Ti Irarang-ay ken Pannakarbek ti Satanismo
Aramiden dagiti nakaroba ti nangisit a papadi dagiti sataniko a ritual kadagiti nasipnget a kukuarto iti uneg ti daga, iti panangikararagda kadagiti nakareppet a biktima iti rabaw ti altar, nga addaan kadagiti agkurkuridemdem a kandela a mangiparang kadagiti nakabutbuteng nga anniniwan iti diding bayat nga agtultuloy ti panagdayaw iti diosda, ni Satanas. Naragsakan dagiti agtutubo a makipaspaset isu a nangpunno iti atmospera iti daytoy a panagdaliasat nga agturong iti okulto, ta nagtitiponda gapu iti nalimed a pannakaammo iti nagraramananda a misterio a kasla guyguyugoyen ti nabilbileg a pannakabalin. Umadanida iti altar a buyogen ti karkarna a rikna nga is-isuda laeng ti mangik-ikut.
Di makadangran, aglabas nga uso? Wenno maysa a dinedemonio a kinadakes nga agsaksaknap iti kagimongan?
NAKAAD-ADUN ti naisurat kadagiti pagiwarnak, magasin, ken liblibro maipapan iti nakaam-amak nga ar-aramid dagiti sataniko a kulto. Naipakaammon iti telebision ken radio ti nasion dagiti detalye ti nasaknap nga ar-aramid dagiti naranggas a sataniko a grupo. Nagbalinen dayta a kangrunaan a parikut ti polis agpadpada kadagiti babassit ken dadakkel a siudad iti America, Canada, ken Europa.
Addaan naisangsangayan a pangawis ti Satanismo kadagiti agtutubo itatta. Ti nangpundar iti Church of Satan ilawlawagna no apay, kas naipadamag iti Hunio 1993 a magasin a ’Teen: “Imbes a bilinenmi dagiti miembro a mangmedmed iti kadawyan a derrepda, isuromi a yebkasda ida. Iraman daytoy ti pisikal a derrep, ti tarigagay nga agibales, ti mangpilit a panagtarigagay iti material a sanikua.”
Anian a pannakaay-ayo ni Satanas iti daytoy nga impaltiing ti diablo a kapanunotan, ta daytat’ maikontra kadagiti Nakristianuan a prinsipio nga impaltiing ti Dios!
Rumangrang-ay ti Satanismo. Daytat’ agsaksaknap a pagam-amkan, ngem umadanin ti pannakapukawna. Nasentensiaanen ti diosna iti ipapatay. Kasta met ti lubong ni Satanas ken dagiti mangitantandudo iti dayta, ta “ti isuamin a lubong adda iti pannakabalin daydiay nadangkes.” (1 Juan 5:19; Roma 6:16) Kadagiti managdaydayaw ken Satanas ken kadagiti amin a sabsabali a makaammo wenno di makaammo nga agserserbida a maipaay kadagiti panggep ni Satanas, ti mensahe ni Jehova ket: “Ti Dios a mangipaay iti talna rumekennanto ni Satanas iti babaen dagiti sakayo iti mabiiten.”—Roma 16:20.
Anianto ngarud ti masanguanan ti agsagsagaba a sangatauan manipud “iti Dios a mangipaay iti talna”? Dagiti tallo a sumaruno nga artikulo ipakitada ti irarang-ay ken pannakarbek ti Satanismo ken dagiti kasasaad ditoy daga a mangsukatto iti dayta.