Nasarakan Manen ti “Nagpukawen” a Tumatayab

ANIAT’ maipapan iti kas-kadakkel ti maysa a naamo a manok, nalabaga a kasla-loro ti sippitna ken lila-asul ti marisna, di makatayab, ken naibilang idin a nagpukaw manipud idi ag-1900 aginggat’ 1948? Sabali pay a pamalatpatan: Masarakan laeng idiay New Zealand ken adda Maori a naganna. Dayta isut’ takahe, wenno Notornis mantelli hochstetteri.

Busbosen dagitoy a naatap a billit ti kaaduan a tiempo iti tawen kadagiti tapaw ti kabambantayan ti Murchison ken Kepler iti Fiordland iti abagatan a laud ti South Island ti New Zealand. Nupay kasta, manmano ti natiliw, kas iti naretrato ditoy iti bassit a pangpubliko a parke ti Te Anau. Kuna ti The Illustrated Encyclopedia of Birds a daytoy a dakkel a billit (gistay 63 sentimetro ti kaatiddogna) “ket nagsagaba iti nakaam-amak nga irarasay gapu iti panagiinnuna ken pannangan dagiti ayup manipud ti sabali a lugar.” Agpapan ti pannakapaadu dagiti natiliw ken panangkontrol iti pannakapapatayda, daytat’ agpegpeggad pay laeng a kita.

Kuna ti isu met laeng a gubuayan a “mangmangan dayta kadagiti bukel ken nalukneng a bagas dagiti ruot.” Ngem masapul a makiinnuna a mangan “iti sumangbay nga ugsa ket masansan a maunaan.” Manginanamatayo a daytoy a naisangsangayan a billit ket di agpukaw iti listaan dagiti manmano a parsua idiay New Zealand.