Adda kadi “Fritillary” iti Minuyonganyo?

NO ADDA, maay-ayokayto iti kinapintasna. Ania ti fritillary? Daytat’ maysa kadagiti rinibo a nadumaduma a kita ti kulibangbang a mangpapintas iti lubongtayo ken maysa kadagiti nasurok a 750 a kita a mabalin a masarakan idiay Estados Unidos ken Canada. Ti maysa a naipakita ditoy, maysa a dakkel a burikan, ket naretrato iti maysa a minuyongan ti nalasbang nga away iti estado ti Virginia. Ti dakkel a burikan ket addaan kadagiti kolor pirak a burik iti sirok ti kammaudi a payakna. Ginagara ti hardinero a minulaan ti minuyongan iti sangaaray nga atap a sabsabong a tumayag ken mangallukoy kadagiti kulibangbang​—addada dagiti duyaw a rudbeckias ken mauve phlox.

No kayatyo nga allukoyen dagiti kulibangbang iti minuyonganyo, padasenyo ti agmula iti sangaaray nga atap a sabong. Nalabit mabalinyo ti gumatang iti maysa a bassit a supot ti bukbukel ti atap a sabong a mabalin a tumubonto nga adu a nagduduma a kolor a kas kadagiti kolor nga us-usaren ti pintor a mangawis kadagitoy a nagpipintas a parsua kadakayo. No agnanaedkayo iti maitutop a lugar iti lubong, ti buddleia bush kasta unayto ti panangallukoyna kadagiti kulibangbang. Kalpasanna mangalakay iti kamera ken largabista, ket maragsakankayto!