Salsaludsod Dagiti Agbasbasa

Ti kadi panaglinglingay ti maysa a tao babaen kadagiti naranggas nga ay-ayam iti kompiuter mangapektar iti relasionna ken ni Jehova?

“Ni met laeng Jehova sukimatenna daydiay nalinteg kasta met daydiay nadangkes,” insurat ni David nga ari ti nagkauna nga Israel, “ket ti asinoman a mangay-ayat iti kinaranggas pudno unay a guraen ti kararuana.” (Salmo 11:5) Ti orihinal a sao para iti “guraen” mabalin a kaipapananna “daydiay maysa a kabusor.” Gapuna, siasinoman nga agayat iti kinaranggas ar-aramidenna ti bagina kas kabusor ti Dios. Nasken ngarud nga usigentayo daytoy a saludsod: Ti kadi maysa nga ay-ayam iti kompiuter mapatanorna kadatayo ti panagayat iti kinaranggas?

Dagiti naranggas nga ay-ayam iti kompiuter itandudoda ti panangusar kadagiti igam. Masansan nga isuroda ti arte ti pannakigubat. Kinuna ti magasin a The Economist: “Ti militaria iti Amerika ket agpannuray unay kadagiti ay-ayam iti kompiuter kas panagsanay. Adda dagiti ay-ayam nga us-usaren ti militar a mabalin a magatang iti merkado.”

Pudno, dagidiay agus-usar kadagiti naranggas nga ay-ayam iti kompiuter saanda nga aktual a dangran dagiti tattao. Ngem ania ti ipasimudaagna a kasasaad ti pusoda no kasta a paglinglingayan ti pilienda? (Mateo 5:21, 22; Lucas 6:45) Ania ti makunam maipapan iti tao a maragsakan a mangbagsol, mangpaltog, mangbaldado, ken mangpapatay iti sinsinan tao? Kasanon no mangbusbos daytoy a tao iti adu nga oras kada lawas nga agay-ay-ayam kadagitoy a naranggas a pantasia, a dandani maadikton kadagiti kasta nga ay-ayam? Sigurado a patpatanorenna ti panagayat iti kinaranggas, no kasano a ti maysa a tao nga agbuybuya iti pornograpia patpatanorenna dagiti imoral a tarigagay.​—Mateo 5:27-29.

Kasano kakaro ti pananggura ni Jehova iti maysa nga agayat iti kinaranggas? Kinuna ni David a “pudno unay a guraen” ni Jehova. Idi kaaldawan ni Noe, impakita ni Jehova ti nakaro a pananggurana kadagidiay agayat iti kinaranggas. Kinuna ni Jehova ken ni Noe: “Ti panungpalan ti isuamin a lasag dimtengen iti imatangko, agsipud ta ti daga napno iti kinaranggas maigapu kadakuada; ket adtoy dadaelek ida a mairaman iti daga.” (Genesis 6:13) Ti pudno a Dios dinadaelna ti intero a lubong ti sangatauan gapu iti kinaranggasda. Dagiti laeng inispalna ket ni Noe ken ti pamiliana​—walo a tattao a saan a nagayat iti kinaranggas.​—2 Pedro 2:5.

Dagiti tattao nga agtarigagay nga agbalin a gayyem ni Jehova ‘pitpitenda dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng.’ Imbes a sursuruenda nga ayaten ti kinaranggas, ‘saanda a sursuruenen ti pannakigubat.’ (Isaias 2:4) Tapno agtalinaedtayo a gayyem ti Dios imbes nga agbalin a kabusorna, masapul nga ‘umadayotayo iti dakes ket aramidentayo ti naimbag.’ Masapul a ‘sapulentayo ti talna ket surotentayo dayta.’​—1 Pedro 3:11.

Kasano no nagbalinen a paglinglingayantayo ti naranggas nga ay-ayam iti video? No kasta, kasapulan a sititibker a determinadotayo a mangay-ayo ken ni Jehova babaen ti panangisardeng kadagiti aramid a kagurana. Masapul la ketdi nga ikararagtayo ti tulong ti nasantuan nga espiritu ti Dios tapno maisardengtayo dayta nga aramid a mamagpeggad iti espiritualidadtayo. Maisardengtayo dayta no bay-antayo a dagiti galad a kas iti talna, kinaimbag, ken panagteppel ti mangimpluensia iti panagbiagtayo maitunos iti wagas ti Dios.​—Lucas 11:13; Galacia 5:22, 23.