Ti Panangmatmat ti Biblia

Narigat Unay Kadi a Ragpaten Dagiti Pagalagadan ti Dios?

“SAAN A RUKODEN TI DIOS DAGITI TATTAO BABAEN ITI PULGADA.”​—DAAN A REPLAN TI SCOTLAND.

DAGITI panangsubok iti eskuelaan, interview iti pagtrabahuan, ken medikal nga eksaminasion ket sumagmamano laeng kadagiti pakarukodan iti panagbalbaliw ti biag ti maysa a tao. Ngem no maipapan iti inaldaw a panagbiag a maitunos kadagiti pagalagadan ti Dios, marikna ti adu a tattao a nalabit saanda a maragpat ida. Kasta met kadi ti pammatiyo? Maragpatyo kadi dagiti pagalagadan ti Dios?

Tapno masungbatan, umuna a kitaentayo dagiti impasdek ti Dios a pagalagadan agpaay kadagiti agdaydayaw kenkuana. Lawlawagan ti Biblia no kasano ti rumbeng a pannagnatayo iti biag. (Salmo 119:105) Kinuna ti masirib a mannurat iti Biblia a ni Ari Solomon a ti “dagup ti rebbeng” ti tao isu ti ‘panagbuteng iti pudno a Dios ken panangsalimetmet iti bilbilinna.’ (Eclesiastes 12:13) Kinuna ni mammadto a Mikias: “Ania aya ti iparebbeng ni Jehova kenka, no di laeng ti agaramid a sililinteg, ken iti kinamanangngaasi ken pannagna a sipapakumbaba iti Diosmo?”​—Mikias 6:8.

Impakaammo ni Jesu-Kristo, ti mismo nga Anak ti Dios, nga awan ti dakdakkel a bilin ngem ti “ayatem ni Jehova a Diosmo iti amin a pusom ken iti amin a kararuam ken iti amin a panunotmo ken iti amin a pigsam” ken “ayatem ti kaarrubam a kas iti bagim.” (Marcos 12:30, 31) Kanayonanna, ipakitatayo nga ayatentayo ti Dios babaen ti panagtulnog kadagiti amin a bilbilinna.​—1 Juan 5:3.

Simple laeng a nayebkas, rebbeng nga ayaten ken raemen dagiti tattao ti Dios, tungpalen dagiti bilinna, agtignay nga awan idumdumana, agbalin a naasi kadagiti isuamin, ken liklikan ti kinatangsit. Saantay kadi a maragpat dagita a pagalagadan?

Mangted ti Dios iti Pammalubos

Siuumiso nga inanamaen ti Dios a ragpaten ti tattao dagiti pagalagadanna. Ngem, iti amin a kinapudno, adda kadi aniaman a tao a naan-anay a nakitunos kadagitoy a pagalagadan iti amin a tiempo? Nabatad nga awan, ta natawidtayo ti kinaimperpekto manipud iti apotayo a ni Adan. (Roma 5:12) Gapuna, talaga nga agbidduttayo. Ngem daytoy dinatay pagbalinen a di maikari a mangipaay iti makaay-ayo a panagserbi iti Dios.

Tapno iyilustrar, usigenyo dagiti parikut iti panagsursuro nga agmaneho iti kotse. Sapulen dayta ti kanayon a panagsiput ken tiempo tapno makamaneho a naimbag ket makapasá iti panangsubok nga agmaneho. Siempre, masapul nga ikagumaantayo ti agmaneho a naimbag uray no nakaalatayon iti lisensia. Bayat ti pananggun-odtayo iti kapadasan, maensayotayo ti kinasigotayo. Ngem awan dagiti naan-anay a tsuper!

Makaparagsak ta mangted ti Dios iti pammalubos kadagiti pagkapuyantayo. Isut’ nainkalintegan, a dina kalikaguman ti ditay kabaelan nga aramiden, wenno kanayon nga agsapul iti pagbiddutan. Maawatanna dagiti biddut ken pagkapuyantayo. Ni Ari David, a nagbasol iti nakaro, impudnona: “Isu saanna nga impaay kadatayo ti kas mayanatup kadagiti basbasoltayo; dinatayo met sinupapakan iti katutopan dagiti kinadangkestayo.” Gapu iti ania a rason? ‘Ta kas kangato dagiti langlangit iti ngatuen toy daga, kasta ti kadakkel ti kinamanagayat [ti Dios] kadagiti agbuteng kenkuana.’ Uray pay pagaammo ni Jehova nga agbasoltayo, isut’ sisasagana a mangyadayo kadagiti basoltayo ‘kas panagaddayo ti leleggakan ti init ken ti lelennekan ti init.’​—Salmo 103:10-14.

