Kinigtot ti Maysa a Libro ti Lubong

Ti libro: The Origin of Species. “Maikadua iti Biblia,” kinuna ti antropologo a ni Ashley Montagu, “awanen ti libro a kasta unay ti impluensiana.”

Ti autor: Ni Charles Darwin, nga idi ket inawagan ti dadduma a “ti kapepeggadan a tao idiay Inglaterra.”

Ti tema: Ti teoria ti ebolusion. Naipasdeken a naimbag dagiti sasao ken grupo dagiti sasao kas ti “natural selection,” “survival of the fittest,” ken “ebolusion.” Ngem ti kadi biagyo ad-adda nga inapektaran ti teoria ngem ti pagsasaoyo?

IDI nairuar idi 1859, ti The Origin of Species, ni Charles Darwin, rinubrobanna ti nauyong a panagdedebate iti sientipiko ken relihioso a kagimongan.a Inapektaran pay ti debate uray ti ekonomia ken ti kagimongan ken nagtultuloy agingga itatta, agarup 136 a tawen kalpasan ti pannakairuar ti libro.

Iti A Story Outline of Evolution, nagsurat ni C. W. Grimes maipapan ti Origin of Species ni Darwin: “Awan ti sabali a libro a naimprenta nanipud pay idi a nakaigapuan ti kasta unay a panagsusupiat dagiti managpanunot a tattao. Awan ti sabali a tema iti historia ti tao a nangkarit iti kadawyan a pammati, nangbalbaliw iti lubong ti Nakaparsuaan, ken nangtubay, namagbalay, ken nangpatangken iti kapanunotan ti tao a kas iti Ebolusion.”

Pudno, saan a ni Darwin ti namunganay iti teoria ti ebolusion; ti kapanunotan agsubli pay iti kadaanan a Grecia. Addada met sumagmamano a maika-18-siglo nga immun-una ngem ni Darwin a nangirusat iti nasaknap a panangawat iti The Origin of Species.

Nupay kasta, ti libro ni Darwin, ti nagbalin a pakaibatayan ti moderno a kapanunotan iti ebolusion. Talaga a kinigtotna, wen pinagsiddaawna, ti lubong, ta ti teoriana iti ebolusion saanna laeng a pinagbalbaliw a naan-anay ti biolohia. Kas iti bagio ginunggonna a mismo ti pamuon ti kagimongan​—relihion, siensia, politika, ekonomia, biag ti kagimongan, historia, ken ti panangmatmat iti masanguanan.

Kasano a ti teoria inapektaranna ti lubong iti nasurok a maysa a siglo itan? Kasano nga inapektaranna ti biagyo? Ket ania dagiti nagbanagan ken impluensiana iti masanguanan? Usigento dagiti sumaganad nga artikulo dagitoy a saludsod.

[Dagiti Footnote]