudpudno a panggep ti biag.
Dagidiay mamati iti reinkarnasion kunada a paneknekan dagita a kapadasan ti pammati a ti kararua ti tao ket maipasngay manen iti nadumaduma a porma iti biag. Ngem adda kadi aniaman a pamatian itoy a doktrina? Pudno kadi a mangipaay ti reinkarnasion iti solusion kadagiti misterio iti biag? Adda kadi sungbat kadagiti saludsod a, Nagbiagkay kadi idin? Agbiagkayto kadi manen? Adda kadi ik-ikutan ti tao a kararua a pumanaw iti bagi inton matay? Maanagto dagitoy a saludsod kadagiti sumaganad nga artikulo.
[Blurb iti panid 4]
Ti reinkarnasion ket maysa a kangrunaan a sursuro dagiti relihion idiay Daya
[Ladawan iti panid 4]
Rikus ti panagbiag kadagiti Hindu