Dikay Sumuko

“No malidayak,” ilawlawag ti maysa a napasnek a managdaydayaw iti Dios, “ipagarupko no dadduma a pulos a diakto agballigi nga agbiag babaen kadagiti pagalagadan ti Dios. Ngem idi pinagbalinko nga ad-adda a positibo ti panangmatmatko, mariknak a kabaelak ti agbiag iti pamay-an a kayat ti Dios agpaay kaniak. Ngem saan a nalaka amin dayta!” Dikay maupay no kastoy ti mariknayo. Saan a dakay ti immuna a nakarikna ti kasta, wenno dakayto ti maudi.

Prangka nga inamin ti Kristiano nga apostol a ni Pablo: “No kayatko nga aramiden ti umiso, ti dakes ti adda kaniak. Pudno a pagragsakak ti linteg ti Dios maitunos iti kinatao nga adda iti unegko, ngem makitak iti kamkamengko ti sabali a linteg a makibakbakal maibusor iti linteg ti panunotko ket iturturongnak a sikakayaw iti linteg ti basol . . . Nakaay-ay-ayak a tao!” Ngem dina imbaga a nakarigrigat ti inanamaen ti Dios, ta innayonna: “Siasinonto ti mangalaw kaniak iti bagi nga agpaspasar itoy nga ipapatay? Pagyamanan iti Dios baeten ken Jesu-Kristo nga Apotayo! No kasta, ngarud, iti panunot[ko] adipennak a mismo ti linteg ti Dios, ngem iti lasag[ko] ti linteg ti basol.” (Roma 7:21-25) Ngarud nariknana a kabaelanna nga ay-aywen ti Dios nupay managbasol pay laeng.

Pakawanen ni Jehova, ti naayat a Namarsuatayo, dagiti biddut ken pagkapuyantayo babaen iti pateg ti daton a subbot ti ingungotenna nga Anak, ni Jesus. “No ti asinoman makaaramid iti basol,” insurat ni apostol Juan, “addaantayo ti katulongan iti Ama, ni Jesu-Kristo, daydiay nalinteg. Ket isu maysa a pangikappia [mangabbong] a sakripisio a maipaay kadagiti basoltayo.” (1 Juan 2:1, 2) Ti bangen a panglapped ti basol ken manglapped kadatayo a mangragpat iti pagalagadan ti Dios agpaay iti pannakipagayam ket naikkat wenno napugsaten babaen ti pannakabalin ti sakripisio ni Kristo. Isu a naisublin ti pannakikadua iti Dios.

Ti sipapakumbaba a panangawat itoy a naayat nga urnos ket mangyeg iti pammakawan, ta ti Dios agtaeng iti “daydiay addaan iti maysa nga espiritu a napagbabawi ken napakumbaba.” (Isaias 57:15) Makapagtalektayo Kenkuana a mangbiag manen iti espiritutayo. Ikarina a ‘bangonenna ti napanglaw manipud iti tapuk.’ Saanen a masapul pay nga agtalinaedtayo a malmaldaang no ditay makapagtulnog a naan-anay iti Dios. Imbes ketdi, makapagtalektayo a mabigbig ti Dios ti panangikagumaantayo nga agbiag babaen kadagiti pagalagadanna.​—Salmo 113:7; Hebreo 6:10-12.

Uray pay no daytat’ maysa a pakidangadangan, mapaliiwyonto a naragragsakkayo a mangaramid iti makaay-ayo iti Dios. Ti debosion iti Dios pagbalinenna ti biag a nalaklaka nga anduranyo ken dagidiay adda iti aglawlawyo. Kasta met, panunotenyo ti masanguanan. Ti panangikagumaan nga agbiag sigun kadagiti pagalagadan ti Dios iyegna itan ti namnama a biag nga agnanayon iti sidong ti paraiso a kasasaad.​—Isaias 48:17; Roma 6:23; 1 Timoteo 4:8.

Mabigbig dagiti aduanen kapadasan a managuli iti bantay nga apaman a nakagtengdan iti tuktok, kagudua pay laeng ti naturposda. Masapul pay a bumabada a sitatalged. Kasta met, dagidiay agbuteng iti Dios masapul nga agpadpada a ragpatenda dagiti pagalagadan ti Dios ken kalpasanna agtalinaedda nga agbiag babaen kadakuada.​—Lucas 21:19; Santiago 1:4.

Maliwliwakayo koma a makaammo a saan a narigat a ragpaten dagiti pagalagadan ti Dios. No sagpaminsan a dikay naan-anay [nga agbiag] a maitunos kadakuada, dumawatkayo iti pammakawan. Manginanamakayo iti naayat a panangsaranayna. (Salmo 86:5) Ngarud, babaen ken Jehova ken iti Anakna kas Katulonganyo, mabalinyo a ragpaten dagiti pagalagadan ti Dios ken gun-oden ti anamongna.​—Proverbio 12:2.