Agpaay Aya Kadakayo Daytoy nga Ay-ayam?

“AGPANNURAY iti panangmatmat ti maysa, ti Doom ket mabalin nga ay-ayam a panagpipinnaltog a makaparagutok ti puso a mangipaay iti kabbaro a teknikal a kinamoderno dagiti ay-ayam iti computer wenno ti di mapengdan a nakaro a kinaranggas a mangipaay iti kinadakes dagiti ay-ayam iti computer.” Kastat’ insurat ni Peter Lewis iti benneg a “Dagiti Personal Computer” iti The New York Times. Siempre, adu nga ay-ayam iti computer ti sinsinan a kinaranggas, nadara a panangpapatay iti adu, wenno nakabatbatad a pornograpia. Ti nabiit pay a nainayon​—ti Doom II​—ket mainanama nga agbalin a napartak a malako​—uray pay no aggatad iti $69.95. Maitutop kadi daytoy a kita ti ay-ayam para kadagiti managayat-talna a Kristiano? Ti agtultuloy a panangdeskribir ni Lewis mabalin a tulongannakayo a mangikeddeng.

“Ti agay-ayam agpammarang a kas maysa a nauyong a Marino a naituding iti maysa kadagiti bulan ti Mars idi lukatan ti maysa nga aksidente ti industria ti maysa a pasilio nga agturong iti Impierno. . . . Ti Marino ikagumaanna ti lumasat kadagiti makatikaw a pasilio, . . . a kankanayon a dumanog, pumaltog, mangbabalaw iti kasta unay ken mangragadi kadagiti demonio ken dagiti dati a tattao. . . .

“Nalaka laeng a gupgopen dagiti nagbaliwan iti Doom II: Ad-adu a demonio, ad-adu a makapaamak a pasilio, ad-adu nga armas ken ad-adu a dara.”

Iti panagkomentona iti kombension ti computer idiay Las Vegas, Nevada, kinuna ti The New York Times: “Ti nakalawlawag a baro iti daytoy a tawen isu ti nasaknap pannakaiwarnakna a pornograpia . . . Inawisna ti dadduma kadagiti kadadakkelan a bunggoy iti komperensia.”

Kinuna ti mannurat iti Biblia a ni Santiago: “Ti sirib manipud ngato umuna iti amin nadalus, sumaganad natalna, nainkalintegan, sisasagana nga agtulnog, napno iti asi ken naimbag a bungbunga.” (Santiago 3:17) Dakayo a nagannak, sinukimatyo kadin dagiti ay-ayam iti home computer nga us-usaren dagiti annakyo iti di pay nabayag? Masapul kadi nga ad-adu pay ti salaysayenmi?