Nailawlawag ti Kasasaad ti Reinkarnasion

MAYSA kadagiti pangkontra iti teoria ti reinkarnasion ket kaaduan a tattao ditoy daga dida malagip a pulos a nagbiagda idi. Kasta met, dida pay pampanunoten a mabalin a nagbiagda idin.

Pudno a no dadduma karkarna a mariknatayo a mabigbigtayo ti maysa a tao a naam-ammotayo a damdamo unay. Ti maysa a balay, ili, wenno napintas a buya mabalin a kasla nakitkitatayon, nupay ammotayo a damotayo ti mapan sadiay. Nupay kasta, mailawlawag dagitoy a banag uray no ditay agturong iti teoria ti reinkarnasion.

Kas pagarigan, dadduma a luglugar nga agaaddayo ti mabalin a kasla agpareho, ta inton bumisitatayo iti baro a lugar, mabalin a mariknatayo a napantayo sadiay idin, nupay ditay pay napan. Adu a balay, opisina, paglakuan, ili, ken napipintas a lugar iti dadduma a paset ti lubong ti kasla agasping kadagiti katupagda a dadduma a lugar. Gapu ta kasla kaaspingda ti nakitatayon idi ket saan a pammaneknek a nakapantayon kadagidiay a lugar idi napalabas a panagbiagtayo. Basta kaing-ingasda laeng dagiti lugar a nakairuamantayon.

Pudno met daytoy maipapan kadagiti tao. Dadduma ti umarngi ti langada kadagiti dadduma, a kaing-ingasda la unay. Nalabit ti maysa a tao adda ugalina a mangipalagip kadatayo iti maysa a sibibiag pay wenno maysa a natayen. Ngem naam-ammotayo dagidiay a tattao iti agdama a panagbiagtayo, saan nga iti panagbiagtayo idi. Ti panagkaarngi ti langa wenno personalidad dina kayat a sawen a naam-ammotayo dagitoy a tattao iti napalabas a panagbiagtayo. Nalabit datay amin napagkamaliantayo ti maysa a tao a maipaay iti sabali. Ngem agpadpada a nagbiag dagitoy nga indibidual iti maymaysa a tiempo a kas kadakayo ket saan nga iti dati a panagbiagyo. Awan pakainaigan dayta iti reinkarnasion.

Ti Impluensia ti Hypnosis

Uray pay dagiti kapadasan iti sidong ti hypnosis mabalin a mailawlawag uray di agturong iti teoria ti reinkarnasion. Ti sipupuot a panunottayo buklen ti pakaurnongan ti impormasion a nasaksaknap pay ngem ti mabalin a pagarupentayo. Makagteng ti impormasion ditoy a pagurnongan babaen kadagiti libro, magasin, TV, radio, ken babaen kadagiti dadduma a kapadasan ken kapaliiwan.

Adu iti daytoy nga impormasion ti naidulin iti nalmeng a sipupuot a panunottayo gapu ta ditayo direkta wenno dagus a mausar dayta. Ti sipupuot a panunottayo ket kas kadagiti libro iti libraria a di pay kasapulan ita ket naidulin sadiay iti naisina nga estante.

Nupay kasta, iti sidong ti hypnosis, mabaliwan ti sipupuot a panunot ti tao tapno maipalagip dagiti nalipatanen a pakalaglagipan. Ipapan dagiti dadduma a tattao dagitoy a kas panagbiagda idi, ngem dagitoy ket basta agdama laeng a kapadasan a temporario a nalipatan.

Nupay kasta, adda sumagmamano a kaso a narigat nga ilawlawag iti gagangay a pamay-an. Ti maysa a pagarigan ket no ti maysa a tao mangrugi nga agsao iti sabali a “pagsasao” [no adda] iti sidong ti hypnosis. No dadduma maawatan ti pagsasao, ngem masansan a saan. Dagidiay tattao a mamati iti reinkarnasion mabalin a kunaenda a daytoy ti pagsasao ti tao idi immuna a panagbiagna.

