No Kasano a Makapagbiagkayo nga Agnanayon

YANTANGAY nabatad a kabaelan ti bagi ti tao ti agbiag iti napapaut pay ngem ti tagtagiragsaken ti tattao itatta, daddumat’ agtalek iti siensia tapno matakuatan no kasano a makapagbiagtayo iti agnanayon. “Bayat a magun-odantayo ti ad-adda a kompleto a pannakaammo kadagiti kemikal iti bagi ken no kasano ti epektoda iti maysa ken maysa,” kinuna ni Dr. Alvin Silverstein, “malawlawagantayto ti pakabuklan ti biag. Maawatantayto . . . no kasano a lumakay ti tao.”

Buyogen ti ania a pagbanagan? Agturongto dayta iti “maysa a baro a panawen iti historia ti tao,” kinuna ni Silverstein. “Awanton dagiti ‘lallakay’ a tattao, ta ti pannakaammo a mangipalubosto iti pannakaparmek ni patay mangyegto met iti agnanayon a kinaagtutubo.”

Maibanagto kadi dagiti tattao daytoy? “Dika isaad ti panagtalekmo kadagiti prinsipe, wenno iti anak ti tao a kenkuana awan pannakaisalakan,” iparegta ti Biblia. “Ti espirituna pumanaw, isu agpulang iti dagana; iti dayta met la nga aldaw ti pampanunotna mapukawda.” (Salmo 146:3, 4) Dagiti tattao dida nabaelan nga inlasin, nangnangruna pay makorehir, ti naisigud a pagkapuyan nga agbanag iti panaglakay ken ipapatay, kas iti nakitatayon. Ti laeng Namarsuatayo ti makaaramid iti dayta.

Ngem, talaga kadi a panggep ti Dios nga agbiag nga agnanayon dagiti tattao ditoy daga?

Ti Panggep ti Dios

Sadino ti nangikabilan ni Jehova a Dios ti immuna a pagassawaan a tao tapno agbiag? Iti maysa a naindagaan a paraiso. Ket nabilinda nga “agbunga ken agadu ken punnuenda ti daga ken talonenda dayta.” (Genesis 1:28) Wen, ti panggep ti Dios ket, inton agangay, ti intero a daga ket pagnaedanto ti maysa a nalinteg a pamilia ti tao nga agkakadua nga agbiag a buyogen iti talna ken kinaragsak.​—Isaias 45:18.

Nupay nasentensiaan ti ipapatay ni Adan gapu iti panagsukirna, saan a nagbalbaliw ti sigud a panggep ti Dios nga agbiag nga agnanayon ti tattao iti Paraiso ditoy daga. (Genesis 3:17-19) “Insaok,” kuna ti Dios, “aramidekto met.” (Isaias 46:11; 55:11) Impakita ti Dios a saan a nagbalbaliw ti panggepna maipapan iti daga idi kinunana: “Dagiti nalinteg a mismo tagikuaendanto ti daga, ket agtaengdanto nga agnanayon iti dayta.”​—Salmo 37:29.

Kas ti Namarsuatayo, kabaelan ti Dios a korihiren ti depekto a mangpatpataud iti panaglakay ken ipapatay ti tattao. Kasano a maaramidanna daytoy? Yantangay dayta a depekto ket natawid iti immuna a tao, ni Adan, impaay ti Dios kas daton a subbot ti naan-anay a natauan a biag ti Anakna, ni Jesu-Kristo, “tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.”​—Juan 3:16; Mateo 20:28.

Ngarud, talaga a sinukatan ni Jesu-Kristo ti sigud nga Adan kas amatayo, wenno mannangted-biag. Dayta ti makagapu nga iti Biblia maawagan ni Jesus a “ti maudi nga Adan.” (1 Corinto 15:45) Isu nga imbes a makondenar a matay kas annak ni managbasol nga Adan, dagiti natulnog a tattao mabalin a maibilangda a maikari nga umawat iti biag nga agnanayon kas annak ti “Agnanayon nga Ama[da],” ni Jesu-Kristo.​—Isaias 9:6.

Siempre, “ti Ari iti agnanayon” ken “ti Ama ni Apotayo a Jesu-Kristo” isu ni Jehova a Dios. (1 Timoteo 1:17; Apocalipsis 15:3; Colosas 1:3) Ngem ni Jesu-Kristo, malaksid ti pannakaipaayna kas “Agnanayon nga Ama” ken “Manangisalakan[tayo],” isu pay ti “Prinsipe ti Kappia.” (Lucas 2:11) Kas pannakabagi ni Amana, usarento ni Kristo ti autoridadna a kas prinsipe a mangyeg iti kappia ditoy daga.​—Salmo 72:1-8; 110:1, 2; Hebreo 1:3, 4.

Iti sidong ti turay ni Jesu-Kristo, maisublinto ti napukaw a naindagaan a Paraiso. Mapasamakto daytoy, kinuna ni Jesus, “iti pannakaparsua manen, inton ti Anak ti tao agtugaw iti nadayag a tronona.” (Mateo 19:28) Dagiti matalek a pasurot ni Kristo​—a 144,000 ti bilangda​—makipagturaydanto kenkuana iti Paraiso a daga. (2 Timoteo 2:11, 12; Apocalipsis 5:10; 14:1, 3) Riniwriw ti magunggonaanto manipud iti dayta nalinteg a turay babaen ti panangtagiragsak[da] iti biag ditoy daga iti Paraiso. Mairamanto kadakuada ti kriminal a natay iti sibay ni Jesus isu a nangikarian ni Jesus: “Makikaduakanto kaniak idiay Paraiso.”​—Lucas 23:43.

Iti kasta, mapagungarto uray pay dagiti di nalinteg a natay ket maikkanda iti gundaway a maikari nga agbiag nga agnanayon ditoy daga. (Aramid 24:15) Nagpintas ti panangiladawan ti Biblia iti pannakapukaw ti sakit, panaglakay, ken ipapatay, ta kunana: “Ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 21:3, 4.

No Kasano ti Agbiag nga Agnanayon

Sigurado a kayatyo ti mairaman kadagidiay mangtagikuanto iti daga ken agtaeng nga agnanayon iti dayta. No kasta, masapul a makitunoskayo kadagiti kasapulan iti panagbiag nga agnanayon iti Paraiso. Iti kararagna iti nailangitan nga Amana, impakaammo ni Jesu-Kristo ti maysa a kangrunaan a kasapulan, a kunkunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Maragsakanto dagiti Saksi ni Jehova a tumulong kadakayo a manggun-od itoy a makaited-biag a pannakaammo. Basta kiddawenyo kadakuada ket bisitaendakayto iti kombiniente a tiempo, nga awan bayadanyo, ket salaysayendanto no kasano a pinanggep ti Dios nga ibangon ti sangatauan iti kinanaan-anay iti naespirituan ken iti bagi. Inanamaenyo a ti mannakabalin-amin a Namarsuatayo naan-anay a kabaelanna a korehiren ti natawidtayo a pagkapuyan a mangpatpataud iti panaglakay ken ipapatay. Dumtengen ti tiempo, ket asidegen, inton saanen nga ababa ti biag. Bendisionanto ni Jehova ti ilina iti “biag nga awan inggana.”​—Salmo 133:3.

[Ladawan iti panid 10]

Iti sidong ti turay ni Kristo a prinsipe, maparmekton ti panaglakay ken ipapatay