Baliwan ti Mexico Dagiti Lintegna Maipapan iti Relihion
IDI HULIO 16, 1992, NAIPAALAGADEN TI BARO A LAW OF RELIGIOUS ASSOCIATIONS AND PUBLIC WORSHIP IDIAY MEXICO. APAY A NASKEN DAYTOY, KEN ANIA TI IPAAWAT DAYTOY BARO A LINTEG? SUKIMATENTAYO DAYTOY A BANAG A NANGTIGNAY ITI ADU A PANANGINANAMA.
BABAEN ti panangparmek ti España iti Mexico itan, naipilit ti relihion a Katoliko kadagiti tattao. Idi dimteng ti tiempo a mayaramidan ti linteg dagiti relihiuso a bambanag, maysa a linteg ti España, ti Constitución de Cádiz (1812), nayaplikar iti pasetna; kinuna ti Article 12: “Ti relihion ti Nasion nga España ket agnanayonto a Katoliko, Apostoliko, Romano, ti maymaysa ken kakaisuna a pudno a relihion.” Kalpasanna, idi 1824, naipasdek ti maysa a Konstitusion agpaay iti Mexico, ket kinunana: “Ti relihion ti Nasion a Mexico ket agnanayonto a Katoliko, Apostoliko, Romano. Salakniban ti Nasion dayta babaen kadagiti nainsiriban ken nainkalintegan a linlinteg, ket iparitna ti panamati iti aniaman a sabali a relihion.” Nupay no adda sumagmamano a pannakabalbaliw ti linteg ti pagilian, nayebkas dayta met laeng a kapanunotan uray agingga iti 1843, ipalubosna a mayun-una ti relihion a Katoliko ken, iti kinapudnona, mailaksid ti aniaman a sabali a relihion.
Idi laeng 1857 a ni Benito Juárez, maysa nga estadista a Mexicano, rinugianna a binaliwan dagiti linteg ti pagilian a nangiparang iti naawagan a Linlinteg ti Repormasion. Daytoy ket agpaay iti “pananggun-od ti nasion iti sanikua ti iglesia” ken “tapno paaduen ti pannakabalin ti Estado iti politika ken iti ekonomia ken pabassiten ti [pannakabalin] ti Iglesia [Katolika].” (Historia de México, Tomo 10, panid 2182). Iti daytoy a grupo dagiti linteg idi 1859, naipaulog ti Law of Nationalization of Ecclesiastical Properties, agraman ti maysa a linteg a mangibilin a ti Estado ti mangkasar kadagiti agassawa tapno agbalin a legal [dayta]. Idi 1860 naipaulog ti Law for Religious Freedom.
Dagiti linteg ti repormasion nangipaayda iti bassit a relihiuso a wayawaya kadagiti tattao, a kunaenna a ti relihion a Katoliko saanen nga isu ti kakaisuna a relihion iti pagilian. Nupay kasta, limitado daytoy a baro a wayawaya ken adda kondisionna. Bigbigen dagiti linteg ti kaadda dagiti relihion idiay Mexico ngem dida naikkan iti legal a pannakabigbig wenno kalintegan. Dagiti linteg ti repormasion nairanta a nangnangruna a manglimitar iti relihion a Katoliko ngem kasta met linimitaranna dagiti amin a relihion iti pagilian. Nupay kasta, dagiti relihion malaksid ti Katolicismo nawayadan nga agtignay, ket dagiti relihion a Protestante manipud Estados Unidos nangrugidan iti kampania ti panagebanghelio iti pagilian.
Napatalgedan manen dagiti linteg ti repormasion idi 1917, nga addaan iti isu met laeng a mangbusor-klero nga espiritu, isu a namataud iti pannakaidadanes dagiti padi ken tattao a Katoliko. Nagtungpal daytoy iti gubat a Cristeros idi 1926, maysa a gubat ti Katoliko a maibusor iti gobierno iti panangikagumaan a mangkanselar kadagiti mangiparit a linlinteg a mangsaklaw iti relihion. Nagpatingga ti gubat idi 1929 nga adda katulagan a panangipalubos ti gobierno, ngem nagtultuloy a di nabalbaliwan dagiti linteg.
Iti maysa a komentario maipapan kadagitoy a linteg, dinakamat ti libro nga Una Ley Para la Libertad Religiosa (Maysa a Linteg Agpaay iti Relihiuso a Wayawaya): “Mabigbigmi a ti maikadua a parapo ti dati nga Article 24 ti Konstitusion, ken dagiti dadduma nga article ti nabaliwan a konstitusion, ket nalawag a pannakibiang iti wayawaya ti relihion, gapu ta linimitaranda ti pannakaalagad ti relihion ti tunggal tao ken inturayan ti paglintegan nga indiktar ti turay ti panangibanagna iti dayta.
“Kasta met, dagitoy a kapanunotan ti konstitusion ti nalawag a maikontra iti impasdek ti Universal Declaration of Human Rights (Article 19) ti Naciones Unidas ken ti American Convention of Human Rights (Article 12), a dagita nga internasional nga instrumento ti inanamongan ti Estado ti Mexico.”