Kaskasdi, pagaammo la unay a ti panagsao kadagiti sabali a pagsasao mapasamak met no dagiti tattao ket addada iti mistiko wenno relihiuso a kinaragsak. Dagidiay addaan kadagita a kapadasan makumbinsirda a dayta awan pakainaiganna iti immuna a panagbiagda no di ket naimpluensiaanda laeng iti di makitkita a pannakabalin iti agdama a panagbiag.

Agduduma dagiti kapanunotan no ania a pannakabalin daytoy. Iti nagtipon a deklarasion ti Fountain Trust ken ti Church of England Evangelical Council, daytoy ti naibaga maipapan iti panagsao kadagiti sabali a pagsasao: “Pagaammomi met a mapasamak ti umasping a kasasaad iti sidong ti impluensia ti okulto/demonio.” Gapuna ti panangipapan a ti kasta a kasasaad ket pammaneknek a nagbiagtayo idin ket panangibaga iti ulbod a panangipato.

Dagiti Dandani-Natay a Kapadasan

Dagiti ngay, ngarud, dandani-natay a kapadasan a kunaen dagiti tattao a napadasanda? Dagitoy ti impapan dagiti dadduma kas pammaneknek a ti maysa a tao ket addaan iti kararua nga agbiag kalpasan iti ipapatay ti bagi. Ngem dagita a kapadasan ket nasaysayaat nga amang ti pannakailawlawagda iti sumagmamano a gagangay a pamay-an.

Iti Marso 1991 a ruar ti sientipiko a magasin a Pranses a Science & Vie (Science and Life), dagiti nadumaduma a tukad dagiti kapadasan a dandani-natay ket maawaganda a “sapasap a gagangay a kita ti panagarapaap” a nabayagen a naammuan. Dagiti umasping a kapadasan ket saan laeng a mapasamak kadagiti dandani-natay a kasasaad. Mabalin a mapasamakda met kadagiti [kasasaad a] mainaig iti “pannakabannog, gurigor, panagkissiw, panangabuso iti droga.”

Maysa a nangirugi iti neurosurgery, ni Wilder Penfield, a nagopera kadagiti agkissiw a naikkan iti lokal a pagpipikel, makapainteres ti naammuanna. Naammuanna a babaen ti panangtignay kadagiti nadumaduma a paset ti utek babaen iti electrode, mapagbalinna ti pasiente a makarikna nga adda iti ruar ti bagina, nga agbibiahe iti maysa nga usok, ken masabsabetna dagiti natayen a kakabagianna.

Maysa a makapainteres a banag iti daytoy ket nasabat dagiti ubbing nga addaan dandani-natay a kapadasan, saan a dagiti natayen a kakabagianda, no di ket dagiti kaklaseda wenno mannursuroda​—dagidiay sibibiag pay. Daytoy ipamatmatna a dagita a kapadasan ket adda pakainaiganna iti kultura. Ti napadasan ket mainaig iti agdama a panagbiag, saan a maysa a pasamak kalpasan ti ipapatay.

Nagsurat ni Dr. Richard Blacher iti magasin a The Journal of the American Medical Association: “Ti panagbugsot, wenno panagngangabit ken patay, ket maysa nga addang; ti ipapatay ket maysa a kasasaad.” Kas pagarigan, saritaen ni Blacher ti maysa a tao a damdamona ti agtayab manipud Estados Unidos nga agturong iti Europa. “Ti panaglugan ti eroplano ket saan a [kaadda idiay] Europa,” insuratna. Ti turista a mapan idiay Europa, nga agrikus ken agsubli ti eroplanona sumagmamano a minuto kalpasan ti panagtayabna, di makaestoria kadagiti tattao ti ad-adu pay maipapan iti Europa a kas met ti [di pannakaestoria] ti maysa a nakaungaren manipud iti kinaawan ti puotna maipapan iti ipapatay.

