Maipalubos Ngata ti Dakdakkel a Wayawaya ti Konsiensia Idiay Mexico?

BABAEN TI KORESPONSAL TI AGRIINGKAYO! IDIAY MEXICO

PATALGEDAN ti linteg ti narelihiosuan a wayawaya idiay Mexico. Nupay kasta, kaskasdi nga aglaon ti linteg iti sumagmamano a restriksion iti wayawaya ti panagdayaw. Kas pagarigan, medio saan a pagaammo iti daytoy a pagilian ti konsepto a panagkedked nga agsoldado gapu iti konsiensia. Dayta ti gapu nga inkeddeng ti Institute of Legal Investigations ti National Autonomous University of Mexico (UNAM) a mangangay iti internasional a simposium a napauluan “Panagkedked Gapu iti Konsiensia Idiay Mexico ken iti Lubong.” Ti Institute of Legal Investigations ti UNAM ket manungsungbat iti gobierno, ngem panggepna nga imbestigaran dagiti naaramiden a linteg ken ti panangipaannurot kadagitoy. Nakiddaw kadagiti Saksi ni Jehova idiay Mexico a mangibaonda iti pannakabagida nga agpalawag maipapan iti tema a “Dagiti Saksi ni Jehova ken ti Panagkedked Gapu iti Konsiensia.”

Situtured nga Agsao Dagiti Propesor

Ti presentasion ti propesor iti Granada University of Law idiay España a ni Dr. Javier Martínez Torrón a “Panagkedked Gapu iti Konsiensia iti Internasional a Linteg,” impatuldona a mabigbigbigen iti intero a lubong ti wayawaya ti konsiensia ken ti kalintegan nga agkedked iti pannakaipaannurot ti sumagmamano a linteg wenno obligasion gapu iti konsiensia. Dinakamatna ti kasasaad dagiti Saksi ni Jehova idiay España ken ti kaso ni Kokkinakis idiay Grecia.a

Nagdiskurso ni Dr. José Luis Soberanes Fernández, propesor iti Institute of Legal Investigations ti UNAM, iti topiko a “Ti Kapadasan ti Mexico Maipapan iti Tema.” “Masapul nga ipatuldomi a ti Linteg ti Mexico Maipapan Kadagiti Narelihiosuan nga Asosasion ken Publiko a Panagdayaw dandani iparitna ti panagkedked gapu iti konsiensia,” kinunana idi tinukoyna ti First Article, a kastoy ti nailanad: “Iti aniaman a kasasaad, dagiti narelihiosuan a patpatien dida maipuera ti siasinoman iti panangtungpalna kadagiti linteg daytoy a pagilian. Saan a mabalin a pangibatayan ti siasinoman dagiti narelihiosuan a rason tapno maliklikanna dagiti rebbengen ken annongen nga ipapaalagad dagiti linteg.” Kas konklusion, kinuna ni Dr. Soberanes: “Patienmi a masapul a maaramid a dagus ti linteg maipapan iti panagkedked gapu iti konsiensia ditoy Mexico.”

Dinakamatna ti kinapudno nga iti kada tawen, adu a parikut ti sarsarangten ti ginasut nga annak dagiti Saksi idiay Mexico a mainaig iti panageskuelada gapu iti naibasar-Biblia a panagkedkedda nga agsaludo iti bandera. Saan pay ketdi a maawat nga ageskuela ti dadduma nga annak dagiti Saksi. Nupay kasta, babaen ti panagapelarda iti Human Rights Commission, adu kadakuada ti naikkan manen iti kalintegan nga ageskuela. Nangaramiden ti dadduma nga opisial iti eskuelaan kadagiti pamay-an tapno saan a maikkat dagiti ubbing manipud iti eskuelaan, ngem saan nga ikankano ti dadduma a mannursuro dagita a panagregget. Pabpabus-oyanen dagiti autoridad ti takder dagiti Saksi, ngem awan pay ti pagalagadan a mabalin a suroten dagiti eskuelaan idiay Mexico.