Idi 1988, idi rinugian ti baro a presidente ti Mexico ti panagtakemna nga innem a tawen, naawis ti herarkia Katolika iti inagurasion ti presidente. Iti mensahena, inyanunsio ni Presidente Carlos Salinas de Gortari a masapul a mapagbalin a moderno ti relasion ti Iglesia ken ti Estado. Daytoy a baro nga addang ti nangiturong iti pangngeddeng a masapul ti pannakarebisar dagiti linteg maipapan iti relihion. Malaksid iti dayta, agbalbalinen nga ad-adda a demokratiko ti kagimongan ti pagilian, ket narugianen ti negosasion agpaay iti di malaplapdan a pannakinegosio iti Estados Unidos ken Canada. Gapuna nasken a rebisaren ti linteg tapno maitunos iti wayawaya ti relihion.
Ti Baro a Linteg
Ti baro a linteg, kas naibaga iti umuna nga articlena, ket “naibatay iti historiko a prinsipio a panagsina ti Iglesia ken ti Estado, agraman ti wayawaya iti relihiuso a pammati . . . ” Ti maikadua nga article ipanamnamana ti wayawaya ti indibidual “a mangawat iti relihiuso a pammati a kayatna ken alagadenna, kas maysa a grupo wenno kas indibidual, ti panagdayaw wenno ritual a kayatna . . . , a pilienna ti awan relihionna . . . , a di agbalin a puntiria ti panangidumduma, panangpilit, wenno panangbusor gapu iti relihiuso a pammati ti maysa . . . , ti pannakilangen ken panagtataripnong a sitatalna agpaay iti narelihiusuan a panggep.” Babaen itoy a linteg, “dagiti iglesia ken relihiuso a grupo maaddaandanto iti legal a kasasaad kas relihiuso nga institusion apaman a magun-odanda ti maitutop a pannakairehistro iti Ministry of Government.” Kasta met, “dagiti mabukel a relihiuso nga institusion sigun iti agdama a linteg mabalin a maaddaanda iti bukodda a kasasaad a mangipalubos iti panangitungpalda iti panggepda.”
Legal a Nairehistro Dagiti Saksi ni Jehova
Sigun iti daytoy baro a linteg, nangidatag dagiti Saksi ni Jehova idiay Mexico iti aplikasion iti Office of Religious Affairs idi Abril 13, 1993, tapno mairehistro kas maysa a relihion. Sakbay dayta a tiempo dagiti Saksi ni Jehova, kas iti aniaman a sabali a relihion iti pagilian, talaga nga addada ngem saan a legal nga organisasion. Addan dagiti Saksi ni Jehova iti pagilian nanipud pay idi pangrugian ti maika-20 a siglo. Nupay no awan ti legal a pannakabigbigda, idi Hunio 2, 1930, pinasingkedan ti gobierno ti Mexico ti International Association of Bible Students. Idi Disiembre 20, 1932, nasukatan daytoy a nagan iti La Torre del Vigia (The Watchtower). Ngem idi 1943, gapu kadagiti linteg a manglimitar kadagiti relihiuso nga ar-aramid iti pagilian, maysa a baro nga organisasion ti nairehistro kas sibil nga asosasion. Iti kastoy a pamay-an a binendisionan ni Jehova ti trabaho nga imbanagen dagiti Saksi ni Jehova iti adu a tawtawen. Itatta, maitunos iti dokumento a napetsaan iti Mayo 7, 1993, a naipatulod kadakuada idi Mayo 31, 1993, nairehistro dagiti Saksi ni Jehova a kas La Torre del Vigía, A. R., ken Los Testigos de Jehová en México, A. R., agpadada a relihiuso nga asosasion.
Iti sidong dagitoy baro a probision, dagiti Saksi ni Jehova idiay Mexico, kas kadagiti 230 a sabali a dagdaga iti lubong, itultuloyda ti agtrabaho a sigagaget a mangikasaba iti Pagarian ti Dios. Adda dakkel a programa ti panangpalawa idiay Mexico, a mangiraman iti pannakaibangon dagiti baro a Kingdom Hall ken babbaro nga Assembly Hall. Babaen iti nasurok a 380,000 a manangibunannag ken agarup 30,000 a kabbaro a mababautisaran iti tinawen, adda adu a trabaho nga aramiden, kas iparangarang ti 530,000 a panangyadal ti Biblia kadagiti pagtaengan a maikonkondukta itatta.
Daytoy dina kaipapanan a narisuten dagiti amin a parikut dagiti Saksi ni Jehova idiay Mexico. Sanguen pay laeng dagiti annakda ti pannakapilit idiay eskuelaan gapu iti isyu ti neutralidad. Nupay kasta, kayat nga usaren dagiti autoridad ti baro a linteg nga awan ti idumdumana iti panangtaming kadagiti nadumaduma a relihion iti pagilian. Talaga a napateg nga addang ti innala ti Mexico iti panangidepensa iti kalintegan ti tao ken iti wayawaya ti relihion babaen iti baro a linteg maipapan iti relihion.
[Dagiti ladawan iti panid 13]
Dagiti dokumento ti pannakairehistro dagiti Saksi ni Jehova idiay Mexico
[Ladawan iti panid 14]
Baro a sentro ti edukasion iti Biblia nga ibangbangon dagiti Saksi ni Jehova idiay Mexico