Natalgedkayo Kadi nga Agmaneho?

TI KABABALINYO bayat nga agmanmanehokayo iti kotse impluensiaanna a naimbag ti kabaelanyo nga agmaneho. Impalgak ti maysa a panagadal nga inaramid ti British Automobile Association a 22 porsiento kadagiti Britano a lallaki nga adda iti nagbaetan ti 17 ken 20 a tawen ti mairaman iti maysa nga aksidente iti lansangan iti tunggal tawen.

Ania dagiti kangrunaan a banag iti di natalged nga ugalida nga agmaneho? Malaksid iti alkohol, dagiti nakaro a panagbalbaliw ti rikna, ken ti nalaaw a musika, kuna ni Kenneth Faircloth, katulongan a direktor-heneral iti Automobile Association: “Nakaad-adu ti impluensiaan dagiti kapatadanda nga agmaneho a sipepeggad.” Kas banagna, irekomendar ti Automobile Association a ti panangsanay maipamaysa nga ad-adda kadagiti kababalin ti agmaneho ket bassit laeng kadagiti pamay-an ti panagmaneho.

Kas pagarigan, imtuodenyo ti bagiyo met laeng: ‘Padpadasek kadi ti agparammag kadagiti pasahero iti kotsek babaen ti awan arnasna a narisgo [a panagmaneho]? Ikeddeng kadi ti riknak ti kababalinko nga agmaneho? Matmatak kadi dagiti dadduma nga agmaneho iti lansangan kas makalapped laeng a masapul a malab-awan ti kinalaingda?’ Dagiti sungbat kadagita a saludsod ipalgakna no ania ti kasasaadyo nga agmaneho.

Lalaki man wenno babai, agtutubo wenno nataengan, sukayenyo ti nainggayyeman a kababalin bayat ti panagmaneho. “Tratuenyo ti dadduma a tao a kas met laeng iti kayatyo a panangtratoda kadakayo.” (Mateo 7:12, Phillips) Ti panangaramid iti kasta tulongannakayto nga agmaneho a sitatalged.