Dagidiay a dandani natay, iti sabali a pannao, ket pulos a saanda a natay. Napadasanda ti maysa a banag idi sibibiagda pay. Ket sibibiag pay ti maysa a tao uray sumagmamano pay a segundo sakbay ti ipapatayna. Dandanidan natay ngem saanda pay a natay.

Uray pay dagidiay apagkanito a simmardeng ti pusoda ket napagangesda manen pudno a dida malagip ti aniaman manipud kadagidiay a kanito iti kinaawan ti puotda idi a mabalin a maipapan a “natay[dan].” Ti malagipda, no adda man, isu ti napasamak idi tiempo sakbay la unay dayta nga apagkanito a panagsardeng [ti anges], saan a bayat ti kinaawan ti anges.

Kankanayon a nailadawan a positibo dagiti naipablaak a dandanin-natay a kapadasan, nupay pagaammo a mapasamak met dagiti negatibo a kapadasan. Kastoy ti panangilawlawag ti Pranses a mangan-anag iti isip a ni Catherine Lemaire iti dayta: “Dagidiay a dida napadasan ti [dandani-natay] a maibagay iti padron nga impaulog ti IANDS [International Association for Near-Death Studies] awan interesda nga agestoria iti kapadasanda.”

Awan Malagipda

Ti kinapudno ket awan ti kapadasantayo iti biag malaksid daydiay panagbiagtayo itatta, awan uray ti panagbiag idi wenno ti biag kalpasan ti ipapatay. Gapuna, awan ti malagiptayo nga aniaman no di ti panagbiag a pudno a napasarantayo.

Dagidiay mamati iti reinkarnasion kunaenda a ti kaipapanan a mismo ti pannakapadas iti pannakaipasngay manen ket pannakagun-od iti baro a gundaway a mangpasayaat iti kasasaadtayo. No pudno a nagbiagtayo idin, ngem nalipatantayo idan, ti kasta a pannakalipat mabalin a maibilang a dakkel a lapped. Babaen laeng ti pannakalagiptayo kadagiti bidduttayo a magunggonaantayo kadakuada.

Kasta met, dagidiay a mangitandudo iti makuna a pannakaagas babaen ti reinkarnasion mariknada a nasaysayaat ti panagballigida kadagiti agdama a parikut no, babaen iti hypnosis, malagipmo ti panagbiagmo idi. Kunaen ti teoria a maipasngaytayo manen tapno mapasayaattayo ti maysa a banag, ngem nalipatantayo no ania dayta a banag.

Ti pannakalipat iti agdama a panagbiag ket maibilang a lapped. Mabalin a kasta met laeng iti daytoy a kaso. Ti panagkedked babaen ti panagkuna a ti kasta a pannakalipat awan aniamanna, yantangay dagiti laeng naimbag a tattao ti maipasngay manen kas tattao, ket saan a nasayaat a rason kadagitoy moderno a tiempo a ti kinadakes ti mangiturturay iti kasasaad ti lubong a nangnangruna ngem idi. No dagiti laeng naimbag a tattao ti maipasngay manen kas tattao, sadino ngarud ti naggapuan dagiti amin a nadangkes a tattao? Saan kadi a bumasbassit koma dagiti nadangkes a tattao? Ti kinapudno ket: Awan, naimbag man wenno dakes, ti nag-reinkarnasion tapno rugianna manen ti sabali a panagbiag kas tao wenno aniaman a banag.

Nupay kasta, nalabit kunaenyo, ‘Saan kadi a sursuro ti Biblia ti reinkarnasion?’ Usigentayo daytoy a saludsod iti sumaganad nga artikulo.

[Blurb iti panid 6]

Ti sipupuot a panunottayo ket kasla maysa a libro iti libraria a naidulin ngem mausarto kamaudiananna

[Blurb iti panid 7]

“Ti ipapatay ket maysa a kasasaad,” saan nga addang.​—Dr. Richard Blacher iti The Journal of the American Medical Association