Agin-inut a Maangsan Dagiti Nagdadakkel a Siudad
DAGITI nagdadakkel a siudad iti aglawlaw ti lubong lumawlawada, nga awisenda dagiti minilion nga agsapsapul iti trabaho, pagbalayan, ken dagiti nam-ay ti biag iti siudad. Ngem nangina ti gatadna. Ti laeng panaganges kadagitoy a lumawlawa a siudad ket ad-addan a pagpeggadenna ti salun-at ti tao.
Maysa a nabiit pay a report manipud iti UNEP (United Nations Environment Program) ken ti World Health Organization ipakitana a ti polusion ti angin kadagiti 20 a kadadakkelan a siudad iti lubong ket kumarkaron iti kasta unay. “Iti dadduma a kaso,” kuna ti Our Planet, maysa a magasin nga impablaak ti UNEP idiay Kenya, “ti polusion ti angin ket kas iti kadakes ti di nasayaat a pakasarsaritaan ti angep a napakuyogan ti asuk iti Londres 40 a tawen ti napalabasen.” Dagiti agindeg iti Siudad ti Mexico ti naapektaran iti kasta unay iti daytoy, ngem pinulpullo a milion a tattao nga agindeg kadagiti siudad a kas iti Bangkok, Beijing, Cairo, ken São Paulo apektadoda met iti polusion ti angin.
Kasano kapeggad ti angin kadagita a siudad? Bueno, dagiti nakaad-adu a kangrunaan a mangmulit, kas iti sulfur dioxide, carbon monoxide, ken buli, ket napeggad iti adu a pamay-an. Adut’ epektoda iti bagi: sakit ti pagangsan ken iti puso, pannakadadael ti utek, ken uray pay ti pata ti tulang, dalem, ken dagiti sakit iti bato.
Aniat’ mangpatpataud iti polusion? Ti kadadakkelan a kakaisuna a pagtaudanna kadagitoy a siudad, sigun iti Our Planet, isu dagiti de motor a lugan. Yantangay ti agdama a bilang dagiti lugan iti lubong—630 milion—“ket manamnama nga agdoble iti las-ud ti sumaganad a 20-30 a tawen, kaaduanna kadagiti siudad,” pudno a nalidem ti masanguanan nga angin kadagiti siudad. Ti mangpakaro pay kadagiti bambanag ket, manmano a mangsalaknib nga addang ti naaramid, yantangay, kas kuna ti report, kadagiti kaaduan a nagdadakkel a siudad “saanda nga ammo ti kinakaro ti parikut.” Di ngarud pakasdaawan, nga ipaganetget ti Our Planet a dagita a siudad masapul a yun-unada dagiti addang a mangdalus iti angin. No saan a maaramid daytoy, nakadadanag ti masanguanan. Sigun iti panangmatmat ti pagiwarnak, “dagitoy a siudad mabalin a main-inut a maangsanda bayat nga agtultuloy ti ikakaro ti dakes a kasasaad ti anginda.”