Sinaklaw met ti simposium ti impresentar ti dadduma a relihion a pagkedkedanda gapu iti konsiensia, kas iti maipapilit a panagtrabaho kadagiti aldaw a maibilang a nasantuan, maikalikagum a panagkawes idiay pagtrabahuan iti wagas a mangsalungasing kadagiti narelihiosuan a patpatienda, ken dadduma pay. Nadakamat met ti panagkedked nga agsoldado ken panagkedked iti sumagmamano a medikal a panangagas.

Dagiti Saksi ni Jehova ken ni Cesar

Ginupgop ti maysa a kameng ti sanga nga opisina dagiti Saksi ni Jehova idiay Mexico dagiti kangrunaan a patpatienda. Inlawlawagna ti panangalagadda kadagiti prinsipio ti Biblia kas ti nadakamat iti Lucas 20:25, a sadiay ibagana kadagiti Kristiano nga ‘ibayadda ken Cesar dagiti bambanag ni Cesar.’ Dinakamatna pay ti Roma 13:1, nga agkuna a masapul a pagraeman dagiti Kristiano dagiti sekular nga autoridad. Inyunay-unayna a dagiti Saksi ni Jehova ket normal, natulnog iti linteg nga umili a mangikagkagumaan nga agbayad iti buisda, agbiag a sitatalna, taginayonenda a nadalus dagiti pagtaenganda, ken pageskuelaenda dagiti annakda.

Kalpasanna, intampokna ti Nainkasuratan a pakaibasaran ti panagkedked dagiti Saksi nga agsaludo iti bandera, a masarakan iti Sangapulo a Bilin, idiay Exodo 20:3-5: “Awan ti sabali a diosmo iti sangok. Dika mangaramid iti maipaay kenka a ladawan a kinitikitan, uray ania a katulad ti adda idiay ngato sadi langit, wenno ti adda iti baba ditoy daga, wenno ti adda iti danum iti uneg ti daga: Dika iruknoy ti bagim kadakuada wenno pagserbian ida.”

Ti Dios laeng ti pagdayawan dagiti Saksi ni Jehova, ket saanda a pulos nga agdayaw iti imahen. Nupay kasta, pulos a saanda nga agaramid iti aniaman a tignay nga awanan panagraem iti maysa a nailian nga emblema wenno dida agsao nga awan daydayawna iti dayta.

Tapno maipaganetget ti panangmatmat dagiti Saksi ni Jehova iti daytoy a saludsod, naipabuya ti video a Purple Triangles. Ipakita daytoy a video ti natibker a takder dagiti Saksi ni Jehova idi panawen dagiti Nazi idiay Alemania (1933-45). Iparangna ti pakasaritaan dagiti Kusserow, maysa a pamilia a nagtalinaed a natibker iti pammatida kabayatan ti rehimen dagiti Nazi.b

Kalpasanna, naipaay dagiti Nainkasuratan a pangibasaran dagiti Saksi ni Jehova iti dida panagpayalison iti dara. (Genesis 9:3, 4; Aramid 15:28, 29) Nailawlawag ti urnos para kadagiti Hospital Liaison Committee iti intero a lubong. Kanayonanna, naitampok dagiti nagapuanan dagiti mannakikooperar a doktor a di nagusar iti dara iti panagoperada kadagiti Saksi ni Jehova.

Iti kada aldaw, ag-100 a tattao ti timmabuno iti simposium. Abogado ti adu kadagitoy. Dimmar-ay met dagiti pannakabagi ti Office of Religious Affairs idiay Mexico. Nangngegan amin dagiti dimmar-ay ti panangmatmat dagiti eksperto maipapan iti pannakaraem ti panagkedked gapu iti konsiensia. Baro daytoy a konsepto kadagiti mammanday-linteg idiay Mexico, nupay nasaknap a maaw-awaten iti adu a demokratiko a pagilian, kas iti Francia, Portugal, España, ken Estados Unidos agraman iti dadduma a dati a Komunista a pagilian a kas iti Czechia ken Slovakia.

[Dagiti Footnote]

[Ladawan iti panid 21]

Ipatpateg dagiti Saksi ni Jehova idiay Mexico ti wayawayada a mangasaba