Agannad ti Agdudungsa a Tsuper
DAYTA ti pakaigapuan ti napattapatta nga 600,000 nga aksidente ken 12,000 nga ipapatay iti kalsada iti kada tawen idiay Estados Unidos. Naipabasol dayta iti 40 porsiento kadagiti makapapatay a dinnungparan kadagiti kallabes a tawen iti New York State Thruway. Amin daytoy a dinnungpar ket maigapu iti panagmaneho nga adda iti sidong ti impluensia ti panagdungsa, saan a ti droga wenno arak. Patien ti dadduma nga eksperto a ti parikut ket maigapu iti estilo ti panagbiag ti 1990’s, saan nga iti sakit iti pannaturog, a kas iti apnea wenno insomnia. “Saan unay a makaturturog dagiti Americano [ita] ngem iti napalabas a sumagmamano a tawen,” kuna ni Dr. William Dement ti Stanford University Sleep Research Center. Kuna ni Dave Willis, direktor ehekutibo ti American Automobile Association Foundation for Traffic Safety: “Nalabes ngamin ti panagtrabaho ken panagay-ayam ti tattao ta awanen inanada.”
Nangnangruna a makapadanag isut’ kinapudno nga adu nga agdudungsa a tsuper ti mailibay ken makatuglep a dida ammo dayta. Ti “sangkabassit a pannaturog,” kas pangawag dagiti eksperto iti dayta, mabalin nga agpaut laeng iti sumagmamano a kanito, ngem nakabutbuteng dagiti nagnanaay nga epektoda. “Malagipko a limmabasak iti exit 17, idi kuan makitak metten ti karatula nga exit 21,” isalaysay ti maysa a tsuper. “Pinampanunotko, sadino ngatat’ yanko iti dadduma a nalabsak nga exit? Maamirismo a milagro pay ketdin no sadinot’ turongemon.”
Ti kasayaatan a pangsumra iti makabannog a panagmaneho isut’ panagsardeng ken panaginana. Mabalin a kasapulanyo laeng ti 10- agingga iti 20-minuto a panagridep iti natalged a lugar. Nasaysayaat pay, agbalinkayo a realistiko no agpalplanokayo nga agbiahe. Dikay ikagumaan a manehuen ti nawatwatiwat a distansia ngem iti kabaelanyo. Kasta met a raemenyo ti makin-uneg a pagorasan ti bagiyo babaen ti panangliklik iti makabannog a panagmaneho iti rabii ken babaen ti umdas a panaginana sakbay nga agbiahekayo. Kangrunaan iti amin, dikay tagibassiten ti peggad ti panagmaneho no agdudungsakayo. Kunaen ni Mark Hammer ti New York’s Institute for Traffic Safety Management and Research: “[Daytat’] kas iti kinadakes ti maminlima a panagbartek sa agmaneho iti kotse.”