Manipud Managbasatayo
Relihion ken Gubat Kayatko nga iyebkas ti panangapresiarko kadagiti serye ti Oktubre 22, 1994 a “No Adda Dasigan ti Relihion iti Gubat.” Nupay nagbiagak idi tiempo ti pannakapapatay dagiti taga Serbia idiay Croatia, ubingak pay unay tapno malagipko daydi. Paginteresak unay daytoy a komplikado ken nakalkaldaang a kasasaad. Apresiarek ti panangilawlawagyo iti akem ti relihion ken dagiti naulpit a panagreggetna a mangpakaro iti panagsisina ken panaggiginnura dagitoy a nasional a grupo.
M. K., Estados Unidos
Natukay ti riknak iti artikulo a “Dikam Intandudo Dagiti Gubat ni Hitler.” Nagsayaat ti pannakaisuratna nga uray la nakasangitak. Agtawenak iti 15, ket naparegtaak a makaammo nga aniaman a sangkabassit a pakasuotan a mapasarak idiay eskuelaan wenno iti panangasaba, sibaballigi a mapagballigiak dayta.
A. M., Estados Unidos
Makasangitak kadagiti suot a napasaran ti pamilia a Wohlfahrt. Dagiti suotda ti nangpalag-an kadagiti babassit a pakaupayak. Ti artikulo pinaregtanak nga agtultuloy a puminget, tangay pagaammotayo kas Kristiano a mapasarantayo dagiti umasping nga ibubusor bayat nga umadani ti panungpalan daytoy a sistema.
M. S., Estados Unidos
Panangsaranay Madanaganak kadagiti Saksi ni Jehova idiay Rwanda. Iti panangbasak iti artikulo a “Panangtaripato Kadagiti Biktima ti Trahedia Idiay Rwanda” (Disiembre 22, 1994), ammok itan ti maipapan iti mapaspasaranda. Kinuna ti artikulo a nagadu ti natay sadiay. Ti namnama a maam-ammokto ida idiay Paraiso ti nangpasayaat bassit iti riknak maipapan iti daytoy. Kabayatanna, ikararagak dagiti kapammatiak idiay Rwanda.
J. D., Japan
Ti Naatap a Lobo Pagyamanan ti adu a makaisuro ken masansan a makaparagsak nga artikulo nga ipabpablaakyo maipapan iti panamarsua ni Jehova. Makapainteres unay ti artikulo a “Maysa a Naatap a Parsua—Magurgura ken Maay-ayat” maipapan iti Canis lupus (Setiembre 8, 1994). Ngem iti ladawan iti umuna a panid ti artikulo, ti ayup ket kasla bassit unay kas lobo.
S. W., Alemania
Apresiarenmi ti kapaliiwan daytoy natadem ti panagkitana a managbasa. Ti nai-drawing gayam a ladawan ket agpayso a naibasar iti retrato ti maysa a coyote, saan a lobo. Dispensarendakami iti kamalimi.—ED.
Satanismo Nakaam-amak ti naaramid a kadawyan a panangiladawan ken pangkaaduan a panangmatmat maipapan iti musika a heavy-metal iti amin a serye ti artikuloyo a “Ti Pangawis ti Satanismo” (Setiembre 22, 1994). Nupay pudno nga addada banda a maitutop iti daytoy a panangiladawan, saan a dinakamat ti artikuloyo ti dadduma a makagunggona a mensahe iti musika a heavy-metal.
C. C., Estados Unidos
Mabalin a pudno a saan nga amin a musika a heavy-metal ket direkta a mangitandudo iti Satanismo. Nupay kasta, pagaammo unay ti aglablabes ti kinalaadna a langa ken kababalin uray pay dagiti agdama a banda ti heavy-metal. Kasta met laeng ti nabayagen a pannakainaig daytoy a kita ti musika iti droga ken kinaranggas. Maigapu kadagitoy a kinapudno, patienmi nga obligadokami a mamakdaar kadagiti managbasa iti pannakainaig iti aniaman a kita daytoy a musika.—ED.
Umiso amin nga insuratyo. Napadakkel kas Kristiano ti inauna a balasangmi. Ngem idi agangay, nagbalin a rebelioso unay. Natakuatanmi a makitimtimpuyog kadagiti ubbing a dumdumngeg iti musika a heavy-metal. Ilemmengna gayam dagiti tape ti heavy-metal sa dumngeg kadagiti kanta no rabii babaen ti panagusarna iti headphone. Dadduma kadagiti liriko ket addaan iti sataniko a balikas! Natakuatanmi idi agangay dagiti sataniko a simbolo a nailemmeng iti siledna. Nagtungpalanna, pimmanaw iti pagtaenganmi ket natayen iti naespirituan. Ket maigapu amin dayta iti musika a heavy-metal.
D. B., Estados Unidos