Sadiay ti Kuarta Agtalinaed Kadagiti Kayo

IPAPANTAYON nga agpataud ti kuarta dagiti kayo ket adda mulayo a kasta a kayo. Ita panunotenyo a ti kayoyo ket naimula iti sibay ti maysa a dalan a pagpagnaan ti adu a kaarrubayo iti inaldaw. Kasano kapaut ti pagarupenyo a panagtalinaed ti kuarta iti mulayo a kayo?

No amin dagiti kaarrubayo ket Saksi ni Jehova, natalgedto ti mulayo a kayo nga agpataud ti kuarta. Apay a kunaenyo ti kasta? Agsipud ta dagiti Saksi ni Jehova surotenda ti bilin ti Biblia nga agbiag a mapagtalkan iti isuamin a bambanag. (Hebreo 13:18) Maysa a nabiit pay a pasamak ti mangyilustrar iti daytoy.

Idiay Nigeria, Makinlaud nga Africa, nasarakan ti maysa a papel de banko a lima-naira iti kalsada 91 metro manipud iti kaasitgan a patakder ti sanga nga opisina ti Watch Tower Society. Inggalut ti nakasarak iti dayta iti palatang ti niog iti asideg, a pampanunotenna a ti tao a nakapukaw iti kuarta mabalin nga agsubli a mangbirok iti dayta.

Nupay no ti kuarta ket nalawag a makita dagiti adu a Saksi ni Jehova nga inaldaw a lumabas, awan ti nangaklon iti dayta. Kalpasan ti adu nga aldaw naikkaten dayta ket naikabil iti kahon ti kontribusion ti Sosiedad.